JAPAN – Patay ang walo katao kabilang ang anim na Chinese national sa lumubog na barko sa dagat na sakop ng Japan.

Ito ang ibinahagi ng isang Chinese diplomat at Japanese coast guard nitong Huwebes, Enero 26.

Sa impormasyon, nagpadala ng distress signal ang Jin Tian sakay ang mga crew mula China at Myanmar nitong Martes ng gabi sa lokasyon nito na 110 kilometro kanluran ng Danjo Island, southwestern Japan.

Gumamit naman ng satellite phone ang kapitan ng barko upang sabihin sa South Korean coast guard na aalis na ito at ang kanyang mga crew dahil lumulubog na ang sinasakyan ng mga ito.

Nakibahagi naman ang iba’t ibang barko at eroplano ng Japan coast guard para sa paghahanap sa mga ito, na kalaunan ay nakita ang 13 crew members.

Tumulong din ang tatlong pribadong barko sa lugar para sagipin ang lima pang stranded crew members.

Sinabi naman ng China consul general sa Fukuoka na si Lu Guijun, na sa 13 crew members na natagpuan, walo sa mga ito ang kumpirmadong nasawi.

“Five of them — including four Chinese crew members — are not in life-threatening conditions,” dagdag ni Guijun.

“We express our deepest condolences to the unfortunate victims.”

Kinumpirma rin ng Japanese coast guard na kasama ng 6 na Chinese crew member na nasawi, dalawa naman ang mula sa Myanmar.

Mayroon pang 9 katao ang patuloy na pinaghahanap, apat mula sa China at lima mula sa Myanmar.

Nagpaabot naman ng pakikiramay ang mga opisyal mula sa local Chinese mission sa pamamagitan ng pagdadala ng bulaklak.

Binisita rin ng mga ito ang mga survivors na sinabing tutulungan sa pamamagitan ng pagbibigay ng kasuotan, pagkain at inumin.

Ang 6,651-ton Jin Tian ay nakarehistro sa Hong Kong.

Matatandaan na noong 2020, isang cargo ship din na may sakay na 43 crew at 6,000 baka ang lumubog sa dagat na sakop ng southwestern Japan dahil naman sa bagyo. RNT/JGC

CHINA – Dose-dosenang demonstrador ang nakakulong pa rin sa China makaraang makilahok sa serye ng mga kilos-protesta laban sa pamahalaan noong nakaraang taon dahil sa panawagan na itigil na ang matinding paghihigpit kontra COVID-19.

Ayon sa ulat ng Human Rights Watch nitong Huwebes, Enero 26 hindi pa tukoy ang kinaroroonan ng ilan sa mga nakakulong.

Matatandaan na noong Nobyembre ay nagkasa ng malawakang kilos-protesta sa iba’t ibang lungsod sa China para ipanawagan na itigil na ang malupit na zero-COVID restrictions na kalaunan ay inalis din ng pamahalaan.

Sa kabila nito, iniulat na palihim na hinuhuli ng mga awtoridad sa China ang mga sumali sa pagkilos, kabilang dito ang mga estudyante at mga mamamahayag.

Dahil dito ay nanawagan ang Human Rights Watch sa Beijing ng agarang pagpapalaya at pag-alis sa lahat ng mga kasong inilatag laban sa mga lumahok sa ‘white paper’ protests.

“Young people in China are paying a heavy price for daring to speak out for freedom and human rights,” ani Yaqiu Wang, senior China researcher sa naturang US-based NGO.

“Governments and international institutions around the world should show support and call on the Chinese authorities to release them immediately.” RNT/JGC

MANILA, Philippines – Natagpuang wala nang buhay sa loob ng room ng isang hotel sa New York City ang isang Pinay sa ulat ng Department of Foreign Affairs nitong Biyernes, Enero 27.

Ayon kay DFA spokesperson Teresita Daza, nabatid ng Philippine Consulate General sa New York ang ulat na mayroong natagpuang katawan sa isang hotel sa lungsod na ipinaabot ng Office of the Chief Examiner.

Sa ngayon ay hindi pa alam kung ano ang sanhi ng pagkamatay ng Pinay.

Samantala, naipagbigay-alam na sa pamilya ng biktima ang nangyari kasabay ng tulong na ibibigay ng pamahalaan sa mga ito. RNT/JGC

MANILA, Philippines – Dadaan malapit sa mundo ang asteroid na kasinlaki ng truck, maituturing na isa sa naitalang pinakamalapit na pagdaan nito sa planeta.

Sa kabila nito, nilinaw naman ng NASA na wala itong banta sa bansa.

Ayon sa NASA, ang Asteroid 2023 BU, na kamakailan ay nadiskubre ng isang amateur astronomer ay lalapit sa timog na bahagi ng South America bandang alas-4:27 ng hapon ng Huwebes, Enero 26 o 8:27 ng umaga ng Biyernes, Enero 27 oras sa Pilipinas

Dadaan ito 2,200 milya o 3,600 kilometro ang layo mula sa mundo, mas malapit kaysa sa mga geostationary satellites na nakapaligid sa planeta.

Sa kabila na walang banta ng pagtama nito sa mundo, posible ayon sa NASA ang maliliit na meteorites na madudurog sa atmospera dahil sa laki ng asteroid na ito na nasa 3.5 metro hanggang 8.5 metro.

Ang naturang asteroid ay nadiskubre noong Sabado, Enero 21 mula sa isang observatory sa Crimea ni amateur astronomer Gennadiy Borisov.

Sinundan ito ng serye ng pag-obserba sa iba’t ibang bahagi ng mundo.

“Despite the very few observations, it was nonetheless able to predict that the asteroid would make an extraordinarily close approach with Earth,” sinabi naman ni Davide Farnocchia ng NASA.

“In fact, this is one of the closest approaches by a known near-Earth object ever recorded.” RNT/JGC

Germany – Patay ang dalawang tao habang sugatan ang iba pa sa isang pananaksak sa tren sa bansang ito.

Ang mga pananaksak ay nangyari sa isang tren na naglalakbay sa pagitan ng mga lungsod ng Hamburg at Kiel, sinabi ng tagapagsalita ng federal police force.

Ang suspek ay dinala sa kustodiya sa istasyon ng tren sa bayan ng Brokstedt. RNT