PERA-PERA SA TRAFFIC LIGHT AT ‘YANG BUWISIT NA NCAP
January 27, 2023 @ 10:55 AM
2 months ago
Views: 43
Frederick Cabalbag2023-01-30T11:07:40+08:00
KASALUKUYANG dinirinig sa Supreme Court ang problema sa Non-Contact Apprehension Policy.
Kabilang sa mga pangunahing pinagtatalunan ang mga ligal na usapin dito gaya ng paninindigang ang kasalanan ni Pedro, kasalanan din ni Juan.
Ibig sabihin, kung lumabag sa batas-trapiko si Juan na tsuper, lumabag na rin si Pedro na rehistradong may-ari ng sasakyan at sila o kumporme sa kanila ang magbabayad ng multa.
Pero meron ding ibang mga usapin na napakahalaga.
Kahit saan sa Metro Manila, maraming depektibong traffic light at kasama rito ang sobrang bilis na pagpapalit ng traffic light mula green na go sa red na stop at doon na nagkakahulihan sa NCAP.
Binibilang natin ang palitan ng green at red light, wala pang tatlong segundo.
Paano kang hindi makalalabag n’yan?
Por dios por santo, napakamamahal pa naman ang mga multa.
Kaya sumpa at disgrasya sa mga motorista ang NCAP at kung may grasya man dito, swak lang sa bulsa ng Local Governement Unit at Metro Manila Development Authority at mga kakontrata nilang mga traffic system provider.
‘Di ba daan-daang milyon o bilyong piso ang kontrata sa pagtatatag ng NCAP kaya hinahabol nila ang pagbabalik ng puhunan nila, kasama na ang kita nilang ligal at korapsyon, kung meron man!
Isa pa, sinasabi nilang pwedeng umapela ang mga motorista, pero pipilitin kang magbayad muna ng multa.
Sa kalagayang ito, mga brad, kailangan mo ang abogado para gumawa ng tamang anyo at laman ng papeles para sa kaso.
Eh magkano ang acceptance fee ng abogado at kailan matatapos ang kaso na sa bawat pagdinig o hearing? Eh, minimum na P3,000 hanggang P5,000 ang ibibigay sa abogado.
Halimbawang mananalo ang motorista, ilang taon ang aabutin ng kaso sa mga apela hanggang magkaroon ang SC ng desisyon dito na may malaki pa ring gastos sa abogado?
Motorista, kawawang tunay sa NCAP.
March 25, 2023 @1:37 PM
Views: 17
INIULAT natin kamakailan ang habambuhay na pagkakulong bilang pinakamatinding parusa laban sa ilang gawaing sa Lesbian, Gay, Bisexual, Transgender and Queer (LGBTQ) sa Uganda.
Pero bago matapos ang sesyon ng mga mambabatas, isiningit nila ang parusang bitay bilang pang-Ultimo Adios sa “aggravated homosexuality.”
Sa 389 mambabatas sa kanilang parliamento, dalawa lang ang hindi sumang-ayon.
Noong 2019, binura na ang parusang bitay ngunit ngayon ibinalik nila laban sa LGBTQ.
Sinabi naman ni Pangulong Yoweri Museveni, lihis o taliwas ang mga LGBTQ sa lipunang Uganda at hindi dapat na ipilit ng ibang mga bansa ang kanilang kagustuhan sa kanyang bansa.
Pinatutungkulan nito ang mga bansang Europa, US, Canada at iba pa na nag-iisip na hindi susuporta nang pinansyal at iba pa sa Uganda na ayaw sa LGBTQ at may parusang kamatayan.
Kabilang sa inilistang mga krimeng LGBTQ na pinarurusahan ng kamatayan ang pakikipag-sex sa 14 pababa at sa 75 anyos pataas; sa persons with disabilities at may diperensya sa utak; ng may dalang nakahahawa at walang gamot na sakit gaya ng human immunodeficiency virus at acquired immune-deficiency syndrome; at magulang, guardian at paulit-ulit na paggawa ng krimen dito.
May 10 taong pagkakulong naman para lang sa mga nakikita o umaaming sila’y LGBTQ at habambuhay na pagkakulong naman ang para sa magsasamang same-sex.
Aabot naman sa 20 taong pagkakulong ang para sa mediamen na mag-interview sa mga LGBTQ, director ng mga pelikula at organisasyong mag-fund raising para maisulong ang mga karapatan ng mga ito, gayundin ang mga may-ari ng mga bahay o establisimyento na titirhan o rerentahan ng mga ito.
Ang mga abogado na magsusulong ng karapatang LGBTQ, masususpindihan ng lisensya sa loob ng 10 taon, maging ang mga pari o imam o pastor na magsasagawa ng same-sex marriage, wedding organizer, dadalo at sasaki sa kasal.
May 3 hanggang habambuhay na pagkakulong naman ang para may palatandaang LGBTQ, attempted homosexuality, pagtulong o pagpaparaya rito at sabwatan sa gawaing LGBTQ.
O esep-esep muna bago magladlad sa Uganda.
March 25, 2023 @1:26 PM
Views: 17
HAYUN na nga, nahatulan na ng 60-day suspension si Rep. Arnolfo Teves Jr. ng Negros Oriental dahil ayaw niyang bumalik mula sa Amerika at harapin ang mga paratang at kaso laban sa kanya dito sa Pilipinas.
Kakaiba ang ganitong sitwasyon na ang isang miyembro ng Kamara ay suspendihin ng mga kasamahan niya. At unanimous ang boto, 292 na Kongresista ang bumoto na ipataw ang parusa sa kanya.
Depensa ni Teves, kahit gusto nyang umuwi, mas natatakot siya sa mga banta laban sa kanya, kaya talagang mahihirapan siyang magpakita muli dito sa atin. Sagot naman ni Pangulong Bongbong Marcos, hindi siya dapat matakot. Kasi mayaman naman siya, meron siyang private jet at papaligiran daw ng mga pulis at sundalo ang airport na lalapagan niya, para lang ma-secure siya.
Ibang klase ano, VIP pa ang dating.
Diyan natin nakikita na meron talagang dalawang klase ng hustisya dito sa Pilipinas. Iba ang proseso ng hustisya para sa mayayaman at makapangyarihan. At iba naman ang giling ng hustisya para sa mga maliliit at mahihirap.
Kaya nga siguro walang tiwala ang mga ordinaryong
Pilipino sa batas at katarungan dito sa atin. Hindi patas ang pagtingin at pagtrato sa mga akusado at mga kriminal. Kung mapera ka, maraming paraan para iwasan mo ang aresto o kulong. Baka nga hindi ka pa masentensyahan, sa tagal at bagal ng andar ng kaso sa korte.
Pero kung busabos ka, at wala kang pampiyansa o pambayad sa de-kalidad na abogado, mabulok ka sa kulungan. Swerte mo na nga kung gumalaw ang kaso mo. Pinakamalas na nga talaga ‘yung mga napagbintangan lang o napasama lang sa mga nadampot ng mga awtoridad, kahit na wala naman talagang kasalanan.
Pero huwag tayong malinlang sa mga nangyayari. Sa katapusan, ang kaso ng pagpatay kay Gov. Roel Degamo at ang pagtago ni Teves ay awayan ng political dynasties. Away sa politika ito ng mga makakapangyarihan at mga mayayaman.
Tingnan natin kung magwawagi nga ang katarungan, o magwawagi ang lakas ng bulok na politika ng mga ganid sa kapangyarihan.
March 25, 2023 @1:16 PM
Views: 24
HALOS mag-iisang buwan na nang lumubog ang MT/ Princess Impress sa karagatan ng Naujan, Oriental Mindoro pero wala pang malinaw na resulta ang ginagawang magkahiwalay na inquiries ng pamahalaan at Senado.
Habang nagtatagal kasi ang pagsisiyasat ay humahaba rin ang paghihirap ng mga kababayan natin na naapektuhan ng oil spill sanhi ng pagkalat ng halos isang milyong litro ng industrial oil mula sa lumubog na barko.
Sa ulat, kontaminado na ng langis ang malawak na karagatan ng Oriental Mindoro at kanugnog na mga probinsya hanggang Verde Island sa Batangas na labis na nakaaapekto sa kabuhayan na umabot na sa mahigit 20,000 pamilya.
Sa isinasagawang pagdinig sa Senado, nadiskubre ang ilang paglabag sa alituntunin ng Maritime Laws, isa na ang ‘expired’ Certificate of Convenience ng naturang barko na ino-operate ng RDC Reield Marine Services.
Sa mga nangyaring sea tragedy, kundi sungit ng panahon ay kapabayaan, paglabag sa maritime laws ang puno’t dulo ng mga aksidente sa dagat na muling naulit sa Oriental Mindoro.
At kung may dapat sisihin sa paglubog ng barkong ito bukod sa may-ari at operator ng MT/Princess Empress, malaki ang pananagutan ng tagapamuno ng Maritime Industry Authority at Philippine Coast Guard, mga ahensyang nagpapairal ng batas ng sea transport.
Sa nangyaring oil spill, malinaw pa sa mainit na tanghaling tapat ang paglabag ng ship owner sa umiiral na maritime laws dahil naglayag ang barko na paso ang lisensiya, walang COC na hindi man lang sinita ng PCG at lumalabas na pinayagan naman ng coast guard authority na pumalaot.
Ilang beses nang nangyarii ang trahedya sa karagatan na ganon na lamang – walang natatanggal, napaparusahang mga maritime authority mula sa tagapagtaguyod ng maritime laws, lalo na sa panig ng MARINA at PCG.
Sa ilang bansa – halimbawa ang Japan, kapag may nangyaring malaking trahedya.tulad ng Oriental Mindoro oil spill, ang hepe ng ahensya na may kinalaman sa nangyaring sakuna ay nagbibitiw, kundi man ay nagpapakamatay dahil sa kanila, ang pagiging public servant ay sacred position na dapat pangalagaan, isapuso.
Ang Japan at America ay dalawa sa ilang bansa na sumugod para tumulong sa maituturing na pinakamatinding oil spill sa kasaysayan ng Pinas kaya kung may delicadeza sina MARINA Administrator Hernani Fabia at PCG Admiral Artemio Abu, aba’y bumitaw na kayo sa inyong mga puwesto.
March 25, 2023 @1:10 PM
Views: 19
Magkakaroon ng pagdilim ng kapaligiran partikular sa Quezon City dahil dito isasagawa ang pangunahing aktibidad kaugnay sa obserbasyon ng “Earth Hour 2023” sa ngayong Sabado (March 25, 2023).
Mula 8:30pm hanggang alas 9:30 pm ay papatayin ang sindi ng ilaw sa pamosong pylon at sa iba pang mga pampublikong gusali na nasa Quezon City, at inaanyayahan din ang business establishments at residential communities.
Kabilang ang Quezon City sa mahigit 7,000 na lungsod sa buong mundo at 193 countries na magiging sentro ng Earth Hour activities ngayong taon.
Napili ang Quezon City dahil sa pagiging finalists nito sa One Planet Challenge Cities noong 2021 at 2022 dahil sa mga inisyatiba nito kontra climate change.
Bago ang main event sa gabi, simula 4:30 ng hapon ay magkakaroon ng “Padyak ng Kababaihan para sa Kalikasan” cycling event, scavenger hunt para sa mga kabataan, may mga social enterprises sa Liwasang Aurora, at mga pagtatanghal.
Ito ang kauna-unahang in-person observation ng Earth Hour matapos ang COVID-19 pandemic. Ikalawang pag-kakataon na rin ito para sa Quezon City para manguna sa selebrasyon.
Maliban sa Quezon City ay magkakaroon din ng aktibidad sa –
– Cycling event sa Ormoc City, Leyte;
– Costume showcase contest made from recyclable materials ng Boys Scouts of the Philippines Metro Manila East Council;
– Earth Hour Virtual Run ng Pinoy Fitness; at
– Fun run and bike run sa Iriga City, Camarines sur
Nagsimulang obserbahan sa buong mundo ang Earth Hour noong taong 2007 sa Sydney, Australia sa pangunguna ng World Wide Fund for Nature. Dito sa Pilipinas, ay noong taong 2008 tayo nagsimulang lumahok at taon-taon mula noon ay nabibilang tayo sa “Hero countries” o mga nangunguna sa obserbasyon.
Sa ating mga simpleng kaparaanan ay maaari tayong makibahagi sa Earth Hour katulad nga ng pagpapatay ng ilaw at iba pang kagamitan na gumagamit ng elektrisidad at maaari rin ang hindi pagbubukas ng gripo.
Hindi naman kinakaila-ngan na lahat ng ilaw sa bahay, panatilihin ang substantial light at patayin ang mga hindi naman kinakailangan.
Ang obserbasyon naman ng Earth Hour ay simboliko, pagpapakita na kaya naman natin na maging responsableng mamamayan.
Ngayon pa lamang, binabati na natin ang mga organizer at lalahok sa Earth Hour ngayong Sabado. Congratulations po!
March 24, 2023 @12:28 PM
Views: 88
NGAYONG tag-init na at pinag-uusapan ang suplay ng tubig na maaaring magiging problema kahit saan, may ilang mahahalagang usaping dapat na pag-usapan.
SUNOG NA GAWA NG ADIK
Meron ba kayong alam na may mga sunog na kagagawan ng adik?
Kung wala, ang ULTIMATUM meron.
Heto sila.
Isa ang nangyari sa isang bayan sa Pampanga.
Anak mayaman ang mama at pinagtripan ang panununog ng kanilang bahay.
Bago mag-pandemic, dalawang beses namang nagkasunog sa Tambunting, Sta. Cruz, Manila.
Naiwang kandila ng mga nagsa-shabu ang pinagmulan ng sunog.
Pareho ang mga sunog na ito na hindi idineklara ng mga nakaaalam sa pangyayari sa mga imbestigador na bumbero.
Apat na taon na ang nakararaan, itong si Jhayson Camposano na kilalang adik umano sa Brgy. Tejeros, Makati, ang inakusahang nanunog ng isang bahay na ikinadamay ng iba.
Nanunog din ng bahay ang nakilalang adik rin umano na si Ramcy bucad, 22, sa Brgy. San Antonio, Minalabac, Camarines Sur noong Pebrero 2013.
Pagdating ng Setyembre 2013, nanunog din ng bahay ang umano’y adik din na si Oliver Abagon ng Brgy. Tabuc, Mobo, Masbate.
Ngayong tag-init, anak ng pitong putakte, mayroon kayang mauulit na panununog ng bahay na gawa ng mga adik sa droga?
Bukod sa pagkasira ng mga ari-arian, nasasayang lang ang napakahalagang tubig na dapat sana para sa inumin, gamit sa mga ospital, iskul at boiler ng mga pabrika.
Nawawalan din ng patubig sa mga puno at halaman na kung mananatiling buhay, eh, panlaban sa polusyon at nawawalan din ng patubig ang mga sakahan para sa pagkain.
PINEPERA
Nauunawaan natin ang pagtulong ng mga bumbero na magkaroon ng suplay ng tubig ang mga matataas na gusali na residential, ospital, komersyal, mall at iba pa.
Malinaw na panlaban sa sunog ang mga ito sa pamamagitan ng mga sprinkler, bukod sa pang-inumin na rin sa maraming tao at iba pang mahahalagang dahilan.
Pero kung inuubos ng mga bumbero ang mga laman ng mga fire hydrant para kumita, ibang usapan na ito.
Libre na ang diesel mula sa gobyerno sa fire truck na pang-deliver, kikita pa sila sa tubig ng kung ilang libo kada karga ng fire truck.
Pinapalusot ang mga tubig para sa mga swimming pool, pabrika at iba pa na dapat ang mga may-ari ng mga ito ang gagastos sa paggawa ng paraan na sila’y magkatubig.
Halimbawa, kumonek sila nang tama sa mga konsesyonaryo ng tubig o local water district.
DAPAT MAGBANTAY
O malinaw, mga Bro, na nasasayang ang tubig o sinuswitik ang tubig sa maraming pagkakataon.
Dapat mabantayan at isumbong sa mga kinauukulan ang lahat ng mga gumagawa nito para matigil ang pagnanakaw at pagsasayang ng tubig.
