MULING binIgyang-diin ni Pope Francis mula sa Vatican City ang kanyang kalungkutan dahil sa pananahimik ng maraming sektor pagdating sa usapin ng iba’t ibang kaapihang nararanasan ng kababaihan.
Ang pagtingin umano sa kababaihan bilang waste material o dumi ay isang latay na sumusugat sa sangkatauhan.
Pagbibigay-riin ng Santo Papa ang dignidad at pundamental na karapatan ng bawat tao ay dapat na igalang at proteksyunan pagdating sa edukasyon, trabaho, pagpapahayag ng saloobin, at iba pa, lalong higit aniya sa kababaihan na mas nabibiktima ng pang-aabuso at karahasan.
Hindi dapat aniya nananahimik ang mundo sa naiibang pagturing sa kababaihan at sa paggamit sa kanila.
Ibinigay na halimbawa ng Santo Padre ang hindi pantay na pasahod sa babae at lalaki, pag-aalis sa trabaho kapag nagdadalang-tao, at madalas na sinasamantala sa lugar ng kanilang trabaho. Patuloy umano itong nangyayari sa mga pangunahing lungsod sa mundo.
Panawagan ni Pope Francis na maging boses ang bawat isa ng mga babaeng inaabuso, pinagmamalupitan, at dinadahas, na ipadinig sa buong mundo ang kanilang pagtangis at ang sakit na kanilang nararamdaman, para mabigyan sila ng katarungan at pag-asa.
Sa datos ng United Nations, isa sa bawat tatlong babae o 3.9 billion na kababaihan sa mundo ang nakararanas ng pang-aabuso at karahasan sa maraming bahagi ng daigdig.
Isa pang lubhang nakababahala ay ang pagtaas ng teenage pregnancy, kinakailangan na nang “whole-of-government approach” para mapigilan ang patuloy na tumataas na teenage pregnancy sa bansa sa mga kabataang babae na nasa edad sampu hanggang labing-apat na taong gulang.
Batay sa datos ng PSA o Philippine Statistics Authority, lumaki ng 11% ang bilang ng mga nabubuntis na 10 to 14 years old na ngayon ay nasa 2,113 mula sa dating 1,903 noong taong 2016.
Pero bumaba naman ang bilang ng mga nabubuntis sa edad na 15 years old hanggang 19 years old.
Sa pagdami ng mga mas batang nabubuntis, hindi inaalis ng mga eksperto ang posibilidad ng “incest rape” sa mga batang ito.
Naghain ng Resolution No. 462 si Senator Sonny Angara para maimbestigahan ng Senado ang nakababahalang sitwasyong ito.
Noong administrasyong Duterte nilagdaan nito ang Executive Order No. 141 na nag-aatas sa POPCOM o Commission on Population and Development na nagtuturing sa teenage pregnancy bilang isang national priority.
Ikinababahala ng UNICEF Philippines o United Nations International Children’s Fund ang epekto sa kalusugan ng mga batang maagang nagbubuntis at kanyang social development.
