Panelo nais i-convert bilang five-star hospital ang bagong Senate building

Panelo nais i-convert bilang five-star hospital ang bagong Senate building

February 21, 2021 @ 9:39 AM 5 days ago

  •  
  •  
  •  

Manila, Philippines – Nais ni Chief Presidential Legal Counsel Salvador Panelo gawing isang ospital ang bagong gusali ng Senado sa Fort Bonifacio, Taguig City dahil sa kakulangan ng pondo sa pandemya.

“This is not the time to construct a Senate building, spending P5 billion to P9 billion kasi ang target daw nila tuloy-tuloy daw ang construction,” giit ni Panelo.

“Can you imagine? Naghahanap nga tayo ng pera para sa bakuna. Nangungutang nga tayo. Kailangan natin ng pera, ayuda doon sa mahihirap, nawalan ng trabaho. Pagkatapos magpapagawa tayo ng Senado, ubod ng laki, three towers pa nakita ko ‘yung design,” dagdag nito.

Ang mungkahing ito ay mula kay dating Presidential spokesman Rigoberto Tiglao na gawin na lamang na modernong ospital ang bagong gusali ng Senado kung saan maaaring gamutin ang mga may COVID-19.

Batay sa ulat, nagkakahalaga ang naturang gusali ng P8.9 bilyon.

May lawak itong 18,320-square meter na may apat na tower na may 11 palapag kada isa at tatlong basement na kayang umukopa ng 1,200 parking spaces.

Inaasahang matapos ito sa susunod na taon.

Lahad pa ni Panelo na aapela ito sa mga kaibigan nito sa Senado na iurong ang proyekto.

“Marami sa inyo ang re-eleksyonista. Baka mag-react yung mga elektorado sa atin.  Siguro huwag na muna. Okay pa naman ‘yang Senate building natin,” punto nito.

Sa kasalukuyan, umuupa ng P100 milyon kada taon ang Senado sa gusali ng Government Service Insurance System (GSIS) sa Pasay City. RNT/ELM


  •  
  •  
  •