Ang mga karahasang naganap tulad ng pamamaril kay Tanauan City, Batangas Mayor Antonio Halili at kay General Tinio, Nueva Ecija Mayor Ferdinand Bote ay huwag sanang ibintang agad sa gobyerno o kahit kanino.
Sa halip, hintayin po natin ang ginagawang pagsisiyasat ng mga kinauukulang ahensiya.
Kung nakasama man sa listahan ng mga narco-politician ang napaslang na si Mayor Halili ay hindi dapat ibunton ang sisi agad sa kampanya laban sa droga sapagkat posibleng ang mga nasagasaan niya sa kanyang shame campaign at mga Kalaban sa politika ang nasa likod ng pamamaril.
Naalala ko noong araw ang gobernador noon ay pinasabugan ang sasakyan sa kapitolyo mismo.
Parang pelikula ang diskarte gaya na lang ng ginawang pag-snipe sa alkalde.
Only in the movies.
Si Halili ay nakilala ng sambayanan dahil sa sistema niyang ipinaparada sa publiko ang mga naaarestong, drug user, usher, user, rapist, holdaper at kung ano-ano pang mga krimeng kinasangkutan, kung saan ang mga suspek ay may karatula sa kanilang katawan na nakasaad na huwag gagayahin.
Sa gayong pamamalakad ng nasabing alkalde ay marami ang nagalit sa kanya at maging ang Commission on Human Rights (CHR) ay binatikos ang kanyang pamamaraan at siyempre pa ang higit na nanggalaite sa kanya ay ang mga crime syndicate at drug syndicate na tinamaan ng kampanya.
Nagkaroon man ng kampanya ang ating Pangulo sa pagsugpo ng kriminalidad at illegal drugs ay posibleng samantalahin naman ito ng mga sindikatong nakabangga ng nasawing si Mayor Halili.
Hindi po ba?
Pero kailangang hintayin pa rin natin ang resulta ng isinasagawang imbestigasyon sa kaso.
Huwag po natin isentro rito ang ating mga pananaw at sa halip ay mayroon tayong mga ahensiya na nagsasagawa ng mga pagsisiyasat para maresolba ang sinapit na pamamaslang kay Mayor Halili.
Ganundin sa sinapit ng isa sa aking mga kababayan sa Nueva Ecija na si Mayor Bote na tinambangan at pinagbabaril sa gawi ng Cabanatuan City at nilinaw naman ng mga kinauukulan na itong si Mayor Bote ay wala sa narco-politician lists kundi ito ay masigasig pa nga na tagasuporta ni Pres. Duterte.
Sa halip na batikusin ng mga kontra-Duterte at akusahan na kagagawan ito ng administrasyon para makumbinsi ang kaisipan ng sambayanan tungo sa pag-aalsa, e, mas mainam po na makipagtulungan na lamang tayo para maresolba ang mga karahasan.
Tumulong po tayo na makumbinsi ang sinomang mga nakasaksi o may nalalaman sa mga pangyayari at nakakilala sa mga salarin na labanan ang takot sa paraang maging testigo para sa ikareresolba ng kaso.
Ika nga, dapat po nating makumbinsi ang mamamayan na tumestigo laban sa mga kriminal.
Ang mga kriminal ang dapat na matakot at hindi tayong mga law abiding citizen ang matakot!
-DALA KO EGCO
