NCAP, LIGAL NA LIGAL BANG PANGINGIKIL?

NCAP, LIGAL NA LIGAL BANG PANGINGIKIL?

September 1, 2022 @ 3:42 PM 1 month ago


ANG daming natuwa sa aksyon ng Supreme Court na patigilin pansamantala ang operasyon ng non-contact apprehension policy ng Metro Manila Development Authority at mga lokal na pamahalaan ng Kalakhang Maynila.

Bagama’t marami ang naibunga na maganda ito, lumitaw naman ang mga pangit na bunga nito.

At kung pagkumparahin ang mga bunga nitong maganda at pangit, tila higit na nangingibabaw ang pangit.

At nakatatakot na magbubunga ito ng hindi maganda.

MAGANDANG BUNGA

Isa sa naging kapuna-puna, mga Bro, na magandang bunga nito ang pagkakabawas ng mga nangingikil sa mga kalsada, may kasalanan man o wala ang mga tsuper.

Maganda ring makita na natutunang sumunod sa mga batas sa trapiko ang marami at maging ang mga barumbadong tsuper ay nabawasan ang masamang asal ng mga ito.

Nababawasan din ang dami ng pinasusuweldo ng MMDA at mga local government unit.

At kung kumita ang MMDA at mga lokal na pamahalaan, gayun na lamang din para sa mas mabuti umanong serbisyo nila dahil paldo sa salapi ang kanilang mga baul.

Dapat nating makita kung gaano kalaki ang kinikita ng mga lokal na pamahalaan sa paggamit ng NCAP kapalit ng kontrata nilang umaabot sa daan-daang milyon o lagpas sa bilyong piso.

ANG MGA NGETPA NA BUNGA

Habang ikinatutuwa ng iba na nababawasan ang mga hulidap na pulis at traffic enforcer, mismo na ang MMDA at mga LGU mismo ang nakikitang mga holdaper.

Ito’y dahil libo lagi ang halaga na sinisingil ng MMDA at mga LGU sa mga nahuhuli ng kanilang mga NCAP.

Ang isang napakasama rin dito, wala ni anomang paraan ang mga ordinaryong mamamayan para kwestiyunin ang paghuhukom ng mga may-ari at may hawak ng mga NCAP na ikinakalat sa buong Metro Manila.

Para pa ngang sinasadya na gawing depektibo ang mga CCTV dahil halos wala nang yellow light at bigla at napakabilis na magpalitan ang green at red.

Hindi na mabilang sa daliri ang mga umiiyak sa laki ng multa na kanilang binabayaran kahit depektibo ang mga traffic light na dahilan ng pagsasabing mga traffic violator ang mga ito.

Marami na rin ang nadidisgrasya sa bilis ng palitan ng green at yellow lamang na nagpapalitan sa mga traffic light dahil sa biglaang mga pagpreno o pag-atras o mabilisang pagtakdo sa gitna ng lansangan.

GUTOM AT GALIT

Ang nakatatakot, mga Bro, hindi malayong mangyari na magkaroon ng mga patayan mismo sa pagitan ng mga mamamayan at mga traffic enforcer at pulis dahil sa pagiging pahirap na ang mga NCAP sa kanila.

Katunayan, marami na ang malayo ang loob o galit sa pamahalaan na mga motorista, negosyante at mismong mamamayan dahil sa NCAP dahil pinagmumulan na ito ng gutom sa mga naghahanapbuhay sa kalsada.

Ang kung magutom ang tao sa ligal na malakihang pangingikil ng pamahalaan sa bisa ng NCAP, saan nga tayo patutungo?

Sana naman, hindi pagmumulan ang NCAP ng hindi masukat na kaguluhan.

Napakapangit tingnan na magdadarahop ang milyones na mamamayan habang ikinayayaman ito ng pamahalaan at mga kasosyo nila sa NCAP.