MANILA, Philippines — Naghain ng panukalang batas si senior administration lawmaker sa House of Representatives para sa paglikha ng isang Department of Sports na tutugon sa iba’t ibang hamon at kakulangan sa sports programs at development sa bansa.

“Panahon na ngayon para sa gobyerno na unahin ang sports sa pambansang agenda, at isaalang-alang ang sports bilang mahalagang bahagi sa pagbuo ng bansa,” sabi ni Rep. Mikee Romero ng party-list 1Pacman, may-akda ng House Bill 335.

Ayon pa kay Romero, dapat pamunuan ng DOS ang pagpapatupad ng mga patakaran sa pagsulong at pagpapaunlad ng mga programa sa palakasan at kalusugan ng bansa at maging responsable sa pagpapahayag ng mga patakaran na makakatulong sa bansa na mapabuti ang pagganap nito sa pandaigdigang kompetisyon.

Inaatasan din itong maghanap ng mga solusyon sa mga problemang dumaranas ng mga palakasan sa Pilipinas kabilang ang kakulangan ng komprehensibong programa sa pambansang palakasan, ang pangangailangang pahusayin ang pakikipagtulungan sa iba’t ibang sektor na kasangkot sa palakasan, hindi na ginagamit na mga pamamaraan ng pagsasanay, kakulangan ng moderno at mataas na kalidad na mga pasilidad sa pagsasanay, kagamitan. at mga lugar ng palakasan.JC

MANILA, Philippines – Pormal nang pumirma ng kontrata si Kiefer Ravena sa Shiga Lakes upang maging opisyal ang kanyang pagbabalik sa koponan. .

Isiniwalat ng koponan na naformalize ang naturang pagpirma matapos ang isang tapong palalaro ni Kiefer sa Japan.

Hindi naman ibinunyag ang nilalaman ng kontrata, ngunit sinabi ng mga source na nag-alok ang panig ng Japan B.League ng tatlong taong deal na tinanggap ng dating Ateneo King Eagle.

Nagpahanga si Ravena sa kanyang unang season kasama si Shiga, na nag-average ng 13.2 puntos sa 35-percent shooting mula sa malalim, na may 5.9 assists, 2.5 rebounds, at 1.5 steals sa loob ng 27 minuto sa 56 na laro.

Mabilis siyang napalapit sa Lakes sa kabila ng pagtatapos ng 2021-22 season na may 14-43 win-loss record.

“I’m excited to be back and play for you guys once again! This will be a great season for us and I know the boosters will have fun supporting the team this year,” wika nito.

Ginugol ni Ravena ang mga nakaraang buwan sa paglalaro para sa Gilas Pilipinas, na nagsisilbing kapitan ng koponan sa 2022 Fiba Asia Cup kung saan nagtapos ang Pilipinas sa ika-siyam na puwesto.JC

MANILA, Philippines- Gumaling na ang unang kaso ng monkeypox sa bansa at makalalabas na mula sa isolation, ayon sa Department of Health (DOH)  nitong Lunes.

Tapos na ang 21-day isolation ng 31-anyos na Pilipino, ayon pa sa DOH.

“The first monkeypox case in the Philippines has now finished [the] 21-day isolation period last August 5, 2022,” pahayag ng DOH. “The patient has recovered, and was cleared by their physician to be discharged from isolation.”

Subalit nakasailalim pa sa quarantine ang 10 close contacts ng monkeypox patient, base pa sa DOH.

Tiniyak naman ng health agency likewise sa publiko na wala pang natutukoy na panibagong kaso ng monkeypox.

Dumating sa Pilipinas nitong Hulyo 19 ang unang kaso ng monkeypox sa Pilipinas, mula sa mga bansang may naiulat na kaso ng sakit.

Ang Pilipinas ang ika-walong bansa sa World Health Organization’s Western Pacific Region – kasama ang Australia, Singapore, China, New Zealand, Japan, New Caledonia, Republic of Korea – na nasapul ng monkeypox. RNT/SA

MANILA, Philippines – Posibleng umabot ang “prolonged” COVID-19 wavesa bansa hanggang “ber” months, ayon kay OCTA Research fellow Guido David nitong Lunes.

Sinabi ni David na mas matagal kumpara sa inaasahan ang kasalukuyang wave, at sinabing ang Omicron BA.4 wave sa South Africa ay nagtagal lamang nang dalawang buwan.

“Nagsimula [dito sa Pilipinas] more or less around June, July to August so dapat naka-two months na tayo,” ani David sa Laging Handa briefing.

“Pero hindi pa tayo nasa peak. It’s taking longer. Right now, it’s looking like it will last up to 4 to 5 months, well into the ‘ber’ months,” dagdag niya.

Ipinaliwanag ni David na ang mas matagal na COVID-19 wave sa bansa ay posibleng dahil sa iba pang variant na nagdudulot ng karagdagang impeksyon.

Isa pang posibilidad, base kay David, ang humihinang immunity mula sa mga bakuna sa pag-unti ng mga nagpaparturok ng COVID-19 booster shot.

“Most of them had their vaccines last year pa and konti lang yung nagpa-booster so nagkakaroon ng waning immunity. Bumababa yung antibody levels natin,” sabi ni David.

“Then, adherence to minimum public health standards is always important,” patuloy niya. RNT/SA

Bulacan- Kalunos-lunos ang sinapit ng binata matapos pagsasaksakin ng kainumang karpintero sa lungsod ng San Jose Del Monte (SJDM).

Kinilala ang suspek na si Ernesto Floro, 53, habang ang biktima ay si Rolly Sara, 36, helper, kapwa residente ng Brgy. Kaypian.

Sa report ng SJDM police, nangyari ang insidente bandang ala-1:35 ng madaling araw nitong Agosto 7, sa Brgy. Julo Kaban.

Ayon sa inisyal na imbestigasyon at sa salaysay ng saksi, masayang nag-iinuman ang dalawa nang biglang magkaalitan at magsuntukan.

Sa kasagsagan ng suntukan ay dumampot ng screwdriver ang suspek hanggang sa
tarakan ng tatlong beses sa dibdib at kanang braso ang biktima.

Nang humupa, agad dinala ang sugatang biktima sa Ospital ng Lungsod para sa paunang lunas habang ang suspek ay mabilis na tumakas sa lugar.

Dahil dito, mabilis na humingi ng saklolo ang mga kaanak ng biktima sa mga tanod na rumesponde sa lugar kaya naaresto ang suspek at isinuko naman sa pulisya kalaunan.

Nahaharap ang suspek sa kasong frustrated murder habang nakakulong sa naturang istasyon ng pulisya. Dick Mirasol III