Pagiging fact checker, precinct finder ng Rappler, kinuwestyon ng BBM camp

Pagiging fact checker, precinct finder ng Rappler, kinuwestyon ng BBM camp

March 1, 2022 @ 3:10 PM 4 months ago


MANILA, Philippines – Nagpahayag ng pagkabahala ang kampo ni Presidential candidate Ferdinand “Bongbong” Marcos Jr. sa partnership ng Commission on Elections (Comelec) sa online news site na Rappler kaugnay ng nalalapit na halalan sa Mayo.

Ayon sa campaign manager ni Marcos at dating MMDA chairman Benhur Abalos, sa pamamagitan ng sulat ay hiningan nila ng paglilinaw ang Comelec hinggil sa paglagda nito ng kasunduan sa Rappler para payagan itong magsagawa ng fact check sa mga pahayag ng mga kandidato gayundin ang paglikha ng precinct finder para sa mga botante.

“Ang Rappler daw ay parang pinapayagan ng Comelec na sya ay gumawa ng fact checker, inatasan. At pangalawa, nakalagay rin dito. Comelec will also allow Rappler to embed its online precinct finder once it has become available. So dalawang issue,” giit ni Abalos.

Bukod dito, Iginiit din ni Abalos na pagmamay-ari ng mga dayuhan ang nasabing online news site.
“Alam niyo ho sa ating Pilipino, lalo na sa Constitution, sagrado ang eleksyon. At klaro dyan, dapat walang mangialam na dayuhan dito.”

Nababahala rin ang kampo ni Marcos sa pagpapahintulot sa Rappler na maging precinct finder, na nangangahulugang magkakaroon ito ng access sa database ng Comelec.

“May issue tayo rito sa Right of Privacy Law. That could be a violation,” punto pa ni Abalos.

“These are issues na tingin ko naman ay valid na sanay maklaro muna. We’re just waiting [for the Comelec’s response] because for us, this is very disturbing,” dagdag niya.

Walang pang tugon ang Rappler ukol sa komento ni Abalos. RNT