Police asset, binaril-patay

Police asset, binaril-patay

December 7, 2022 @ 11:35 AM 2 months ago


NEGROS ORIENTAL- Duguan bumulagta ang isang police asset matapos pagbabarilin ng riding in tandem suspect kagabi sa lalawigan ito.

Kinilala ang biktimang si Tyronne Fabella, 42 anyos at residente ng Brgy. Alangilan Sta. Catalina, Negros Oriental.

Batay sa report ng Sta. Catalina Municipal Police Station, dakong 8:00 PM naganap ang krimen ilang metro ang layo sa bahay ni Fabella.

Kwento ni Rosemarie, live-in partner ng biktima, matutulog na sana sila ng biglang may tumawag sa cellphone ng kanyang kinakasama.

Nagpaalam ang biktima mayroon silang operasyon subalit pinigilan niya ito dahil gabi na pero hindi nagpapigil ang una at nagtungo sa isang sasakyan na naghihintay sa labas.

Pagdating sa may sasakyan, bigla na lamang lumutang ang mga suspek sakay ng motorsiklo at pinagbabaril ang biktima na naging sanhi ng agaran nitong kamatayan.

Matapos ang krimen mabilis na tumakas ang mga suspek sa hindi malamang direksyon.

Sa pagresponde ng mga awtoridad sa lugaw ng pinangyarihan ng krimen nakapulot sila ng mga basyo ng caliber .45 na baril na hinihinalang ginamit sa pagpaslang sa biktima.

Inaalam na ng mga awtoridad ang tunay na motibo sa krimen./Mary Anne Sapico