MABABANGIS ang mga kawatan sa kalsada.

Wais naman ang mga kawatan sa online.

Pero sa kabuuan, pareho silang mga perwisyo sa maraming tao at sa bayan.

Tingnan ninyo, mga Bro.

KUMITIL NG BUHAY

Sa San Ildefonso, Bulacan, pinatay kamakailan si San Miguel, Bulacan Chief of Police Police Lt. Col. Marlon Serna ng dalawang kawatang riding-in-tandem.

Nangyari ito makaraang pangunahan ni Serna ang kanyang mga tauhan upang dakpin ang nagnakaw sa isang mag-asawa sa Brgy. San Juan, San Miguel.

Pagdating nila sa lugar na roon nabaril ang lalaking biktima ngunit nakataga naman sa isang suspek, napag-alaman nina Serna na tumakas patungong San Ildefonso ang mga suspek sakay ng motorsiklo at naabutan nila ang mga ito sa Brgy. Bohol na Mangga.

Anak ng tokwa, nang magkahintuan at magkatapat na ang riding-in-tandem at ang sasakyan ni Serna, dito na pinaputukan sa ulo si kernel.

Ganyan katindi kung mamerwisyo ang mga hinayupak na kawatan sa lupa.

MAY MAMAMATAY PA

Armado at mapanganib ang riding-in-tandem.

Maayos at magaling ang kanilang armas at kung bumira sila, tumbok na tumbok nila ang target.

Anoman ang katauhan ng mga ito, maaaring sa mga susunod na engkwentro sa pagitan nila at mga awtoridad, posibleng magiging madugo ito.

Pero sana naman hindi.

Pero ilagay na lang sa pinakamasama ang kalagayan dahil nga tiyak na hindi mangingiming gumamit ng pwersa ang mga awtoridad kung papalag nang armado ang mga killer ni Serna at nagnakaw sa mag-asawang taga-San Miguel.

Maalala ko pala, dapat bigyan ng police protection ang mag-asawa na biktima ng pagnanakaw dahil baka balikan sila.

MGA KAWATAN SA ONLINE

May mga nahuli ang National Bureau of Investigation na nagbebenta ng verified na account sa Gcash na paraan ng pagnanakaw sa online.

May iba pang gumagamit ng phising o hacking sa mga ATM at bank account ng iba at pagkatapos manghingi nang manghingi sa iba ng mga cash.

Napakarami na, mga Bro, ang nabiktima rito dahil lahat ng miyemabro ng organisasyon kinasasapian ng taong kanilang naha-hack, ay nahihingan nila ng malalaking halaga.

MAGBANTAY, LUMABAN

Dapat magbantay sa pamamagitan ng pagberipika sa katauhan ng sinomang nanghihingi ng kung ano-ano, kasama ang mga sikretong pin o password ng mga ATM card o account sa mga bangko.

Maganda ring ikumpirma muna sa ibang tao ang panghihingi ng iba, lalo na ang cash, o ikumpirma sa ibang anyo ng komunikasyon mismo sa nanghihingi ang bagay na ganito.

Huwag na huwag basta magbigay ng salapi sa online at lumaban kung kaya sa mga kawatan sa kalsada, akyat bahay at iba pa.  

PINAWALANGSAYSAY ng International Criminal Court ang kahilingan ng pamahalaan ng Pilipinas na ipagpaliban ang imbestigasyon at sa kalauna’y paglilitis sa tinatawag nilang extrajudicial killing noong panahon ni ex-President Mayor Digong Duterte.

Itong pinaggagagawa ng ICC na ito, eh, isang napakalaking kaipokritohan at kinakaya-kaya lang nito ang maliliit na bansa tulad ng Pilipinas.

Sa Mexico na lamang na may pinakamatinding problema sa droga at ginagamit ang buong pwersa ng pamahalaan para madurog ang drug cartels, may 350,000 na ang patay.

Nagsimula ang drug war doon noong 2006 sa ilalim ni President Felipe Calderon at nang umalis ito, meron nang 40,000 patay at nagpatuloy ang giyera hanggang umabot na nga sa 350,000 ang namatay.

Nasaan ang ICC rito? Wala lang kahit pa miyembro ang Mexico ng ICC.

Ang United States na napakarami ang pinakikialamang bansa at napakaraming pinapatay ng mga sundalo nito, nasaan ang ICC?

Eh hindi naman daw miyembro ang US ng ICC.

Pero pagdating sa Russia na hindi rin miyembro ng ICC, nag-isyu ang ICC ng warrant of arrest laban kay Russia President Vladimir Putin dahil pagpapapasok ng 16,000 bata sa loob ng Russia.

Mali raw ang katwiran ni Putin na inilayo ang mga bata sa bangis ng digmaan at para hindi sila madamay. Ano?

Kita n’yo kung gaaano kaipokrito ang ICC?

Ngayon, mga brad, gusto nilang imbestigahan ang giyera sa droga ni Tatay Digong at hindi naman umano nila pakikialaman ang imbestigasyong isinasagawa ng pamahalaan.

Neknek ng mga ICC na ito. Eh paano kung hindi magkakatugma ang ending ng mga imbestigasyon, sino ang dapat na masunod?

Isa pa at mas mahalaga, gumagana ang sistemang hustisya sa bansa at pinutol na ng Pinas ang ugnayan nito sa ICC.

Labag na sa soberenya o kapangyarihan ng Pilipinas na mamahala sa sarili nito ang pakikialam ng ICC na isang dayuhang organisasyon.

Sabi ni Manong Johnny Enrile, kung ako ang Pangulo, ipaaaresto ko ang sinomang taga-ICC na papasok sa Pinas para mag-imbestiga at maglitis ng Pinoy.

TUMPAK ang mga senador sa hindi pagpabor sa itinutulak ni Sen. Sherwin Gatchalian na pagpapasara sa mga Philippine Offshore Gaming Operators o POGOs.
Nabigo kasi si Gatchalian, tagapangulo ng Senate ways and means committee, na makakuha ng suporta sa kanyang minamadaling committee report na nagrerekomenda nang tuluyang pag-ban sa POGOs sa bansa.

Kailangan ni Gatchalian ng mga pirma ng mga kapwa senador bago makalusot sa plenaryo ng Senado ang kanyang report. Sa ngayon, pito lang ang sumang-ayon dito. Bakit kaya hindi makakuha ng maraming kakampi ang mambabatas?

Si Senate Deputy Majority Leader JV Ejercito, na hindi pumirma sa committee report ni Gatchalian, ay nag-aalala sa maaaring maging epekto at implikasyon nang agarang pagpapasara sa POGO.

Kabilang dito ang mga mawawalang trabaho ng mga Pilipino at kita ng pamahalaan mula sa POGO taxes.

Sinabi ni Ejercito na pinag-aralan namang mabuti ng Kongreso ang pagpapasa ng isang batas para maging ligal ang operasyon ng industriya sa Pilipinas. Sa katunayan, may investors na namuhunan sa POGO.

Para sa senador, maling senyales ang maaaring makarating sa international community kung agad-agad na ipasasara ang POGOs. Sabi nga niya, “Ano na lang ang sasabihin nila (ibang bansa) sa ating mga batas at polisiya?”

Bantulot din sa paglagda maging sina Senators Jinggoy Estrada at Imee Marcos (kapatid ni Pangulong Bongbong Marcos) sa inilalako ni Gatchalian na committee report.

Dahil hindi nakasulot sa last day ng Senate session ang committee report, nag-privilege speech na lang si Gatchalian para raw “maging aware” ang ibang senador sa masamang epekto ng OGOs.

Masyado naman yatang minamaliit ni Gatchalian ang kanyang mga kasama.

Eh, inulit lang naman ni Gatchalian ang mga nasagot na dati sa Senate hearings na POGO issues tulad daw ng krimen at hindi pagbabayad ng tamang buwis.

Iniulat ng Philippine National Police kamakailan lang na wala halos POGO-related crimes sa bansa.
Pati ang Bureau of Internal Revenue ay nagsasabi na nakapag-aambag sa government income ang POGO industry lalo’t mahina pa rin ang takbo ng ibang negosyo na naapektuhan ng pandemya dati.

Eh ano bang problema ni Gatchalian at gigil na gigil siya sa POGO?

MAAARING mahirapan ang Bureau of Customs na kunin ang tiwala ng publiko kahit sino pa ang maupong commissioner nito dahil sa mga balitang lumalabas na hindi nito kayang sugpuin ang smuggling sa bansa.

Marahil isang dahilan na rin nito ay ang pilit na pagpapaganda ng imahe ng naturang tanggapan mg sinomang nauupong hepe nito at panay ang panghuhuli ng mga smuggler subalit hanggang ngayon ay wala pa ring naipakukulong na big-time smugglers.

Maraming beses na nagkaroon ng pagdinig sa Senado at Kongreso sa mga naganap na pagpupuslit o papasok ng iba’t ibang produkto sa bansa, hindi lang mga imported na sasakyan, alahas at iba pang mamahaling gamit, kundi lalo na ang mga produktong agrikultura.

Pangunahin na nga rito ang bigas, asukal, bawang, sibuyas, imported na isda at iba pa na dahilan upang malugmok sa kumunoy ng kahirapan ang mga kawawang magsasaka at mangingisda.

Kaya nga nang ilatag ng bagong upong Commissioner na si Bienvenido Rubio ang kanyang mga plano at programa na ayon sa kanya ay nakalinya sa direktiba ni Pangulong Bongbong Marcos, Jr. at
tiyak na susugpo sa talamak na smuggling, kaya humanga at pinuri siya ni Finance Secretary Benjamin Diokno.

Sa isang programa sa radyo, isa-isang ipinaliwanag ni Rubio ang kanyang mga plano at programa subalit mukhang hindi nabenta ang kanyang pangako dahil karamihan ay nagsabing ipinangako na rin ang mga ‘yun ng mga naunang commissioner.

Malinaw na sawa na talaga sa pangako ang mamamayan at nawawalan na rin ng pag-asang titino pa ang ahensiya subalit hindi nawalan ng loob si Rubio at sinabing isang buwan pa lang siya sa kaya abangan na lang ang kanyang gagawing mga pagbabago bago siya husgahan.

Kung sabagay, sa loob ng isang buwang panunungkulan ni Rubio, sunod-sunod na ang ginawang raid at pagkumpiska sa mga ipinuslit na produktong agrikultura na senyales na seryoso ang kanyang pamunuan na sugpuin ang talamak na smuggling sa bansa.

Kaya lang, sa mga pagsalakay sa mga bodega at pagkumpiska sa mga puslit na produkto, wala isa man ang nahuli o nababanggit na pangalan na responsable sa iligal na gawain kaya marami ang nagtaas ng kilay.

Pero ayon kay Rubio, antay lang, darating din daw siya sa puntong ‘yan.

PATULOY na nakararanas ng kakulangan sa suplay ng tubig ang karamihan sa mga lugar sa bansa lalo na ngayong Kuwaresma kung saan matagal nang pasanin ng mga magsasaka lalo na sa walang irigasyon na mga sakahan.

Mismong si Pangulong Bongbong Marcos na kasalukuyan din na Kalihim ng Department of Agriculture ang nagsabing kailangan pa magpagawa ng maraming water impounding facilities upang maibsan ang suliraning ito para tuloy-tuloy na makapagtanim ang nakararaming kababayang umaasa ng patubig sa gobyerno.

Ibig sabihin,matagal nang hindi natutugunan ng pamahalaan ang problemang ito na pinaniniwalaang isa lang sa dahilan kung bakit hindi bumababa nang husto ang presyo ng bigas sa merkado dahil na rin sa hindi pa rin naisasakatuparan ang malawakang ani ng palay.

Bagaman itinuturong ang mataas na ‘inflation rate’ at napakamahal ng presyo ng abono dulot ng walang humpay na pagsirit ng produktong petrolyo sa pandaigdigang merkado ang salarin nang patuloy na tumataas na presyo ng pangunahing bilihin kabilang na ang bigas subalit ang kakulangan ng suplay ng tubig ang inirereklamo pa rin ng magsasaka na sadyang nakaka-apekto sa pagtatanim nila.

Sa usapin naman ng ‘potable water’, higit na lumalala ngayon ang kakulangan ng suplay nito lalo na sa malalaking siyudad bunsod sa bumababa na rin ang level ng malalaking tangkeng pinagkukunan ng tubig.

Sa Maynila pa lang, may nakaambang water interruptions na dahil na rin sa hindi kayang suplayan ng malalaking kompanya ng water utulities ang nakararaming ‘consumer’ nito.

Ilang bayan lang ba sa bansa ang may sapat na suplay ng tubig na nagmumula naman sa mga proyektong ipinatayo ng gobyernong karamihan ay sa mga liblib na lugar at nagtitiyaga pa rin sa balon ng bawat pamamahay?

Sa isinagawang Water Conference sa New York kamakailan lang,hinikayat ni Department of Environment and Natural Resources Secretary Maria Antonia Yulo-Loyzaga ang mga dumalo na kailangan palakasin ng bawat isa ang hakbang upang matugunan ang suliraning ito at agarang masolusyunan ang lumalalang water crisis sa sanlibutan.

Mismong si PBBM din ang nanawagan sa sambayanan na magtipid sa paggamit ng tubig upang maibsan ang nararanasang kakulangan nitong pinaniniwalaang ang labis na pang-aabuso sa kalikasan pa rin ang ugat ng lahat kabilang na ang walang habas na pagpuputol ng mga punongkahoy at pagkakalbo ng kabundukang nagsisilbing pinakamalaking tangke ng tubig mula naman sa ulan.

Hindi pa ang paglarga ng ‘open pit mining’ sa bansa ang ugat ng pagtabas ng mga kabundukan dito?