PANALO NA NAMAN SILA

PANALO NA NAMAN SILA

March 21, 2022 @ 1:45 PM 3 months ago


DOBLE-doble ang mga dagok ng malakihang dagdag-presyo sa gasolina sa ating mga ordinaryong mamamayan. Para sa mga driver, halos P100 at P30 ang mababawas sa araw-araw na kita nila sa pamamasada.  Marami sa kanila ang mapipilitang tumigil na lang daw  muna sa pamamasada dahil siguradong lugi lang sila sa buong araw na pasada dahil walang maiiuuwing kita sa pamilya.

Sa mga mananakay, mahihirapan silang bumiyahe dahil magbabawas nga ang mga  sasakyang pampubliko sa kalsada. At tiyak na magtataasan na muli  ang presyo ng mga bilihin, dahil sasabihin ng mga negosyante na tumaas ang gastusin sa byahe ng mga kalakal nila.

Palagay ko ‘di maglalaon, pati kuryente at tubig ay tataas din muli ng presyo, dahil krudo rin naman ang gamit para paandarin ang mga diesel power plant at ang mga planta na maglilinis ng tubig natin.

At dahil pumasok na nga tayo sa panahon ng tag-init, asahan na natin na ang init ng panahon ay dagdag sa init ng ulo ng mga naghihikahos.

Hirap lang tanggapin na ang naririnig natin sa mga opisyal ng gobyerno sa kabila ng mga pagtaas  na ito ay tanggapin at magtiis rdaw magagawa ang gobyerno dahil wala na silang kontrol sa presyuhan ng gasolina, pati na ang presyo ng kuryente at tubig.

Deregulated na raw kasi ang mga ito, dahil na rin sa batas na naglipat sa pribadong sektor ng mga industriyang ito.  Privatization at deregulation.   Tandaan n’yo ang mga yan.

Ang benta ng Kongreso sa atin noon, gaganda raw ang serbisyo at mas magiging “competitive” ang presyo ng gasolina, tubig at kuryente.   Hindi sinabi sa atin, na ibig sabihin pala, walang preno ang tuloy-tuloy na pagtaas ng presyo ng mga ito, at lolobo naman ang kita ng mga kompanya ng langis at mga power at water corporation.

Hindi totoong walang magagawa ang gobyerno sa pagtaas ng presyo ng gasolina. Medyo tamad na lang siguro sila, dahil patapos na ang kasalukuyang administrasyon.

Hayyy naku! Talo na naman ang mga ordinaryong mamamayan at panalo ulit ang mga dambuhalang korporasyon.