P5B napanis na bakuna ng private sector, ilalapit sa COVAX para palitan

P5B napanis na bakuna ng private sector, ilalapit sa COVAX para palitan

July 29, 2022 @ 3:29 PM 3 weeks ago


MANILA, Philippines – Sinabi ng Department of Health (DOH) na ilalapit nito ang pribadong sektor sa global sharing platform na COVAX sa pag-asang mapalitan ang mga nakuhang bakunang COVID-19 na napanis o  nag-expire na.

Nauna nang sinabi ni dating Presidential Adviser for Entrepreneurship Joey Concepcion na mahigit 4.2 milyong doses na nagkakahalaga ng ₱5.1 bilyon na binili ng pribadong sektor ang nag-expire na dahil sa naantalang desisyon ng DOH at Health Technology Assessment Council na palawakin ang coverage ng second booster shots.

Sinabi ni Health Undersecretary at spokesperson Beverly Ho na maaaring tulungan ng pambansang pamahalaan ang pribadong sektor sa pagkuha ng mga bagong idedeliber na bakuna bilang replacement.

“We recognize there are stocks that have expired and efforts are ongoing to work with COVAX facility because they will be able to exchange the expiring vaccines of the national government, so inquiries are being worked out where they could do the same for the private sector vaccines,” sabi ni Ho.

Dinepensahan naman ni Dr. Ana Ong-Lim, miyembro  DOH Technical Advisory Group, ang ahensya at sinabing ang desisyon sa second booster ay hindi dapat isisi sa bakunang na-expire.

Aniya may mga iba pang dahilan na dapat  isaalang-alang tulad ng mabagal na paggamit ng mga unang dosis ng booster.

“Hindi dahil sa ngayon lang in-approve ang second booster kaya nagkaroon tayo ng expired doses,” pahayag ni Ong-Lim.

Giit ni Ong-Lim, ito ay dahil nagkaroon ng gaps sa  pagro-rollout or pagtanggap ng mga tao para sa kanilang first dose, para sa kanilang primary series,  first booster, at ang  second booster.

Pinayagan ng pambansang pamahalaan ang pagbibigay ng pangalawang booster shot sa mga immunocompromised na nasa hustong gulang noong Abril, pagkatapos ay pinalawak upang isama ang mga senior citizen at frontline health worker noong Mayo.

Gayunpaman, noong huling bahagi ng Hulyo lamang ito pinalawak upang isama ang mga Pilipinong may edad 50 pataas at mga nasa hustong gulang na may mga  comorbidities.

Hinikayat din ng DOH  ang pribadong sektor na patuloy na makipag-ugnayan sa health centers at LGUs upang magamit ang kanilang mga supply ng bakuna. Jocelyn Tabangcura-Domenden