MANILA, Philippines – Todas ang isang murder suspek matapos na piliin nito na manlaban sa mga tauhan ng Quezon City Police District (QCPD) na aaresto sa kanya kagabi sa nasabing lungsod.
Ayon kay QCPD Director, PBGEN Remus Medina, namatay noon din ang suspek na nakilalang si Rogelio Francisco Mata, 42 anyos, residente ng Block 5 Lot 8, Bistekville 5, Brgy. Payatas B, Q.C.,
Sa ulat ng Criminal Investigation and Detection Unit ng Quezon City Police District (CIDU-QCPD), pasado 7:00 ng gabi (March 27), nang maganap ang insidente sa loob mismo ng tahanan ng biktima sa nasabing barangay.
Sa imbestigasyon ni PSSg Nido Gevero Jr., ng CIDU, nagsagawa ng follow-up operation ang mga operatiba ng Novaliches Police Station (PS 4), kaugnay sa naganap na shooting incident bandang 4:30 ng hapon noong March 22, sa No. 8 Villareal St., Brgy. Gulod, Novaliches, kung saan ay napatay ang biktimang si Kevin Delaveres ng dalawang hindi kilalang lalaki.
Sa isinagawang operasyon ay naaresto ng PS 4 na pinamumunuan ni PLt. Col. Richard Ian Ang ang isa sa mga suspek na nakilalang si Arturo Dongil Borces.
Agad namang itinuga ni Borces ang kasama niya sa pamamaril na si Mata at sinabi kung saan ito matatagpuan.
Nang makuha ng mga awtoridad ang address ng tahanan ni Mata ay agad na silang nagtungo doon pero hindi pa man sila nakakalapit sa bahay ay pinaputukan na sila ng suspek.
Dahil dito ay agad nagkubli ang mga operatiba ng PS 4 at gumanti na rin ng putok ng baril na nagresulta sa pagkamatay ni Mata.
Nasamsam ng SOCO na pinamumunuan ni PSMS Federico Manzano sa crime scene ang (1) caliber 45 LLAMA pistol; (1) caliber 45 fired cartridge case; (3) fired cartridge cases; (1) deformed fired bullet; (1) fired bullet; (2) pieces of used foil, at dalawang lighter.
Nakapiit na ang suspek na si Borces habang inihahanda ang kasong isasampa laban sa kaniya.
