MANILA, Philippines – Siniguro ng Department of the Interior and Local Government (DILG) nitong Miyerkules, Marso 29 na naka-full alert status ang Philippine National Police (PNP), Bureau of Fire Protection (BFP), at local government units (LGUs) sa buong bansa sa Semana Santa, o mula Abril 2 hanggang 8.

Ito ay upang siguruhin umano ang seguridad at kaayusan sa paggunita ng Semana Santa.

Ayon kay DILG Secretary Benjamin Abalos Jr., ipinag-utos na niya sa PNP, BFP, at LGUs na maglatag ng mga hakbang upang masiguro ang kaligtasan ng mga Filipino, sila man ay mananatili sa bahay o magbabakasyon sa ibang lugar.

“Sa pangunguna ng PNP ay paiigtingin natin ang police visibility sa buong bansa, lalong-lalo na sa mga identified areas of convergence tulad ng malalaking simbahan, pilgrim sites, terminal, pantalahan, at paliparan pati na rin sa mga mall at iba pang pasyalan,” pahayag ni Abalos.

Aniya, makikipag-ugnayan ang pulisya sa mga LGU sa pagbabantay at paglalatag ng checkpoint sa mga lugar na itinuturing na “hotspots” sa political violence, habang ang BFP naman ay tutulong sa insidente ng mga sunog.

“Pinaalalahanan din ang mga biyahero na siguraduhing walang nakasaksak na appliance bago umalis ng bahay upang makaiwas sa sunog,” abiso ni Abalos.

Pagpapatuloy, makikipagtulungan din ang mga LGU sa traffic enforcers at community watchmen sa inaasahang dagsa ng mga turista sa lugar na nasasakupan.

“Makakaasa ang publiko na handa ang DILG kasama ang PNP, BFP, at LGUs. Kaisa n’yo po kami sa paggunita sa Semana Santa at sa panalangin para sa patuloy na kaligtasan at kaginhawahan para sa ating bansa,” pagsisiguro ni Abalos. RNT/JGC

MANILA, Philippines – Posibleng maipit ang Pilipinas kung magmamatigas ang pamahalaan na makipagtulungan sa ICC sa imbestigasyon kaugnay ng anti-drug war campaign ng Duterte administration.

Ayon kay Registered International Criminal Court (ICC) Assistant to Counsel Atty. Maria Cristina Conti, kapag hindi nakipagtulungan ang pamahalaan ay tatamaan din kung sinuman ang target ng imbestigasyon dahil hindi na niya madedepensahan ang kanyang panig.

“Medyo nababahala nga ako dyan kasi dahil meron pa silang nakambang apela at nag-hire pa tayo, yung Pilipinas, ng international lawyer…para tulungan ang solicitor-general na buuin ang apela. At itong apela na ito ay nakabinbin pa,” sinabi ni Conti.

“Kung iiwanan sa ere, kumbaga hahayaan na lang, palagay ko ang mangyayari, maiipit lang ang PIlipinas dahil una, meron na siyang naisumite na dokumento noon, nagbigay siya ng 50 investigation record.”

Nauna nang sinabi ni Solicitor-General Meynardo Guevara na hindi pa tuluyang ibinabasura ng ICC ang apela ng Pilipinas na suspendihin na ang imbestigasyon sa madugong war on drugs ng nagdaang administrasyon.

“Ang na-deny lamang, yung interim relief na hiningi natin, parang provisional relief na hangga’t nakaapela pa yan, wag niyo munang i-implement yung investigation. Because that is the very subject matter of the appeal–na kinukuwestiton namin yung jurisdiction niyo.”

Samantala, sinabi ni Conti na maraming paraan ang ICC para makapagsagawa pa rin ng imbestigasyon kahit na hindi sila pumapasok sa bansa.

Aniya, handa rin namang pumunta sa bansa ang ICC para magsagawa ng imbestigasyon.

Sa ngayon ay hawak ng ICC ang death certiticate at police report ng mga biktima kaugnay sa war on drugs. RNT/JGC

BACOLOD CITY – Sa kulungan ang bagsak ng isang pari matapos arestuhin ng mga awtoridad sa kasong panggagahasa sa 17-anyos na dalagita, iniulat kahapon, Marso 29 sa lungsod na ito.

Kinilala ang nadakip na suspek na si Father Conrad Mantac, ng San Carlos Diocese.

Batay sa report, nag-ugat ang kaso ni Mantac taon 2022 matapos ireklamo ng panggagahasa ng 17-anyos na dalagita sa loob ng simbahan.

Naglabas naman ng pahayag si Bishop Gerardo Alminaza, ng Diocese San Carlos, na sinuspinde na nila si Mantac habang iniimbestigahan ang nasabing kaso. Mary Anne Sapico

MANILA, Philippines – Solong maiuuwi ng mananaya ang lampas P34 milyon na jackpot prize ng Grand Lotto 6/55 sa draw ng Philippine Charity Sweepstakes Office nitong Miyerkules.

Naitala ang winning combination ng Grand Lotto 6/55 ay 26-23-34-41-45-29 sa premyong P34,123,859.

Samantala, wala namang nanalo sa draw ng Mega Lotto 6/45 sa winning combination na 32-23-31-34-40-29 sa premyong aabot naman sa halos P48 milyon. RNT/JGC

MANILA, Philippines – PINAG-AARALANG mabuti ng national government kung paano bibigyan ng insentibo ang local government units (LGUs) sa laban nito kontra malnutrisyon.

Ito ang sinabi ni Pangulong Ferdinand Marcos Jr. sa isinagawang paglulunsad ng Philippine Multisectoral Nutrition Project (PMNP), isang collaborative effort sa pagitan ng Philippine government at World Bank na naglalayong paghusayin ang nutritional status ng mga Filipino.

Ani Pangulong Marcos, layon ng PMNP na makapagbigay ng pangunahing health care support at nutrition services, access sa malinis na tubig at sanitasyon, technical information, pagsasanay at financing sa kailangang interbensyon ng LGUs para tugunan ang malnuturisyon.

“The program will also incentivize the participating LGUs. We were just having a very quick discussion about how that should be-how we can achieve that,” ayon sa Pangulo sa kanyang naging talumpati.

“We see very clearly the problems that arise at the ground level,” aniya pa rin.

Binatikos naman ng Punong Ehekutibo kung bakit hindi naging prayoridad ang healthcare sa lokal na antas, tinuran ang kakulangan ng kakayahan at abilidad, maging ang kasanayan at manpower.

“So we have found a way to bring the LGUs in. Because it is without their partnership, we do not get to what is often referred to as the last mile. That is always the problem when you try to translate a program from the national level, a program of the national government, all the way down to the local government, down to the barangay level,” ang winika ng Pangulo.

Sa kabilang dako, hinikayat naman ng Pangulo ang Department of Health (DoH) na makipagsanib-puwersa sa ibang ahensiya ng pamahalaan “in harmonizing and implementing sound diet and nutritional  policies and  practices.”

Nanawagan naman ang Pangulo ng “employment of best efforts” upang matiyak ang well orchestrated coordinated strategy para ipatupad ang nutritional programs sa iba’t ibang bahagi ng bansa. Kris Jose