Multa sa ‘di nabayarang SSS contri ng kasambahay, ilibre na-Jinggoy

Multa sa ‘di nabayarang SSS contri ng kasambahay, ilibre na-Jinggoy

August 27, 2022 @ 2:25 PM 4 weeks ago


MANILA, Philippines – Matapos mabigyan ng P1,000 dadag-sahod ang mga kasambahay sa Metro Manila, ipinanukala ni Senador Jinggoy Estrada ang condonation ng penalty sa hindi nababayarang kontribusyon sa Social Security System (SSS) ng lahat household employers.

Binigyan diin ni Estrada sa kanyang paghahain ng Senate Bill No. 43 na sakop ng naturang condonation hindi lamang ang 200,000 na mga household employers sa National Capital Region (NCR) kundi lahat ng employers ng tinatayang 1.4 milyong kasambahay sa bansa.

“Win-win solution ito. Ang mga delingkwenteng household employer ay hindi mapapatawan ng multa samantalang ang mga kasambahay naman ay maaari ng pakinabangan ang mga benepisyong inaalok ng insurance program ng gobyerno na naipagkait sa kanila dahil sa hindi pag-remit ng kontribusyon ng kanilang mga amo,” ani Estrada, punong may-akda ng Batas Kasambahay o Republic Act 10361.

Sa survey na isinagawa ng Department of Labor and Employment (DOLE) at Philippine Statistics Authority (PSA), lumabas noong Oktubre 2019 o anim na taon matapos maging ganap na batas ang RA 10361, na nasa 83 porsiyento ng 1.4 milyong kasambahay ang hindi pa rin nakakakuha ng anumang social security benefit.

Sinabi rin ng SSS na para sa taong 2019, nasa 267,478 na kasambahay pa lamang ang nakarehistro sa SSS.

“Sa halip na patawan ng multa ang mga delingkwenteng employer, kailangan na isulong ang pakikipagtulungan sa kanila. Ang layunin ng Batas Kasambahay ay itaguyod ang kapakanan ng ating mga kasambahay at tiyakin ang kanilang kalusugan at produktibong relasyon sa kanilang mga amo,” paliwanag ng mambabatas.

Sa kanyang panukalang batas, iminungkahi ni Estrada na ang mga household employers na hindi nag-remit ng kontribusyon sa SSS ay maaaring bayaran ang kanilang pagkakautang o magsumite ng payment plan para sa installment basis sa loob ng anim na buwan sakaling maging ganap na batas ito.

Sakaling mabigo ang employer na makapagbayad ng kanyang kontribusyon sa loob ng anim na buwang palugit o pumalya sa anumang amortization, maaari ng singilin ang pagkakautang ng employer simula sa pinakaunang kontribusyon na dapat bayaran na naaayon sa Social Security Law o RA 8282 Ang mga hindi registradong household employers o iyong mga may kasong may kinalaman sa pagkolekta ng kontribusyon o multa na nakabinbin sa korte o piskalya ay masasakop ng iminumungkahing condonation.

“Ito ay maghihikayat sa kanila na sumunod sa mga batas at magpatuloy sa pagbabayad ng kanilang mga kontribusyon para sa kanilang mga kasambahay,” sabi ni Estrada. Ernie Reyes