Pinay, trending sa maling representasyon ng bansa sa isang travel video

Pinay, trending sa maling representasyon ng bansa sa isang travel video

July 30, 2018 @ 3:05 PM 4 years ago


Manila,Philippines – Inulan ng batikos ang Pinay na kumatawan sa bansa sa isang video project ng isang travel and lifestyle magazine.

Sa video serye ng  pinamagatang ”Many People Many Place’, ipinapakita dito ang pinagkaiba ng mga lenggwahe at kultura ng 70 mga bansa, pero ang pambato ng Pinas, tila hindi ‘raw’ nakapag-review ayon sa mga netizen.

Sa unang video kung saan ipakikita kung ano ang sinasabi ng mga tao kapag magto-toast ang mga ito sa kani-kanilang mga bansa, imbes na ‘tagay’ o kampay na gamit ng Pinoy, salitang Ingles na ‘cheers’ ang binanggit nito.

Banggit pa ng Pinay, “there’s actually no cheers in the Philippines, but since it’s Americanized ‘cheers’.”

Hindi pa dito natapos dahil nang pakantahin naman ng Noypi version ng ‘Happy Birthday’,imbes na ‘Maligayang Bati’ ang kantahin eh, ingles din ang kinanta nito.

Dito na nagsimulang mag-init ang mga ulo ng mga Pinoy netizen at ang iba ay sa mismong producer na ng video nagbigay ng mensahe.

Lalo pang na-bash ang Pinay sa video ng mga tongue twister ay sinabi rin nito nawalang tongue twister sa bansa.

Ilan sa mga sikat na tongue twister sa Pinas ay ang ‘Botika, Bituka, Butiki’ at ang ‘Minekano ni Monico ang makina ng manika ni Monica.’

Marami ang nadismaya dahil tila hindi nabigyan ng patas na tyansa ang Pinas na ipamalas ang sariling wika at kultura sa mga napanood na video. (Remate News Team)