MANILA, Philippines – Iginiit ni Senator Christopher “Bong” Go, chairman ng Senate committee on health and demography, sa Department of Health ang mabilis na pagsubaybay sa pagbibigay ng mga benepisyo sa mga healthcare worker (HCWs) ng bansa.

Ipinaalala din niya sa DOH at sa mga nasa Executive branch na tiyakin ang wastong pagpapatupad ng batas sa pamamagitan ng pagbibigay ng nararapat sa frontliners habang layunin ng bansa ang pagbangon ng pandemic.

Sa isang pahayag na inilabas ng DOH noong Mayo 19, tiniyak ng ahensya na nagsusumikap itong mapabilis ang pagpapalabas ng COVID-19 sickness at death compensation na nagkakahalagang P1 bilyon para sa mga kwalipikadong HCW at support staff.

“Nagpapasalamat po ako sa Department of Health sa pagtugon sa pangangailangan ng ating mga healthcare workers.  Dapat lang po talaga na aksyunan agad ng gobyerno ang nararapat para sa kanila lalo na’t nakasaad ito sa batas,” idiniin ni Go.

“As much as possible, kung kakayanin naman ng pondo, dapat ibigay natin ang lahat ng suportang pwede nating ibigay.  Hindi masusuklian ang hirap at sakripisyo nila para makapagligtas ng buhay,” idinagdag niya.

Noong Abril 27, nilagdaan ni Pangulong Rodrigo Duterte ang Republic Act 11712 na nagbibigay ng mandatoryong patuloy na benepisyo at allowance sa mga pampubliko at pribadong HCW, anuman ang katayuan sa trabaho, sa panahon ng pandemya ng COVID-19 at iba pang mga emerhensiya sa kalusugan ng publiko.

Sa ilalim ng batas, ang bawat frontliner ay magiging karapat-dapat sa isang nakapirming COVID-19 allowance bawat buwan ng serbisyong inilapat nang retroaktibo mula Hulyo 2021.

“Sa ilalim ng batas na ito, mas maraming healthcare workers na ang makatatanggap ng allowance.  Hindi limitado sa mga directly exposed sa COVID-19 patients dahil sabi ko nga, lahat naman ng frontliners na naka-duty sa mga ospital ay maituturing na exposed sa banta ng COVID-19,” sabi ng senador.

“Kaya dapat masiguro na maimplementa ito nang maayos.  Huwag na natin sayangin ang oras.  Ibigay ang dapat ibigay na naaayon sa batas,” iginiit niya.

Sa ilalim ng Act, ang mga pampubliko at pribadong HCW ay may karapatan sa health emergency allowance para sa bawat buwan ng serbisyo sa panahon ng state of public health emergency batay sa risk categorization.

Bilang karagdagan, ang mga manggagawa sa pangangalagang pangkalusugan ay makakatanggap ng hiwalay na kabayaran kung sila ay magkakaroon ng COVID-19 habang nasa tungkulin.

Para sa mga may banayad hanggang katamtamang sintomas, tatanggap sila ng PhP 15,000 habang ang mga indibidwal na may malubhang sintomas o nasa ilalim ng kritikal na estado ay tatanggap ng P100,000.

Samantala, para naman sa mga namatayan ng virus, magbibigay ang gobyerno ng P1,000,000 sa mga pamilyang naiwan.

Naging pursigido si Go sa pagtataguyod nang mas mahusay at pinalakas na sistema ng pangangalagang pangkalusugan sa bansa.

Nauna siyang umapela para sa pagbibigay ng mga allowance para sa mga HCW sa kasagsagan ng pandemya.

Noong 2019, naging instrumento rin ang mambabatas sa pagsasabatas ng Republic Act No. 11466 o ang “Salary Standardization Law 5”.

Ang panukala ay nagbibigay sa lahat ng mga sibilyang empleyado ng gobyerno, kabilang ang mga nars, na itaas ang suweldo.

Sa parehong taon, tiniyak din niya na sapat na pondo ang inilaan para sa pagpapatupad ng desisyon ng Korte Suprema noong 2019 na nagpatibay sa Section 32 ng Philippine Nursing Act of 2002, na nagtatakda ng minimum salary grade ng Nurse I position sa SG-15.

“Hindi pa po rito nagtatapos ang aking apela sa gobyerno na bigyan ng nararapat na suporta ang ating mga healthcare at non-healthcare workers. Sila ang dahilan kung bakit napakaganda ng ating COVID-19 response,” sabi ni Go. RNT

APARRI, Cagayan — Umaabot sa P120,000 na halaga ng pinaniniwalaang isang plastic ng hinihinalang pinatuyong dahon ng narijuana ang narekober ng mga mangingisda sa pagitan ng baybaying bahagi ng Buguey at Aparri.

Una rito, nangingisda sa laot sina alyas Peter, 36 taong gulang; alyas Jojo, 43 taong gulang; at alyas Dante, 39 taong gulang nang makita nila ang isang plastic na lumulutang sa dagat.

Kinuha nila ito at nang nakabalik na sila sa pangpang ay dinala nila sa bahay ng isang Baniel at doon ay binuksan nila ng bahagya at inamoy.

Agad nilang dinala sa kanilang punong barangay na si Erwin Lobas at inireport ng huli sa Aparri Police Station.

Ang narekober na transparent plastic bag na naglalaman ng hinihinalang dahon ng marijuana ay nasa humigit-kumulang 1.008 kilo na may standard drug price na P120,000.

Sa panayam ng REMATE kay PCapt. Tristan John Zambale, hepe ng Aparri Police Station, lumabas sa kanilang pagsisiyasat at laboratory ng PDEA Region ay isang uri lamang ng dahon ang nasabing narekober.

Dahil dito ay patuloy at pinaigting ang kampanya ng kapulisan sa ipinagbabawal na gamot.

Matatandaang nitong nakalipas na buwan ay mayroon din lumutang na kilo-kilong shabu sa naturang karagatan na nagkakahalaga ng P15-M. Rey Velasco

QUEZON PROVINCE – Negatibo sa ‘oil spill’ ang bahagi ng baybayin kung saan nasunog ang fast craft MV Mercraft 2 kaninang umaga sa Real, Quezon.

Ayon sa Philippine Coast Guard (PCG), agad na nagsagawa ng assessment ng traces ng oil spill ang coast guard team  ngunit walang nakitang pagtagas ng langis.

Sa nangyaring sunog,pito ang kumpirmadong nasawi, 23 ang sugatan kung saan tatlo ang kritikal.

Lahat ng 134 sakay ng barko  ay natagpuan na ayon sa PCG kabilang rito ang 126 pasahero at walong crew.

Kasama sa sugatan ang Boat Captain na si John Lerry D Escareces at ginagamot ngayon sa ospital.

Iniimbestigahan pa ang sanhi ng sunog. Jocelyn Tabangcura-Domenden

MANILA, Philippines – Nagbalik-sesyon na rin ang Kamara matapos ang pagdaraos ng national at local elections.

Alas-2:00 kaninang hapon nang magbalik ang plenary session na pinangunahan ni Deputy Speaker at Sorsogon 1st District Representative Evelina Escudero.

Kaninang umaga, nauna nang nagbalik sesyon ang Senado na tatagal hanggang sa Hunyo 3.

Samantala, tiniyak ng Mababang Kapulungan ng Kongreso na handang-handa ito sa canvassing ng mga boto para sa mga kandidato sa pagka-presidente at bise presidente nitong May 9 elections.

Bawat kapulungan ay inaasahang pormal na bubuo ng contingent para sa Joint Committee na magsasagawa ng aktwal na pagbibilang ng mga boto na sisimulan bukas, Mayo 24. RNT/ JCM

MANILA, Philippines – Sinariwa ni Senador Grace Poe ang kanyang huling kuwentuhan sa inang si Ms. Susan Roces bago ito pumanaw nitong Sabado sanhi  ng cardiopulmonary attack o atake sa puso na kasalukuyang nakaburol sa Heritage Park sa Taguig City.

Sa panayam, sinabi ni  Poe na kanyang naalala ang sinabi ng kanyang ina noong tumakbo itong Pangulo na pinutakte siya ng batikos hinggil sa pagkuwestiyon sa kanyang pagkatao at pagsilang.

Aniya, lubhang nasaktan ang kanyang ina nang sabihin na hindi ito puwedeng tumakbong Pangulo dahil isa siyang dampot.

“Kaya nga nu’ng sinasabing, ‘Hindi ka pwedeng tumakbo dahil ikaw ay hindi natural born citizen kasi dampot ka lang.’ Nagalit siya, nasaktan, siyempre ‘di ba?” ayon kay Poe.

Kaya nang malagdaan ang Foundling Law, lubhang ikinatuwa ng kanyang Ina ang naturang balita.

“Sabi ko, ‘Mom, I have good news.’ Naisa-batas na ‘yung batas para ipakilala or to recognize ‘yung mga batang na-abandona,”  ayon kay Poe.

“Sabi ko, ‘No, mom. Congratulations to you! Because of our case and because of your diligence,’ ‘yung pagiging maayos niya na siguradong dapat ‘yan nasa ayos ang mga papeles niya, nagkaroon ng basehan ang mga lehislaturang ganitong klase,” ani pa ni Poe.

Ayon kay Poe, bago dalhin sa ospital ang kanyang ina, nag-usap sila ng kanyang kaibigan kaya noong bandang tanghalin, nabalitaan niyaa ng pagsasabatas ng Foundling Law.

“Mga bandang tanghali, nabalitaan namin ‘yung batas ukol sa pagkilala sa mga nadampot na bata o foundlings ay naisabatas na, napirmahan na. So excited ako nu’n, tinawagan ko siya, tapos sabi pa niya sa akin, ‘Congratulations,’ kasi imagine, ipinaglaban niya ‘yan para sa akin matagal na, na magkaroon ng patas na karapatan ang mga batang naabandona,” ayon kay Poe.

“Tapos sabi ko, ‘Ma, not congratulations to me alone, congratulations to you because if not for you and for this advocacy that you fought for, hindi ito magiging ganito. Hindi ako magiging nasa ganitong pagkakataon sa buhay,” dagdag ng senadora.

Kaya dahil dito, sinabi ni Poe na masayang namayapa ang kanyang ina.

“So masaya siya, tapos alam mo, pagkatapos nu’n, parang naiba na. ‘Yun na ang huling pag-uusap namin kaya napakasymbolic nga, parang inintay nya, pero pagkatapos nu’n, nu’ng dinala na namin siya sa ospital, parang wala sa sarili, tapos nagko-complain siya na may pain siya. So nu’ng dinala namin sa ospital, ang pinagbibilin niya palagi ‘yung mga apo niya na kailangan daw dalhin namin sa Baguio ‘yung mga bata, tapos ang bahay daw ng Papa ko doon, ayusin ko daw para ‘yung mga bata pwede daw magbakasyon doon. ‘Yun ang mga naiisip niya,” patapos ng mambabatas. Ernie Reyes