Night differential pay sa gov’t employees, GOCCs aprub kay PDu30

Night differential pay sa gov’t employees, GOCCs aprub kay PDu30

May 16, 2022 @ 6:32 PM 2 months ago


MANILA, Philippines – Nilagdaan na ni Pangulong Rodrigo Duterte ang panukalang batas na magbibigay ng night shift differential pay sa mga empleyado ng gobyerno kabilang ang mga nasa Government Owned or Controlled Corporation (GOCC).

Sa ilalim ng Republic Act 11701, lahat ng mga kawani ng gobyerno ay dapat bayaran ng night shift differential nang hindi lalampas sa 20% ng kanilang hourly basic rate.

Sakop niyo ang division chiefs pababa, kabilang ang mga nasa GOCC anuman ang kanilang katayuan sa trabaho, mapa-permanente, kontraktwal o casual employee.

Tutukuyin ng pinuno ng ahensya ang night differential pay, para sa kada oras ng pagtatrabaho nito sa pagitan ng alas-6:00 ng gabi hanggang alas-6:00 ng umaga ng kinabukasan.

Hindi naman sakop ng nasabing batas ang:

  • Mga empleyado ng gobyerno na ang oras ng pasok sa trabaho ay tatapat sa pagitan ng alas-6:00 ng umaga hanggang alas-6:00 ng gabi

  • Mga empleyado ng gobyerno na required ang kanilang serbisyo o on call 24 hours gaya ng mga uniformed personnel ng Armed Forces of the Philippines (AFP), Philippine National Police (PNP), Bureau of Jail Management and Penology (BJMP), Bureau of Fire Protection (BFP), at iba pang kahalintulad na sitwasyon na maaaring tukuyin ng Civil Service Commission (CSC) at ng Department of Budget and Management  (DBM).

Ilalabas ng CSC, sa pakikipagtulungan ng DBM, ang guidelines para sa paglalabas ng night differential pay. RNT/ JCM