Manila, Philippines-Kinondena ng Bureau of Customs ang inilabas na ulat ng Senado kung saan idinawit ang pangalan ng limang matataas na opisyal ng ahensya sa pangunguna ni Comm. Rey Leonardo Guerrero na umano’y sangkot sa pagpupuslit sa bansa ng mga gulay at karne o ‘agricultural smuggling.’

Sa inilabas na pahayag nitong Martes, Hunyo 28, 2022, mariing itinanggi ni Guerrero ang ginawang pagdamay ng Senado sa kanyang pangalan at apat pang opisyal ng ahensya sa isyu ng agricultural smuggling, batay sa isang ‘validated list’ ng umano’y mga smugglers at kanilang mga protektor na natanggap ng Senado noong isang buwan at isinama sa Senate Committee Report 649.

Isinapubliko ni Senate President Vicente Sotto III ang nilalaman ng ulat nitong Hunyo 22, 2022.

“I vehemently deny the accusations against me on my alleged involvement in agricultural smuggling based on a supposed ‘validated’ list (of the Senate),” ani Guerrero.

Sa bukod na panayam ng media, hinamon din ng Customs Chief ang kanilang mga kritiko na sampahan na lamang sila ng kaso sa korte upang maidepensa ang kanilang mga sarili.

“Alam natin kung ano and due process, ‘di ba? Kung talagang may involvement kami, kasuhan kami para maipagtanggol namin ang sarili namin,” aniya pa.

Bukod kay Guerrero, idinawit din sa listahan sina: Deputy Commissioner for Intelligence (IG) Raniel Ramiro; Atty. Vener Baquiran, Deputy Commissioner for Revenue Collection and Monitoring (RCMG); Atty Yasser Abbas, Director, Import Assessment Service (IAS); at, Jeoffrey Tacio, Director, Customs Intelligence and Investigation Service (CIIS), ang ‘operational arm’ ng IG.

Kinuwestyon din ni Guerrero ang kredibilidad ng listahan na inilabas ng Senado, matapos itanggi ng National Intelligence Coordinating Agency (NICA) na sa ahensiya nanggaling ang listahan na ikinakalat ngayon ni Sotto.

Sa bukod na panayam ng midya kay NICA director Edsel Batalla, sinabi nitong hindi NICA ang pinanggalingan ng listahan, taliwas sa mga pahayag ni Sotto. Magkaiba rin aniya ang listahan ng NICA at ang listahan na ibinulgar ni Sotto.

“The list did not come from NICA… we (NICA) do have our own list, but it is different from the one that was published (by) the committee,” ani Batalla, na kinatawan ng NICA sa mga naging pagdinig ng Senado.

Bukod sa NICA, pinansin ni Guerrero na tumanggi rin ang Sandatahang Lakas at Philippine National Police na sa kanila nanggaling ang listahan na ikinakalat ngayon ni Sotto.

Ayon naman sa isang source na malapit kay Guerrero, sadyang “nagulat” sila sa ulat ng Senado dahil sa unang pagdinig pa lang noong Disyembre 14, 2021, hinamon na ni Guerrero ang mga senador at mga kritiko na ibigay sa kanya ang umano’y pangalan ng mga tiwali sa BOC upang maimbestigahan at masibak sa puwesto kung kinakailangan, sa halip na batuhin ng akusasyon ang ahensiya ng walang inilalabas na ebidensya.

“Hanggang sa natapos ang pagdinig ng Senado at lumabas ang report nito, wala namang ibinigay na kahit isang pangalan ang mga nag-aakusa kaya talagang nagulat kami,” dagdag pa ng source.

Sa magkabukod na pahayag, mariin ding kinondena nina Baquiran, Ramiro at Tacio ang ulat ng Senado, kasabay ng paglalahad ng mga naging resulta ng kampanya ng kani-kanilang tanggapan laban sa smuggling.

Ani Baquiran, dinaluhan niya ang lahat ng mga naging pagdinig sa Senado kung saan kahit minsan, ay walang ibinatong akusasyon sa kanya ang sino man.

“I categorically deny the allegations against me that I am involved in agricultural smuggling. These imputations are malicious and false. In all these hearings, no wrong was ever imputed against me,” anang opisyal.

Aniya pa, sa 111 kasong kriminal hinggil sa agri smuggling na isinampa ng BOC, 73 sa mga ito o 66 porsiyento ay naisampa sa ilalim ng kanyang pamamahala sa RCMG.

Ayon naman kay Ramiro, 93 insidente ng agri smuggling na may halagang higit P419 milyon ang binigo ng BOC noong 2019; higit P224 milyon noong 2020; at higit P1.227 bilyon noong 2021, sa pagsisimula ng pagdinig ng Senado.

Sa kasalukuyan, aniya pa, umabot na sa higit P286 milyon ang halaga ng mga nakumpiska nilang agri products kung saan noon lang isang linggo, aabot sa higit P124 milyon ang nakumpiska nilang mga produkto mula sa bansang China.

Mariin din ang pagtanggi ni Tacio sa pagkadawit ng kanyang pangalan, kung saan ipinunto rin nito ang walang humpay nilang operasyon sa mga daungan ng bansa at sa mga warehouses na hinihinalang imbakan ng mga puslit na produkto. RNT

Manila, Philippines-‘Fake health bill’ ang kontrobersyal na Vape Bill, kung kaya’t dapat lang itong i-veto ni Pangulong Rodrigo Duterte bago matapos ang kanyang termino sa Hunyo 30.

Ito ang nagkakaisang posisyon nina Senadora Pia Cayetano at isang grupo ng mga doktor na mariing tumututol sa pagsasabatas ng naturang panukala.

Nauna rito, kinastigo ni Cayetano ang aniya’y ‘last-minute transmittal’ ng Kamara ng enrolled copy ng Vape Bill sa tanggapan ng Pangulo.

Aniya, ang opisyal na submisyon sa Malacañang ay naganap noon lamang Biyernes, Hunyo 24, bagama’t limang buwan na ang lumipas mula nang ipasa ng Senado at Kamara ang bicameral version ng Vape Bill noong Enero 26.

Para umanong sinadya ito, ayon sa senadora, para ‘di na mapag-aralang mabuti ng papalabas na administrasyon ang kontrobersyal na panukala.

“Kahit maikli na lang ang nalalabing panahon sa panunungkulan ni Pangulong Duterte, umaasa ako na hanggang sa huling saglit ay maninindigan siya para sa kalusugan ng mga Pilipino. Mahal na Pangulo, please veto the Vape Bill,” apela ni Cayetano.

Dagdag naman ni Dra. Maricar Limpin, pangulo ng Philippine College of Surgeons, nagpapanggap na ‘pro-health’ ang Vape Bill dahil ang totoo’y pahihinain nito ang mga regulasyon ng pamahalaan patungkol sa e-cigarettes at vapes sa ilalim ng Sin Tax Law.

Paliwanag ng doktora, tatanggalin ng Vape Bill ang regulatory authority sa e-cigarettes mula sa Food and Drug Administration at ililipat ito sa Department of Trade and Industry, kung kaya’t mawawalan ng ngipin ang gobyerno para epektibong mabantayan ang banta sa kalusugan ng naturang mga produkto.

Ayon pa rin kay Limpin, ibababa ng Vape Bill ang age of access sa e-cigarettes mula sa kasalukuyang 21 tungo sa 18 taong gulang.

Bukod dito, pahihintulutan ng Vape Bill ang pagbebenta ng iba’t ibang vape flavors. Ito’y taliwas sa kasalukuyang regulasyon na naglilimita lang sa dalawang flavors: plain menthol at plain tobacco.

Samantala, sinabi ni Dra. Riza Gonzalez, chairperson ng Philippine Pediatric Society Tobacco Control Advocacy Group, na mga kabataang Pilipino ang tunay na target market ng Vape Bill, kung kaya’t dapat lang itong i-veto ng Pangulo.

“FDA ang dapat maging regulatory body, at dapat ma-implement ang flavor restrictions na attractive sa mga bata,” diin pa nya.

Para naman kay Dr. Ulysses Dorotheo, Executive Director ng Southeast Asia Tobacco Control Alliance, Pilipinas na lang ang tanging bansa sa rehiyon na hindi health department ang nangangasiwa sa regulasyon ng sigarilyo at tobacco products.

Kung kaya’t sang-ayon sya sa pinakahuling desisyon ng Korte Suprema na inilabas noong Hunyo na pumapabor sa FDA bilang regulator sa aspetong pangkalusugan ng sigarilyo.

Diin pa ni Dr. Dorotheo, pinalalakas ng Supreme Court decision ang panawagan ng medical associations at health advocates na i-veto ang Vape Bill. RNT

Quezon City, Philippines-Arestado ng mga operatiba ng Criminal Investigation and Detection Unit  ng Quezon City Police District ang nakilalang isang barangay kagawad ng Doña Aurora sa lungsod, matapos maaktuhang nagpapataya ng loteng kamakailan.

Sa operasyong ikinasa ni CIDU chief PLTCol Mark Julio Abong dakong 5:40 ng hapon noong Hunyo 20, nasakote ang suspek na si Elizer Dela Cruz y Delanon, 64 na taong gulang, may asawa at naninirahan sa 65 Lopez Jaina St., Barangay Doña Aurora ng lungsod.

Ito ay kaugnay sa pinaigting na pakikipag-ugnayan ng kapulisan sa pamayanan para sa malawakang kampanya laban sa lahat ng uri ng ilegal na sugal na iniutos ni QCPD District Director Remus Medina.

Batay sa ulat ni CIDU chief Abong kay QCPD Director Medina, naging epektibo ang partisipasyon ng isang concerned citizen na nag-ulat sa nagaganap na lantarang kolektahan ng pataya sa kahabaan ng Lopez Jaina Street sa nasabing barangay.

Naaktuhan ang suspek ng tropang inorganisa ni General Assignment Section OIC PEMS Rommel Merino na nagpapataya, kung saan nakumpiska ang kaniyang listahan ng mga numerong taya sa EZ2-loteng, ballpen at halagang p200 na koleksyon.

Si Dela Cruz ay sinampahan ng kasong paglabag sa Presidential Decree 1602 as amended ng Republic Act 9287 o EZ2/Loteng ng QCPD sa piskalya.  RNT

MASAYANG ibinalita ni Quezon City Mayor Josefina “Joy” Belmonte nitong Linggo na ‘di na kailangan pang pumila at pumunta ng City Hall ang mga may-ari ng negosyo upang kumuha o’ mag-renew ng kanilang business permit dahil isang “click” na lang ang kailangan sa pagproseso nito.

Ito ay matapos mag-100 percent online na, ang Business Permits and Licensing Department noong nakaraang linggo.

Bilang karagdagan sa online business permit application, ang mga may-ari ng negosyo ay maaari na ring humiling at magbayad para sa kanilang business tax assessment nang hindi bumibiyahe o pupunta pa sa city hall sa pamamagitan ng QC E-Services platform.

Sinabi ni Mayor Joy Belmonte na ang hakbang na ito ay bahagi ng streamlining efforts ng lungsod kasama ang online business permit application, na dati nang inilunsad noong Oktubre 2020.

“Ibinabalik namin ang pabor sa mga may-ari ng negosyo na kabilang sa mga pangunahing driver ng aming paglago. Sa pamamagitan ng paghahatid ng mga mahusay na sistema at serbisyo, matutulungan sila ng pamahalaang lungsod na makatipid ng oras at mas tumutok sa pagpapalago ng kanilang mga negosyo,” ani Belmonte.

Paliwanag naman ni Margie Santos, hepe ng BPLD, lahat ng may-ari ng negosyo na gustong humiling ng kanilang local business tax assessment ay maaari nang gawin ito sa pamamagitan ng QC E-Services portal (https://qceservices.quezoncity,gov.ph) sa ilalim ng “Pay Business Tax ” menu.

Aniya, ang parehong mga negosyong nakarehistro sa Bureau of Internal Revenue at hindi nakarehistro tulad ng mga sari-sari store ay maaaring gumamit ng online application.

Pinaalalahanan ni Santos ang mga nagbabayad ng buwis na ihanda ang lahat ng mga naaangkop na dokumento na dapat i-upload sa system tulad ng Notarized Monthly Gross Sales, Proof of Authority, Certificate of Authority mula sa DTI, at Mayor’s Permits ng iba pang sangay sa labas ng Quezon City.

Kapag naibigay na ang lahat ng kinakailangang impormasyon at naisumite ang mga dokumento, parehong ipapadala ang tracking number at resibo ng pagkilala sa pamamagitan ng nakarehistrong email address ng may-ari ng negosyo.

Aniya, pagkatapos masuri, depende sa pagkakumpleto ng mga dokumento at pagiging kumplikado, ipadadala ng City Treasury ang huling bayarin sa pagtatasa ng buwis sa pamamagitan ng portal. Lalabas din ang button na “Magbayad” sa page ng pagbabayad ng buwis sa negosyo ng user.

Maaaring pumili ang mga nagbabayad ng buwis sa pagitan ng online na pagbabayad sa pamamagitan ng GCash o Paymaya, o sa pamamagitan ng mano-manong pagbabayad sa alinmang sangay ng Landbank of the Philippines.

Pinaalalahanan din ni Belmonte, ang mga nagbabayad ng buwis na maging mapagbantay at mag-ulat ng mga fixer sa pamamagitan ng “People’s Corner” sa opisyal na website ng Quezon City Government, www.quezoncity.gov.ph.

Ngayong Lunes, ilulunsad ng BPLD ang Philippine Business Hub, isang livestream discussions sa Facebook page ng Philippine Business Hub – Central Business Portal, via Zoom meeting.