MANILA, Philippines – Inatasan ni Vice President at Department of Education Secretary Sara Duterte ang Kagawaran na makipag-ugnayan sa Philippine National Police (PNP) upang mas paigtingin pa ang seguridad sa mga paaralan kasunod nang pagkamatay ng isang menor de edad na aksidenteng nabaril ang sarili gamit ang baril ng kanyang ama na dinala sa pagpasok nito.

Ayon kay DepEd spokesperson Michael Poa nitong Biyernes, Enero 27, inatasan na umano ni Duterte ang kanilang mga undersecretaries para atasan ang mga regional offices at school division offices na makipag-ugnayan sa kani-kanilang PNP counterparts.

“Specifically, gusto natin mapag-usapan kung pwede mag-identify tayo ng mga schools na pwede na po nating— mag-implement tayo, sa tulong ng PNP, ng checking of bags, spot check ng mga bags,” ani Poa sa panayam ng DZBB.

Maaalalang sinabi ng mga awtoridad na nilaro ng 12-taong gulang na bata ang 9mm Baretta ng kanyang ama sa loob ng paaralan nang bigla na lamang itong pumutok.

Tinamaan ang bata na naisugod pa sa ospital ngunit kalaunan ay binawian din ng buhay.

Samantala, sinabi ni Poa na nakikipag-ugnayan din sila sa mga local government unit (LGU) upang makapagbigay ng seguridad at police visibility sa mga paaralan.

“Nakikipag-ugnayan nga po tayo sa LGUs kung matutulungan nila tayo pagdating sa security or also kahit police visibility sa ating mga paaralan ay malaking tulong na para maiwasan ‘yung mga krimen sa ating schools,” aniya.

“Meron nga pong mga tanong kung paano nakapagpasok ng mga ganyang patalim o baril sa ating schools and admittedly we need to strengthen din talaga ‘yung security,” dagdag nito.

Maliban dito, makikipagtulungan din ang DepEd sa mga mental health experts para bumuo ng programa na naglalayong labanan ang karahasan sa mga paaralan. RNT/JGC

MANILA, Philippines – Umakyat na sa 40 ang bilang ng mga nasawi dahil sa masamang panahon mula pa noong Enero 1, ayon sa ulat ng National Disaster Risk Reduction and Management Council (NDRRMC) nitong Biyernes, Enero 27.

Sa 6 a.m. report ng NDRRMC, sa nasabing bilang, 12 sa mga ito ang mula sa Zamboanga, 10 sa Bicol, walo sa Northern Mindanao, pito sa Eastern Visayas, at tig-iisa sa Mimaropa, Davao at Soccsksargen.

Sa kabila nito, tanging 20 lamang ang kumpirmado sa mga naiulat na nasawi.

Samantala, mayroon pang pito katao ang naiulat na nawawala at 12 naman ang nasaktan dahil sa masamang panahon na nagdulot ng malawakang pagbaha at pagguho ng lupa.

Mayroon namang kabuuang 1,964,679 indibidwal o 481,012 pamilya ang apektado mula sa Cagayan, Central Luzon, Calabarzon, Mimaropa, Bicol, Eastern, Western Visayas, Central Visayas, Eastern Visayas, Zamboanga, Northern Mindanao, Davao, Soccsksargen, at Bangsamoro Autonomous Region in Muslim Mindanao.

Sa apektadong populasyon, 88,134 indibidwalo 21,444 pamilya ang nananatili pa rin sa 308 evacuation centers habang 27,624 katao o 8,330 pamilya ang nakikituloy sa ibang lugar.

Idineklara naman ang state of calamity sa 85 mga lungsod at munisipalidad sa bansa. RNT/JGC

MANILA, Philippines – Rehas na bakal ang bagsak ng isang di-umano’y tulak ng ipinagbabawal na droga matapos madakip ng mga pulis sa isinagwang buy-bust operation laban sa suspek sa Valenzuela City.

Nakapiit sa detention cell ng Valenzuela City Police ang suspek na kinilalang si Julius Gonzales y Dolendo, 39, helper, residente ng # 75 Tamaraw Hills Marulas ng lungsod.

Base sa ulat ng pulisya, bandang alas-10:40 ng umaga ng magsagawa ng buy-bust operation ang mga tauhan ng Station Drug Enforcement Unit (SDEU) ng Valenzuela City Police sa pangunguna ni P/Capt. Joel Madregalejo sa Agapita St., Gen T De Leon.

Sa ulat ng pulisya, isang undercover na pulis ang nagawang makipagtransaksyon sa suspek upang umiskor ng iligal na droga.

Sa puntong iyon, nang ibigay ng suspek ang binili na droga ng undercover na pulis agad itong nagbigay ng hudyat sa kanyang mga kasamahan at mabilis na inaresto ang suspek.

Narekober sa suspek ang apat na heat sealed transparent plastic sachet na naglalaman ng shabu na nasa 20 gramo at tinatayang nasa P136,000 ang Standard Drug Price (SDP) value, buy bust money at isang Samsung Analog Cellphone.

Mahaharap ang suspek sa kasong Violation of Section 5 (Sale, Trading, Administration, Dispensation, Delivery, Distribution and Transportation of Dangerous Drugs at Section 11 (Possession of Dangerous Drugs) under Art II of RA 9165 sa Valenzuela City Prosecutor’s Office. R.A Marquez

EASTERN SAMAR- Sabog ang bungo ng isang babae matapos malapitan barilin sa ulo ng hindi pa kilalang suspek habang nagpapagasolina ito ng kanyang motorsiklo, iniulat kahapon, Enero 26 sa bayan ng Can-Avid.

Kinilala ang biktimang si Beann Ada, nasa hustong gulang at residente sa barangay Cansangaya, ng nasabing bayan.

Batay sa inisyal na report ng Can-avid Municipal Police Station, bandang 11:30 AM naganap ang krimen sa Caltex gas station na matatagpuan sa national Road sa Barangay 7, Can-avid.

Lumabas sa imbestigasyon ng pulisya, nakuhanan ng CCTV ang krimen kung saan dumating ang biktima sa nasabing gasolinahan kasunod ang suspek.

Base sa kuha sa CCTV, habang nagpapa-gas ang biktima bumaba ang suspek sa kanyang motorsiklo na walang plate number, nakasuot ng kulay itim na sweatshirt, kulay pula na sling bag at puti na tsinelas.

Dito, hinarap ng suspek ang biktima at nakipag-usap pa.

Ilang minuto ang makalipas at paalis na sana ang biktima sakay ng kanyang motorsiklo, bigla na lamang bumunot ng baril ang suspek at binaril ito ng malapita sa ulo dahilan para bumagsak ito sa semento.

Matapos ang krimen mabilis na tumakas ang suspek sa hindi malamang direksyon habang dinala naman sa ospital ang biktima pero idineklara na rin itong patay ng umatending doktor.

Sa ngayon may persons of interest na ang pulisya at inaalam na ang motibo sa krimen. Mary Anne Sapico

MANILA, Philippines – Kinikilala ang kanilang mga sakripisyo at mahalagang papel sa panahon ng kalamidad, inihain ni Senator Christopher “Bong” Go sa Senado ang panukalang batas na magbibigay ng hazard pay sa disaster response personnel.

Binigyang-diin ni Sen. Go na ang pinakamaliit na manggagawa ng gobyerno ay dapat lamang mabigyan ng maayos na kompensasyon.

Aamyendahan ng Senate Bill No. 1709 na inihain ni Go noong Enero 23 ang mga probisyon ng “Philippine Disaster Risk Reduction and Management Act of 2010”.

Sa ilalim nito, aatasan ang mga local government units na magbigay ng hazard pay sa mga tauhan ng kani-kanilang Local Disaster Risk Reduction and Management Offices (LDRRMOs) at Barangay Risk Reduction and Management Committees (BRRMCs), gayundin sa lahat ng accredited community disaster volunteers (ACDVs) sa panahon ng state of calamity na idedeklara ng Pangulo.

Dahil ang bansa ay nakaposisyon sa tinatawag na “Pacific Ring of Fire”, isang lugar kung saan ang mga lindol at aktibidad ng bulkan ay mas madalas kaysa iba pang bahagi ng mundo, ikatlo ang Pilipinas sa pinaka-prone ng kalamidad, ayon sa World Risk Report na inilathala ng United Nations University Institute of Environment and Human Security (UNU-EHS).

Kaya naman, muling iginiit ni Go na palaging nasa panganib ang buhay ng mga disaster relief teams at volunteers.

“Ano mang sakuna…napakalaki ng papel na ginagampanan ng ating rescuers at volunteers sa mga panahon na ito dahil sila ang nagbubuwis ng buhay para ilagay sa kaligtasan ang kanilang mga kababayan,” idiniin ni Go.

“Marapat naman talagang mabigyan sila ng tamang kompensasyon. Ibigay ang nararapat sa kanila. All government personnel should be entitled to hazard pay, partikular ‘yung talagang mga delikadong trabaho tulad nito,” giit pa niya.

Sa panukala, lahat ng mga tauhan ng LDRRMO sa mga probinsya, lungsod, at munisipalidad at lahat ng kinikilalang community disaster volunteer, anuman ang kanilang katayuan sa pagtatrabaho, ay bibigyan ng hazard pay na P3,000 bawat buwan.

Matatandaan na isa si Go sa lumikha ng resolusyon sa Senado na nagbibigay-parangal sa kabayanihan ng limang miyembro ng Bulacan Provincial Disaster Risk Reduction and Management Office na namatay habang nagliligtas ng buhay sa pananalasa ng Super Typhoon Karding.

Ang limang rescuer—sina George Agustin, Troy Justin Agustin, Marby Bartolome, Jerson Resurrecion, at Narciso Calayag Jr—ay namatay sa San Miguel, Bulacan matapos tangayin ng flash flood noong Setyembre ng nakaraang taon.

Alinsunod sa kanyang adbokasiya na gawing matatag ang bansa sa mga kalamidad, isinulong ni Go ang ilang legislative measures na naglalayong epektibong matugunan ang parehong natural at human-induced na mga sakuna, tulad ng SBN 188 o ang iminungkahing Disaster Resilience Act.

Muli ring iginiit ni Sen. Go ang kanyang apela na maisabatas ang SBN 193 na layong magtayo ng mga ligtas at malinis na evacuation center sa bawat lungsod, lalawigan at munisipalidad sa buong bansa. RNT