USON, Masbate- Sugatan ang isang pulis sa pagsabog ng Improvised Explosive Device (IED) na hinihinalang itinanim ng mga teroristang New People’s Army (NPA), kagabi sa bayang ito.

Kinilala ang biktimang si Patrolman Ragan Tumbaga Victor, miyembro 4th Platoon, 2nd MPMFC (Masbate Police Mobile Force Company) Cataingan, Masbate.

Batay sa report ng Uson Municipal Police Station, dakong alas-9:40 ng gabi naganap ang pagsabog sa gilid ng National Road sa Marcella, Uson, Masbate.

Ayon kay Police Major Carlos Estonilo Jr. ng 2nd MPMFC, habang sila ay nagbibigay ng seguridad sa mga bagong talagang tauhan sa lugar ay biglang may sumabog sa gilid ng kalsada sa nasabing lugar.

Sa lakas ng pagsabog nagtamo ng sugat si Victor at kaagad na dinala sa Armenia Detachment sakop ng Barangay Armenia, Uson para malapatan ng paunang lunas.

Sa ngayon nagpapatuloy ang ginagawang imbestigasyon ng mga awtoridad para sa ikadarakip sa mga responsable sa naturang pagsabog. Mary Anne Sapico

CATMON, Cebu- Nanganganib na masibak sa serbisyo ang isang guro matapos ireklamo ng panggagahasa ng 15-anyos na dalagitang estudyante sa loob ng kanilang silid-aralan, iniulat kaninang umaga sa bayang ito.

Ayon kay Police Capt. Teofilo Manlanat, hepe ng Catmon Police Station, nagtungo sa kanilang tanggapan ng biktima na itinago sa pangalan Nena, para pormal na magsampa ng kasong Rape laban sa kanyang 38-anyos na titser na itinago sa pangalang Doroy.

Batay sa report ng pulisya, dakong alas-6:30 ng umaga noong Marso 24, 2023 naganap ang insidente sa loob ng comfort room ng paaralan sa nasabing lungsod.

Nakasaad sa reklamo ni Nena, maraming beses siyang ipinatawag ng guro (suspek) sa loob ng kanilang silid-aralan pagkatapos ay inutusan siyang sumama sa loob ng comfort room, kung saan ini-lock ang pinto saka isinakatuparan ng suspek ang makamundo nitong pagnanasa.

Sa ngayon hinihintay na lamang ng pulisya ang resulta ng medical examination ng biktima saka isasampa ang kasong Rape laban sa suspek. Mary Anne Sapico

MANILA, Philippines- Tumanggap ang lokal na pamahalaang lungsod ng Navotas ng papuri mula sa Anti-Red Tape Authority (ARTA) bilang isa sa natatanging Local Government Units (LGUs) sa pagbibigay ng business permit, lisensya at paglalagay ng electronic Business One-Stop Shop (eBOSS).

Iginawad ang papuri sa lungsod base sa pagtugon nito sa Ease of Doing Business Law kasunod ng inspeksyon at pagsusuri na isinagawa ng ARTA-Compliance Monitoring and Evaluation Office (CMEO).

Mismong si Sec. Ernesto V. Perez, Director General ng ARTA ang nagbigay ng sertipiko kay Navotas City Mayor John Rey Tiangco.

“We are grateful to ARTA for granting us this recognition. This is a testament to our city government’s commitment to provide the highest level of service to our constituents,” ani Tiangco.

Sa pamamagitan ng pasilidad ng eBOSS sa lungsod ang mga negosyanteng Navoteño ay mabilis makapag-apply, renew at pagbabayad ng kanilang mga permits kahit sa kanilang bahay o tanggapan lamang.

Ang digitalization ay upang matiyak at maiwasan ang mga pagkakataon ng red tape at katiwalian at kung maaari ay mababawasan ang mga ito at maalis.

Samantala, ang Navotas ay isa sa 6 sa Metro Manila LGUs na nakasunod sa mandato ng eBOSS habang pinuri rin ni Sec. Perez ang lungsod sa konstruksyon ng One-Stop Shop na nakapagpapagaan at nakapagpapabilis ng mga dokumento. R.A Marquez

MANILA, Philippines- Isang British national na nasa listahan ng High Value Individual (HVI) at tatlong iba pa ang naaresto sa isinagawang buy-bust operation sa parking lot ng Nomo Mall Bacoor City, Cavite.

Kinilala ang mga naaresto na si Nathan Colquhoun, 47, isang British national, nasa gustong gulang at nasa listahan ng HVI, John Edric Kintana, alias Tol, 22, Shicille Delos Santos, 39 at John Jacob Kintanar,nasa listahan ng Street Level Individual (SLI).

Ayon sa report, dakong alas-9 ng gabi nang nagsagawa ng buy-bust operation ang mga operatiba ng Drug Enforcement Unit (DEU) ng Bacoor City Police sa parking lot ng NOMO Mall sa Brgy San Nicolas 1, Bacoor City na nagresulta sa pagka aresto sa mga suspek at pagkakarekober ng tinatayang 20 gramo ng marijuana , pouch at buy bust money.

Sinampahan na ng kasong paglabag sa Sec. 5, 26 at 11 Art II ng RA 9165 ang mga naarestong suspek. Margie Bautista

MANILA, Philippines- Itinalaga bilang Acting Chief ng Bureau of Jail Management (BJMP) si Jail Chief Superintendent Ruel Silva Rivera, na siyang Deputy Chief for Administration, na nangakong ipagpapatuloy ang mga programa ni outgoing Chief Jail Director Allan Iral, na nakatakdang bumaba sa pwesto mula sa serbisyo ngayong Hunyo 2023.

Sinabi ni DILG Secretary Atty. Benjamin Abalos Jr. na siyang nanguna sa Turnover of Command ng dalawang opisyal ng BJMP na ginanap sa Philippine National Police Star Officers’ Lounge, National Headquarters Building sa Camp Crame, Quezon City, kahapon.

Sa kanyang mensahe, ipinahayag ng SILG Abalos ang kanyang buong suporta sa bagong luklok na Acting Chief ng BJMP.

“I am confident that you have the competence, General Ruel [Rivera], and the ability to lead the BJMP in ensuring the vision of the Bureau to efficient and effective implementation of the J.A.I.L. [Journey for Advancement, Innovation, and Long-term Development Plan 2040].”

Higit pa rito, hinimok ni Abalos ang BJMP na patuloy na palakasin ang mga programa sa rehabilitasyon ng Jail Bureau lalo na, para sa mga persons deprived of liberty (PDL) na kinasuhan ng paglabag sa RA 9165.

Isang miyembro ng PATNUBAY Class of 1995, tumanggap si Rivera ng kanyang degree sa Public Safety mula sa Philippine National Police Academy (PNPA). Nagtapos siya ng Master’s in Public Administration sa Batangas State University at nakakuha ng Doctorate units sa Philosophy on Educational Management sa University of Rizal System.

Sa kanyang 28 taon sa serbisyo publiko, humawak si Rivera ng ilang kritikal na pagtatalaga sa BJMP. Isang field officer sa puso, umakyat siya sa ranggo simula warden ng municipal, city at district jails, bilang steward ng Manila City Jail noong 2011 kung saan ipinakilala niya ang konsepto ng PDL records digitization at pinasimunuan ang e-Dalaw System, ang unang electronic visitation system na nagbigay-daan sa mga pamilya at kaibigan ng PDL na makipag-usap sa kanilang mga nakakulong na kamag-anak sa pamamagitan ng digital na paraan.

Hindi siya umiwas sa pag-deploy sa iba’t ibang regional office bilang staff officer, Regional Chief of Directorial Staff at Assistant Regional Director, hanggang sa tuluyang pag-akyat sa pwesto ng Regional Director ng BJMP-MIMAROPA mula 2013 hanggang 2014.

Si Rivera ay naging Chief of the Finance Service Office ng NHQ, Director for Investigation and Prosecution, Director for Logistics, at Director for Comptrollership, bago sumali sa Command Group ng BJMP, ang decision-making body ng Jail Bureau, na nagsisilbing Chief of Directorial Staff noong 2017, Deputy Chief for Operations noong 2018, at Deputy Chief for Administration noong Hulyo 2019, kasunod ng pag-assumption kay Jail Director Iral bilang BJMP Chief. Jan Sinocruz