PBBM, pamilya naghahanda na sa pag-assume sa opisina

PBBM, pamilya naghahanda na sa pag-assume sa opisina

June 26, 2022 @ 4:23 PM 2 months ago


MANILA, Philippines – Sinabi ni President-elect Ferdinand “Bongbong” Marcos Jr. na siya at ang kanyang pamilya ay naghahanda na at nasa proseso na ng paglipat upang maging Unang Pamilya.

Sa isang video na ipinost sa kanyang YouTube channel, sinabi ni Marcos na bukod sa kanyang sarili, ang kanyang asawang si Liza at ang kanyang mga anak na sina Sandro, Simon, at Vinny ay pawang nag-a-adjust sa kanilang mga paparating na bagong buhay bilang miyembro ng presidential family.

Si Liza, ani Marcos, ay kailangang pansamantalang isuko ang kanyang posisyon sa kanyang law firm na M & Associates, na kanyang itinatag.

“Malungkot, dahil ito’y alam ko, nakita ko, pinaghirapan niya… talagang binuhos niya ang kanyang sarili dito, ang galing dito. From nothing, nagkaroon ng magandang law firm,” aniya na pinatutungkulan ang kanyang asawa.

“Wala tayong magagawa dahil siya ay magiging First Lady at kailangan niyang bitawan ang kanilang interes sa kanilang law firm,” dagdag pa ng president-elect.

Inihahanda na rin ng panganay na anak ni Marcos na si Sandro ang kanyang bagong opisina para sa kanyang trabaho bilang kinatawan ng Ilocos Norte.

“Iyong dalawa ko pang anak, dahan-dahang nasasanay dahil marami silang bigla na security. Panay nga reklamo. Pero wala tayong magagawa, ganoon talaga ‘pag ikaw ay naging anak ng presidente,” dagdag pa ni Marcos Jr.

Samantala, sa kanyang vlog, pinasalamatan din ni Marcos si Pangulong Rodrigo Duterte sa kanyang pag-alis sa pwesto sa Huwebes, Hunyo 30.

“Kasama na rin ako… na magpaparating ng aking pagsaludo at pasasalamat sa kanilang makasaysayang pamumuno,” anang president-elect. RNT