P2.25T Build, Build, More fund ipinanukala ni Salceda

P2.25T Build, Build, More fund ipinanukala ni Salceda

July 20, 2022 @ 12:24 PM 4 weeks ago


MANILA, Philippines – Inihain ni House Ways and Means chairman Albay 2nd District Rep. Joey Sarte Salceda ang kanyang House Resolution No. 6, isang ‘joint House-Senate resolution’ na nagsusulong sa panukalang “Build, Build More” (BBM) bilang isang ‘National Infrastructure Development Framework’ sa ilalim ng ‘AmBisyon Natin 2040,’ ang ‘long term development program’ ng bansa sa susunod na 25 taon.

Panukala ng HR No. 6 ang BBM na inilalarawan ni Salceda na “’both social and economic infrastructure’ na tatapos sa sobrang kahirapan, lilikha ng higit na malakas na ‘middle class,’ at magpapabilis sa matibay at patas na pag-unlad ng bansa.”

Itatalaga ng BBM ang ‘minimum annual spending target’ na 6% ng ‘gross domestic product’ (GDP), higit na mataas kaysa 5% ng administrsyong Duterte na halos doble naman kumpara naman sa naitala sa ilalim ng panguluhang Noynoy Aquino.

Tinatayang magkakahalaga ito ng mga P2.25 trilyon sa katapusan ng termino ni Pangulong Ferdinand ‘Bongbong’ Marcos’ sa taong 2028.

Kinikilala ng ‘AmBisyon Natin 2040’ na sadyang kailangan ang solusyon sa mga hamong dulot ng sistema sa pulitika ng bansa kung saan limitado ang termino ng Pangulo sa anim na taon lamang, na matutugunan naman ng ‘long-term planning’ o higit na matagal na balangkas at malinaw na pananaw sa ‘socioeconomic development’ landas ng bansa.

Ayon kay Salceda, “sadyang kailangan ang higit na malaking pamumuhunan sa mahahalagang layunin ng AmBisyon 2040 lalo na sa mga imprastrktura.”

Ang panukalang BBM ay batay sa pangako ni Pangulong Marcos na itutloy niya ang programa sa imprastraktura na pinisimulan ni Duterte.

Layunin ng BBM, bukod sa iba pa, ang: 1) Tiyakin ang sapat, mura at laging mayroong suplay ng pagkain sa pamamagitan ng higit na malaking produksiyon, at mabisang impraestraktura para sa produktong agrikultura; at 2) isulong ang komersiyo at industriya sa pamamagitan ng mabilis at higit na mababang halaga ng paghatid nito sa mga pamilihan na dadaan sa mga karsada, tulay, riles ng tren, pantalan, paliparan at iba pang imprastraktura.

Prayoridad ng programa ang 16 mahalagang mga larangan — agrikultura, ‘logistics,’ ‘digital economy,’ ‘disaster resiliency,’ kalusugan, edukasyon, paghasa sa mga kasanayan, edukasyon at enerhiya.

Kasama rin sa mga naturang prayoridad ang mga imprastraktura para sa sining, kultura at mga pamana, ‘economic super regions’ gaya ng ‘Central Philippines Tourism Area, North Luzon Growth Quadrangle and Mindanao Food Basket;’ at gayon ding mga imprastraktura para sa pangkaunlarang siyensiya, kasama ang ‘basic research’ teknolohiya sa agrikultura, kaludugan, ‘digital economy’ gaya ng CRADLE (Collaborative Research and Development to Leverage Philippine Economy);
NICER (Niche Centers in the Regions), at BIST (Business Innovations through Science and Technology); mga suportang imprastraktura para sa ugnayang pandagat, kapayapaan sa Bangsamoro at iba pang dating mga awayang lugar, at para madaling pagnenegosyo, at mga hiwa-hiwalay na mga rehiyon sa pamamagitan ng mahuhusay na ‘highway networks.’

Binigyang diin ni Salceda na pananaw ng BBM ang makagawa ng mga imprastrakurang may kalidad at tibay; ang balansiyadong paglalagay nito sa mga napag-iiwanan at progresibong mga rehiyon, at magbibigay ng pinakamataas na benipisyo sa mababang gastos ng gobyerno na naayon sa ‘medium-term fiscal framework;’ matibay sa pananalasa ng pagbabago ng panahon at magsisilbi sa mga nanganganib at inilipat na mga pamayanan.

Inaasahang tutugma ang HR No. 6 sa isa pang katulad nitong Joint Resolution para sa isang ‘medium term fiscal plan’ na ayon kay Salceda ay pinagusapan na nila ni Speaker Martin Romualdez na tatalakayin din nilang dalawa sa mga ‘economic managers’ ng administrasyong Marcos.

“Ang mahalagang punto ng ganitong mga plano ay kung paano popondohan ang programa,” paliwanag ni Salceda at idinagdag niyang ang mga panukalang imprastraktura ay maaayon sa ‘medium term’ na plano sa pananalapi ng bansa.

Tiniyak din ni Salceda na ang panukala niyang BBM ay magiging bukas sa pamumuhunan ng mga tapat na ‘concessional official development assistance (ODA) programs, pag-isyu ng ‘bonds’ kung pabor sa timpla ng merkado, at public-private partnerships and joint ventures.

Layunin din aniya ng BBM na matulungan ang mga LGU sa pagpondo sa kanilang mga proyektong imprastraktura sa pamamagitan ng “capacity development and development of a credit scoring mechanism” na magagamit ng mga pridadong institusyong nagpapautang, at lumikha ng isang sistema para makapag-isyu din sila ng ‘municipal bonds’ sa paraang mabisa at naaayon sa konsepto ng ‘public-private partnership’ o PPP. RNT