MANILA, Philippines – Inaprubahan na ng Asian Development Bank ang $500 milyon o P27.2 bilyon policy-based loan na layong suportahan ang agrikultura ng bansa para masiguro ang long-term food security.

Sa pahayag nitong Biyernes, Enero 27, sinabi ng ADB na ang utang na ito ay susuporta sa Subprogram 2 ng Competitive and Inclusive Agriculture Development Program, na magpapaunlad sa agriculture sector sa pamamagitan ng trade policy at
regulatory framework reforms.

Layon din nito na palakasin ang public services at finance sector kabilang na ang proteksyon sa mga rural family.

“Extreme climate events and economic shocks are exacerbating the struggles of the agriculture sector to raise their productivity,” ani ADB Principal Natural Resources and Agriculture Economist for Southeast Asia Takeshi Ueda.

“This new loan aims to support the Philippines’ efforts to attain food security by building a competitive and inclusive agriculture sector that is characterized by improved efficiency, enhanced diversity, strengthened climate resilience, and higher farm incomes.”

Ayon pa sa ADB, ang bagong loan na ito ay susuporta sa inisyatibo ng pamahalaan kabilang na ang probisyon para sa unconditional cash transfers sa mga magsasaka, pautang sa maliliit na agriculture at fishery-based firms, mga magsasaka at mangingisda na naapektuhan ng pandemya.

Layon din na suportahan ng subprogram ang pamahalaan sa pagpapaigting ng planning at management ng land use at water resources.

Anang ADB, ang policy-based loans ay ibinibigay bilang suporta sa policy reform agenda ng pamahalaan.

Sinabi naman ni National Economic and Development Secretary Arsenio Balisacan na marami pang oportunidad ang nakikita ng pamahalaan para mapalakas ang agriculture sector ng bansa. RNT/JGC

ZAMBOANGA CITY – Patay ang isang barangay chairman at limang kasama nito matapos tambangan at paulanan ng matataas na kalibre ng armas ang kanilang sasakyan kahapon ng hapon, Enero 26 sa lungsod na ito.

Unang nakilala ang nasawi na si Punong Barangay Ali Manangca, ng Barangay Balubuan, Sirawai, Zamboanga del Norte habang inaalam pa ang pagkakakilanlan ng limang nasawi.

Habang agaw-buhay naman sa ospital ang dalawang pa nitong kasama.

Batay sa paunang imbestigasyon ng Sirawai Municipal Police Station, dakong 3:15 ng hapon nang maganap ang krimen sa national highway na sakop ng Barangay Piña.

Ayon kay Executive Master Sgt. Reymer Jun Pernito, sakay ang mga biktima ng Toyota Hilux nang bigla ng lamang silang harangin ng mga armadong kalalakihan at pinaulanan ng bala ng baril ang sasakyan.

Tinamaan ang mga biktima sa iba’t ibang parte ng katawan na agad ikinamatay ng lima kabilang si Mangca habang dinala naman sa ospital ang dalawa at patuloy na inoobserbahan.

Sa ngayon nagpapatuloy ang ginagawang follow-up investigation ng mga awtoridad para alamin ang tunay na motibo sa krimen at pagkakakilanlan sa mga suspek para sa agaran ikadarakip sa mga ito. Mary Anne Sapico

MANILA, Philippines – Nasabat ng mga awtoridad ang aabot sa P13.6 milyon halaga ng shabu mula sa isang residente ng Cebu City sa ikinasang buy bust operation nitong Huwebes ng gabi, Enero 26.

Ayon kay Police Colonel Rommel Ochave, Cebu Police Provincial Office (CPPO) director, kinilala ang suspek na si Lunicito “Looney” Labitad, 38-anyos at residente ng Barangay Quiot Pardo ng nabanggit na lungsod.

Si Labitad ay kabilang sa listahan ng Unified PNP-PDEA Top 10 Regional Priority Target pagdating sa illegal na droga.

Nakuha mula sa kanya ang dalawang kilo ng hinihinalang shabu na mayroong estimated value na P13.6 milyon.

Sa kasalukuyan ay hawak na ng pulisya ang suspek at mahaharap sa kasong paglabag sa Republic Act 9165 o Comprehensive Dangerous Drugs Act of 2002. RNT/JGC

ILOCOS SUR – Tigok ang isang 53-anyos na misis matapos mabangga ng isang kotse sa Brgy. Quinsoriano ng lalawigang ito kahapon ng umaga, Enero 26.

Kinilala ng Sta. Cruz Municipal Police Station ang biktima na si Gemma Calanno y Jacobe, residente ng naturang lugar.

Nakilala naman ang driver ng Honda CRV Sports Utility Vehicle na si Norman Zapata y Galvez, 53, may asawa, residente ng Brgy. Sta. Lucia, Narvacan, Ilocos Sur.

Bumibiyahe ang SUV patungong timog na direksyon sa national highway ng nabanggit na lugar nang biglang tumawid ang biktima galing ng silangan patungong kanluran.

Dahil dito, aksidenteng nabangga ng kotse ang biktima.

Ang biktima na nagtamo ng sugat sa iba’t ibang parte ng kanyang katawan ay agad na isinugod sa Ilocos Sur District Hospital sa Sta. Lucia, Ilocos Sur ng mga rumespondeng miyembro ng MDRRC ng Sta. Cruz, Ilocos Sur.

Gayunman, ang biktima ay idineklarang dead-on-arrival ng umatending doktor.

Hindi naman nasaktan o nasugatan sa naturang aksidente ang driver ng SUV. Rolando S. Gamoso

JAPAN – Patay ang walo katao kabilang ang anim na Chinese national sa lumubog na barko sa dagat na sakop ng Japan.

Ito ang ibinahagi ng isang Chinese diplomat at Japanese coast guard nitong Huwebes, Enero 26.

Sa impormasyon, nagpadala ng distress signal ang Jin Tian sakay ang mga crew mula China at Myanmar nitong Martes ng gabi sa lokasyon nito na 110 kilometro kanluran ng Danjo Island, southwestern Japan.

Gumamit naman ng satellite phone ang kapitan ng barko upang sabihin sa South Korean coast guard na aalis na ito at ang kanyang mga crew dahil lumulubog na ang sinasakyan ng mga ito.

Nakibahagi naman ang iba’t ibang barko at eroplano ng Japan coast guard para sa paghahanap sa mga ito, na kalaunan ay nakita ang 13 crew members.

Tumulong din ang tatlong pribadong barko sa lugar para sagipin ang lima pang stranded crew members.

Sinabi naman ng China consul general sa Fukuoka na si Lu Guijun, na sa 13 crew members na natagpuan, walo sa mga ito ang kumpirmadong nasawi.

“Five of them — including four Chinese crew members — are not in life-threatening conditions,” dagdag ni Guijun.

“We express our deepest condolences to the unfortunate victims.”

Kinumpirma rin ng Japanese coast guard na kasama ng 6 na Chinese crew member na nasawi, dalawa naman ang mula sa Myanmar.

Mayroon pang 9 katao ang patuloy na pinaghahanap, apat mula sa China at lima mula sa Myanmar.

Nagpaabot naman ng pakikiramay ang mga opisyal mula sa local Chinese mission sa pamamagitan ng pagdadala ng bulaklak.

Binisita rin ng mga ito ang mga survivors na sinabing tutulungan sa pamamagitan ng pagbibigay ng kasuotan, pagkain at inumin.

Ang 6,651-ton Jin Tian ay nakarehistro sa Hong Kong.

Matatandaan na noong 2020, isang cargo ship din na may sakay na 43 crew at 6,000 baka ang lumubog sa dagat na sakop ng southwestern Japan dahil naman sa bagyo. RNT/JGC