MANILA, Philippines – Sisimulan na sa Abril ang pagpapatupad ng single ticketing system sa National Capital Region (NCR), ayon kay Metro Manila Council (MMC) head at San Juan City Mayor Francis Zamora nitong Miyerkules, Pebrero 1.

“Within April, realistic ‘yan. Like what I’ve mentioned earlier, after today, it has been approved already. Aandar na ‘yung proseso natin,” pahayag ni Zamora.

Matatandaan na inaprubahan ng MMC ang Metro Manila Traffic Code na gagamitin para sa single ticketing system sa NCR.

Dahil dito, kailangan amyendahan ng mga LGU na kasama rito ang kani-kanilang mga ordinansa na may kinalaman sa mga polisiya sa trapiko hanggang Marso 15.

Layon ng single ticketing system na magkaroon ng iisang polisiya para sa mga traffic violations at penalty system sa rehiyon, o ang mga lungsod ng Caloocan, Malabon, Navotas, Valenzuela, Quezon City, Marikina, Pasig, Taguig, Makati, Manila, Mandaluyong, San Juan, Pasay, Parañaque, Las Piñas, Muntinlupa, at Pateros.

Ayon kay Metropolitan Manila Development Authority (MMDA) chairman Romando Artes, ang ahensya nila ang sasagot sa mga gastusin para sa mga kagamitan na kakailanganin sa bagong sistema. RNT/JGC

MANILA, Philippines – Pinangalanan ngayon ni Department of the Interior and Local Government (DILG) Secretary Benjamin “Benhur” Abalos, Jr. ang bubuo sa advisory group na siyang magsasagawa ng inisyal na screening sa mga matataas na opisyal ng Philippine National Police (PNP) na naghain ng courtesy resignation.

Sa isang press conference na ginanap ngayong umaga, inanunsyo ni Abalos na ang mga miyembro ng advisory group ay sina Baguio City Mayor Benjamin Magalong, PNP Chief Director General Rodolfo Azurin Jr., dating National Defense Secretary Gilbert “Gibo” Teodoro, Jr. at Retired Major General Isagani Nerez. Ang panglimang miyembro ay tumangging isapubliko ang kanyang pangalan.

Sinabi ng Kalihim ng DILG na agad nang magsisimula sa kanilang screening ang advisory group at inaasahang matapos ang buong proseso ng tatlong buwan.

“Mataas ang respeto natin sa limang volunteer advisors na ito na tumanggap ng napakahirap na hamon at responsibilidad na magsagawa ng imbestigasyon upang patuloy na masugpo ang iligal na droga sa bansa,” ani Abalos.

Kampante naman ang kalihim na magiging patas at walang kinikilingan ang magiging review ng advisory group “dahil sila ay kilalang may kredibilidad, integridad at magandang track record sa kani-kanilang larangan.”

Ang nasabing advisory group ang magsasala sa mga courtesy resignation ng mga matataas na opisyal ng PNP kasama ang National Police Commission (NAPOLCOM).

Binigyang-diin ni Abalos na hindi isang pormal na government appointment ang pagiging miyembro ng nasabing advisory group at pinakiusapan lamang ang mga volunteer advisors.

“Nililinaw ko lang na ito ay legal na proseso dahil ito ay advisory group lamang na siyang magrerekomenda sa National Police Commission (Napolcom) at sa kalaunan kay Presidente Ferdinand R. Marcos, Jr. Wala silang tatanggaping sahod o allowance dito,” aniya.

Hiningi ng kalihim sa publiko na suportahan ang imbestigasyon upang mapagtagumpayan ang kampanya ng pamahalaan laban sa iligal na droga.

“Hinihiling ko po na ibigay natin ang ating 100% support sa kanila at patuloy tayong makiisa sa labang ito para masugpo ang droga na matagal ng nakakapaminsala sa ating bansa at nakakasira sa pangarap at kinabukasan ng mga inosenteng Pilipino,” dagdag ni Abalos. Jan Sinocruz

ECHAGUE, ISABELA – Bumagsak sa bitag ng pulisya ang maglive in partner matapos na masamsaman ng halos mahigit kalahating milyong halaga ng shabu sa Barangay San Fabian, Echague, Isabela.

Sa ipinarating na ulat ni PMaj. Rogelio Natividad, hepe ng Echague Police Station kay PCol. Julio Go, Provincial Director ng Isabela Police Provincial Office o IPPO ang maglive in partner ay sina Marilou Saldoval, 52 anyos, vendor at live in partner na si Jhimuel Haduca,42 anyos, mekaniko at kapwa residente ng Barangay Daniel Fajardo, Las Pinas City.

Sa panayam ng REMATE kay PMaj. Natividad, napag-alaman na nagpapanggap umanong buyer ng saging ang dalawa upang makapagbenta ng kontrabando sa dito sa lalawigan ng Isabela at sa boung rehiyon.

Ang mag-live in partner ay kabilang din sa mga High Value Individual o HVI at High Value Target o HVT ng Philippine Drug Enforcement Agency o PDEA at Philippine National Police.

Nahaharap sa kasong R.A 9165 o Comprehensive Dangerous Drugs Act of 2002 ang mag live in partner. Rey Velasco

MANILA, Philippines – Tinatayang umabot na sa 44 katao ang napaulat na namatay dahil sa masamang panahon sa iba’t ibang bahagi ng bansa simula nang magsimula ang taon.

Sa 6 a.m. report ng National Disaster Risk Reduction and Management Council (NDRRMC), sinabi nito na may 14 na katao ang napaulat na namatay sa Bicol, 12 naman sa Zamboanga, 8 sa Northern Mindanao, 7 naman sa Eastern Visayas, at tig-isa sa Mimaropa, Davao at Soccsksargen.

“Only 20 of the reported fatalities have been confirmed so far,” ayon sa NDRRMC.

Samantala, may 8 katao naman ang napaulat na nawawala at 11 ang nasaktan dahil sa matinding epekto ng masamang panahon, bunsod ng low pressure areas, shear line, at northeast monsoon.

Sinabi ng NDRRMC, may 2,047,222 katao o 497,774 pamilya ang apektado ng masamang panahon sa Cagayan, Central Luzon, Calabarzon, Mimaropa, Bicol, Western Visayas, Central Visayas, Eastern Visayas, Zamboanga, Northern Mindanao, Davao, Soccsksargen, at Bangsamoro Autonomous Region in Muslim Mindanao.

Sa apektadong populasyon, may 7,189 katao o 1,741 pamilya ang nananatili sa 74 evacuation centers.

May kabuuang 1,888 bahay ang napaulat na napinsala kung saan may 1,325 partially damage habang 563 naman ang totally damage.

Ang pinsala naman sa agrikultura ay nagkakahalaga ng P1,059,352,780 habang sa imprastraktura nmaman ay umabot sa P521,914,324.

Ang pinsala naman sa National Irrigation Administration ay umabot sa P25,939,969 halaga ng pinsala.

Ang state of calamity ay idineklara sa 86 lungsod at munisipalidad.

Ang halaga ng tulong na naibigay sa mga biktima ay umabot na sa P114,473,053, ayon sa NDRRMC. Kris Jose

MANILA, Philippines – Inaasahang mapipirmahan ang nasa pitong bilateral agreements sa pagbisita ni Pangulong Ferdinand Marcos Jr. sa Japan sa susunod na linggo.

Nakatakdang bumisita si Marcos sa Tokyo mula Pebrero 8 hanggang 12, kung saan inaasahan na palalakasin nito ang relasyon sa pagitan ng Pilipinas at Japan.

“During the visit, we anticipate the signing of seven key bilateral documents or agreements covering cooperation in infrastructure development, defense, agriculture and information and communications technology, areas that are in the President’s priority agenda,” ayon kay DFA Assistant Secretary Neal Imperial.

Aniya, kasama sa biyahe patungong Japan sina First Lady Louise “Liza” Araneta-Marcos, former President Gloria Macapagal-Arroyo, Senate President Juan Miguel Zubiri, Speaker Martin Romualdez, Foreign Affairs Secretary Enrique Manalo, Finance Secretary Benjamin Diokno, Trade and Industry Secretary Alfredo Pascual, Energy Secretary Rafael Lotilla, Tourism Secretary Christina Frasco, Special Assistant to the President Antonio Lagdameo Jr., at Presidential Communications Office Secretary Cheloy Garafil.

Makikipagpulong naman si Marcos kay Japanese Prime Minister Fumio Kishida, na susundan ng working dinner na pangungunahan ng Japanese leader.

“Both leaders will discuss a broad range of bilateral and regional issues to further strengthen the two countries’ cooperation in the second decade of their strategic partnership,” sinabi pa ni Imperial.

Ibinahagi rin niya na bibigyan ang Pangulo at ang First Lady ng Imperial Audience kasama sina Emperor Naruhito at Empress Masako.

Magkakaroon din ito ng meet and greet sa Filipino community bago lumipad pabalik ng Manila sa Pebrero 12.

Nauna nang sinabi ni Marcos na ang kanyang pagbisita sa Japan ay nakasentro sa economic security.

“The agenda will be a continued discussion of what we started in New York, which essentially centers around economic security,” anang Pangulo.

Noong Nobyembre 2022, nagkasundo si Marcos at Japanese Prime Minister Fumio Kishida na palakasin pa ang kooperasyon sa pagitan ng Pilipinas at Japan.

Dito ay nagpasalamat naman ang Pangulo sa Japan sa suportang natatanggap ng bansa sa iba’t ibang larangan lalo na sa disaster management. RNT/JGC