Pag-automate sa overseas employment certificate hirit ni Ople

Pag-automate sa overseas employment certificate hirit ni Ople

June 25, 2022 @ 3:30 PM 2 months ago


MANILA, Philippines- Nais i-automate ni incoming Migrant Workers Secretary Susan Ople ang pagkuha ng overseas employment certificate (OEC) dahil sa mga reklamong natatanggap ukol sa pagpila nang matagal ng mga nais kumuha nito.

Rekisitos ang OEC upang makabalik ang isang OFW sa bansang pinagtatrabahuan.

“Di mo naman siguro dapat sobrang ikapila pa o lalo na ngayon [sa] Middle East painit na nang painit, di ba?” ani Ople nitong Sabado.

Maraming nagreklamo sa Philippine Overseas Labor Office (POLO) sa Dubai nitong Mayo mula sa OFWs na nahirapan sa pagproseso ng kanilang contract verification, OEC, at OWWA membership renewal. 

Nang sumapit ang Hunyo ay tinugunan naman ito ng POLO Dubai.

Para kay Ople, hindi dapat masayang ang bakasyon ng isang OFW para lamang sa pag-aasikaso ng OEC. 

Pinag-aaralan na aniya nila ang automation at nakikipag-ugnayan na rin sila sa Department of Information and Communications Technology (DICT). 

“Nakipag-usap na ako sa DICT kay [incoming] Secretary Ivan Uy at sabi naman niya doable ‘yan na i-automate na lang lahat ng submission para ‘di na kailangang physical pa pipila o pupunta sa kung saan man,” sabi ni Ople.

“Kasi kung nasa records ka na ng POEA dapat … May validation process na lang ‘yan,” patuloy niya. RNT/SA