MANILA, Philippines – Isiniwalat ni Interior and Local Government Secretary Benhur Abalos ang apat na miyembro ng five-man committee na magrerepaso sa courtesy resignations ng Philippine National Police (PNP) senior officials.

Ang apat na miyembro ay sina Baguio City Mayor Benjamin Magalong, PNP chief Police General Rodolfo Azurin Jr., former Defense chief Gilbert Teodoro, at Undersecretary Isagani Neres mula sa Office of the Presidential Adviser on Military Affairs.

Ang huling miyembro ng five-man committee ay nakiusap na huwag muna siyang pangalanan.

Matatandaan na noong Enero 4 ay umapela si Abalos sa mga senior PNP official na magsumite ng kanilang courtesy resignation bilang bahagi ng cleansing ng pamahalaan at sa ahensya, kontra sa illegal drug trade.

Kahapon, Enero 31 ang huling araw ng pagpapasa ng kani-kanilang mga resignations.

Samantala, rerepasuhin din ng National Police Commission ang mga pangalan ng police officers kung saan tinanggap na ang pagbibitiw sa tungkulin. Kris Jose

Manila, Philippines – Teary eyed at very emotional ang dating GMA-7 Artist Center talent na si Barbara Miguel sa media launch ng Marikit Artist Management, ang bagong nagma-manage sa kanyang career.

Nag-throwback kasi si Barbara sa kanyang personal problem na pinagdaanan nila ng kanyang pamilya noong 2020, na naging dahilan din ng pag-alis niya sa GMA-7.

Sinabi ni Barbara na nagsimula siya sa Kapuso noong 2011 when she was 8 years old. Napanood siya sa maraming projects as a child actress tulad ng Munting Heredera and Biritera among others.

Noong 2013 ay nanalo siyang Best Actress sa Harlem International Film Festival for the movie, Nuwebe.

Ten years ang pinirmahan niyang kontrata sa GMAAC noong 8 years old pa lang siya at magtatapos sana ito ng taong 2022.

Pero last 2020 ay pina-terminate na nila ito dahil nagkaroon sila ng matinding family problem.

“Year 2019 was a very hard year not just because of my career. Everything was just family issues,” kuwento ni Barbara.

Bumalik dae sila sa Davao na siyang hometown nila and then the pandemic happened.

Naging maayos naman daw ang paalaman nila ng GMA-7 at wala silang bad blood and in fact, masaya raw ang network para sa kanya.

Ngayon ay nagsisimula muli si Barbara sa bago niyang management at open daw siyang magtrabaho sa kahit saang network.

Bukod kay Barbara, ang iba pang talents ng Marikit ay ang dati ring child actress na si Kyle Ocampo, Chinita charmer Angelika Santiago, Starstruck Alumni Jeremy Luis, pageant king Charles Angeles at ang boy band na Masculados.

Marikit Artist Management is owned and managed by CEO Jojo Aleta and partners Melai, Yannie, Tristan and Eboy. JP Ignacio

Manila, Philippines- Ang suwerte ni Dominic Roque dahil pinagtanggol siya ni Bea Alonzo. Ang pamangkin ni Beth Tamayo na si Dom na nga marahil ang huling lalaki sa buhay ni Bea. Sinabi pa ni Bea sa isang panayam na hindi siya tumitingin sa estado ng isang lalaki.

Aba, ang laki ng farm ni Bea sa Zambales, meron siyang row of aprtments sa Madrid, Spain at may kontrata siya sa GMA7 na sinasabing siya ngayon ang highest earner among the Kapuso actresses.

Si Dominic naman, sa true lang naman, ay may mga negosyong napundar bagama’t ‘di siya masyadong aktibo sa syobis.

Ang importante, magkasundo sila ni Bea. Kitang kita naman ang mga sweet moments ng dalawa sa kanyang posts sa social media.

Hmmmp, kailan kaya magpo-propose ng kasal si Dom kay Bea? Favatinni San

MANILA, Philippines- Tuloy na tuloy na ang official working visit ni Pangulong Ferdinand Marcos Jr. sa Japan, mula Pebrero 8 hanggang 12, 2023.

Ang Japan para sa Malakanyang ay isa sa dalawang strategic partners ng Pilipinas.

Ito ay itinuturing na mahalagang “trade at investment partner” ng bansa.

Sa pre-departure briefing sa Malakanyang, sinabi ni DFA Assistant Secretary Nathaniel Imperial na ang byahe ng Chief Executive patungong Japan ay tugon sa imbitasyon ni Japan Prime Minister Fumio Kishida.

Ito ang kauna-unahang pagbisita ng Pangulo sa Japan simula nang maupo ito sa puwesto bilang halal na Pangulo ng bansa.

Kinokonsidera naman ng DFA ang pagbisita na ito ng Pangulo sa Japan bilang “consequential.”

Ang Japan pa rin ang unang bansa kung saan nabuo ang “strategic partnership” ng bansa at tanging isa sa dalawang strategic partners ng Pilipinas, ang isa ay ang bansang Vietnam.

Ang Japan din ang tanging bansa kung saan mayroong bilateral free trade agreement ang Pilipinas na tinawag na PH-Japan Economic Partnership Agreement.

Taong 2021, ang Japan ang “second largest trading partner” ng bansa, ang Pilipinas rin ang itinuturing na “third largest export market” at “second top source of imports.”

Ang Japan ay naging “biggest bilateral source” ng bansa pagdating sa aktibong official development assistance (ODA), nagbibigay ng concessional loans para tustusan ang mahalagang infra at capacity building projects, social safety net programs, education, agriculture at science and technology support, at maraming iba pang “high impact programs.”

Ang official working visit na ito ng Pangulo ay inaasahan na mapagtitibay at mas magpapasigla sa relasyon sa pagitan ng dalawang bansa.

Layon nito na mapalawak pa ang full potential ng PH-Japan strategic partnership sa lahat ng aspeto at mapabilis ang “closer defense, security, political, economic, and people to people ties.”

“During the visit, we anticipate the signing of seven key bilateral documents or agreements covering cooperation in infra development, defense, agriculture and information and communciations technology- areas that are in president’s priority agenda,” ayon kay Imperial.

Samantala, makakasama naman ng Pangulo sa byaheng Japan nito sina Unang Ginang Marie Louise “Liza” Araneta Marcos, dating Pangulong Gloria Macapagal Arroyo, Senate President Juan Miguel Zubiri, House speaker Martin Romualdez, Secretary for foreign affairs enrique manalo, finance secretary benjamin diokno, Trade and industry alfredo pascual, energy sec rafael lotilla, tourism secretary cristina frasco, special assistant to the President Antonio Lagdameo Jr. and Secretary Cheloy Garafil at iba pang cabinet officials at underseceratries na magiging bahagi ng kanyang official delegation. Kris Jose

MANILA, Philippines- Binalaan ni Makati City Mayor Abby Binay ang mga fixers na naglipana at gumagala sa city hall na tumigil sa kanilang ilegal na gawain matapos madakip sa ikinasang entrapment ang tatlo sa mga suspects kung saan ang dalawa dito ay mismong empleyado ng lokal na pamahalaan.

Kinilala ni Binay ang mga inarestong suspects na sina Wilfreda De Leon, 59, regular na empleyado sa city hall bilang Administrative Assistant II; Merlin Balbuena, 46, casual employee na nakatalaga sa Health Department Sanitation Section; at Aisheen Mana-ay, 27, empleyado ng isang pribadong establisimiyento.

Sa pagkakaaresto kay De Leon ay hindi na niya matatangap ang benepisyo sa kanyang pinagtrabahuhan sa city hall.

“The city government will not tolerate fixers. We will continue to aggressively implement our anti-red tape initiatives to ensure that all transactions with the government are done in a transparent and fair manner,” ani Binay.

Base sa report na tinanggap ni Makati police chief P/Col. Edward Cutiyog, ang pagsasagawa ng operasyon ay bunsod sa kanilang natanggap na impormasyon sa talamak na nangyayaring ilegal na transaksyon ng mga empleyado ng city hall sa Makati Business Permits and Licensing Office (BPLO).

Agad na kumilos ang pulisya at ang unang nalambat sa inilatag na entrapment operation ay si Mana-ay na nadakip dakong alas-5:30 ng hapon matapos magpanggap ang isang babaeng pulis bilang kliyente ng suspect.

Humingi diumano si Mana-ay ng P500 kapalit ng mabilis na pagpoproseso ng dokumento at nang tanggapin ni Mana-ay ang nabanggit na halaga ay dinakma na ito ng mga operatiba.

Sa pagsasailalim ng interogasyon ni Mana-ay ay inginuso nito si De Leon na siyang nag-utos sa kanya na tumanggap ng pera.

Sa pagsasagawa ng follow-up operation ay nadakip naman si De Leon dakong alas-7 ng gabi sa Makati City Hall Building 2 kung saan narekober sa posesyon ng suspect ang P500 bill, 88 piraso ng tig-P1,000 na entrapment money, tatlong pirasong P500 boodle money at isang kulay itim na Cherry Mobile tablet.

Samantala, si Balbuena ay inaresto naman sa isinagawang entrapment operation dakong alas-7:40 ng gabi sa harap ng 7-Eleven na matatagpuan sa J.P. Rizal Avenue matapos makatanggap muli sila ng impormasyon ng mga naglipanang fixers sa labas ng Makati City Hall Building 2.

Nakuha naman sa posesyon ni Balbuena, na nanghihingi diumano ng P600 kapalit ng mabilis na paglabas ng dokumento, ng isang pirasong P1,000, 49 pirasong P1,000 boodle money at 41 accomplished health certificates.

Nahaharap ang mga suspects sa kasong paglabag sa RA 11032 o Ease of Doing Business and Efficient Government Service Delivery Act of 2018 sa Makati City Prosecutor’s Office. James I. Catapusan