Pera padala ng overseas Pinoy, tumaas ng 5.7%

Pera padala ng overseas Pinoy, tumaas ng 5.7%

January 16, 2023 @ 5:20 PM 3 weeks ago


MANILA, Philippines – Tumaas ng 5.7% ang cash remittance mula sa overseas Filipinos na umabot sa $2.64 bilyon noong Nobyembre 2022, mas mataas sa %2.50 bilyon sa kaparehong buwan ng taong 2021.

Sa ulat ng Bangko Sentral ng Pilipinas (BSP) nitong Lunes, Enero 16, ang paglago ng cash remittances sa pamamagitan ng mga bangko ay dahil sa paglago din ng padala na natatanggap mula sa land at sea-based workers.

Mula Enero hanggang Nobyembre 2022, naitala ang $29.38 bilyon na cash remittance, mas mataas sa $28.43 bilyon naman na naitala sa kaparehong panahon noong 2021.

“The growth in cash remittances from the United States (US), Saudi Arabia, Singapore, and Qatar contributed largely to the increase in remittances in January-November 2022. Meanwhile, in terms of country sources, the US posted the highest share of overall remittances in the first eleven months of 2022, followed by Singapore and Saudi Arabia,” saad sa pahayag ng BSP.

Samantala, tumaas din ng 5.8% ang personal remittances o mula $2.77 bilyon noong Nobyembre 2021 sa $2.93 bilyon noong Nobyembre 2022.

Lumago rin ng 3.4% ang personal remittances sa unang 11 buwan ng 2022 sa $32.65 bilyon kumpara sa $31.59 bilyon sa kaparehon panahon noong 2021.

Itinuturong isa sa dahilan sa pagtaas ng remittance sa bansa ay ang noon ay papalapit na Christmas holidays at ang mataas na palitan ng piso kontra dolyar. RNT/JGC