Mga vendor sa Maynila na ‘di sasailalim sa swab testing tatanggalan ng permit

Mga vendor sa Maynila na ‘di sasailalim sa swab testing tatanggalan ng permit

March 15, 2021 @ 8:28 AM 1 year ago


MANILA, Philippines – Babawiin ng lokal na pamahalaang lungsod ng Maynila ang pribilehiyo na makapagtinda sa mga pampublikong pamilihan ang mga manininda sa oras na tumanggi itong sumailalim sa libreng RT-PCR swab testing.

Ito ang babala ni Manila Mayor Isko Moreno Domagoso sa mga vendor sa may 17 pampublikong pamilihan sa lungsod ng Maynila dahil sila ang madalas na makahalubilo ng publiko sa araw-araw.

Inatasan ni Domagoso si Manila Market Administrator Zenaida Mapoy na siguruhin na magpapasuri ang lahat ng mga vendor sa mga pampublikong palengke sa Maynila kasabay ng pagbabanta ng alkalde na babawiin o tatanggalan ng permit ang sinomang manininda na hindi makikiisa o tatangging magpasuri sa libreng swab test ng lokal na pamahalaang lungsod sa gitna ng tumataas na bilang ng mga tinatamaan ng COVID-19 virus.

Giit ni Domagoso, libre namang ibinibigay ng lungsod ang pagsusuri sa mga manininda kaya’t walang dahilan para hindi sila sumailalim dito.  Jay Reyes