Proteksyon sa Christmas shoppers, dapat paigtingin ng DTI – Gatchalian

Proteksyon sa Christmas shoppers, dapat paigtingin ng DTI – Gatchalian

December 5, 2022 @ 1:00 PM 2 months ago


MANILA, Philippines- Sa gitna ng biglaang pagdagsa ng mamimili bago sumapit ang Araw ng Pasko, sinabi ni Senador Win Gatchalian na sa ganitong panahon ay hindi dapat naaabuso ang karapatan ng mga mamimili, bagkus dapat nabibigyan pa ng mas matinding proteksyon ng Department of Trade and Industry (DTI).

Kaya’t sinabi ng senador na nais nitong amyendahan ang Consumer Act of the Philippines (Republic Act No. 7394) upang palakasin ang karapatan ng mamimili at pahusayin ang mga hakbang na dinisenyo upang protektahan sila.

Inihain niya ang Senate Bill 942 o Enhanced Consumer Act.

“Mahalaga na bigyan ng kapangyarihan ang mga konsyumer kaugnay sa pamimili para sa kanilang sarili at sa kanilang mga mahal sa buhay dahil kaakibat nito ang pagbibigay ng kapangyarihan sa mga negosyante na mapalago ang kanilang mga negosyo,” sabi ni Gatchalian.

Ani Gatchalian kailangang magkaroon ng Ingles o Filipino translation sa label ng mga produkto na nakasulat sa foreign characters o wikang banyaga bukod sa Ingles bago ito payagang makapasok sa bansa. Ito ay magbibigay-daan din sa mga awtoridad na matukoy kung ang mga produkto ay sumusunod sa labeling requirements upang mabigyan ang mga mamimili ng wastong gabay sa mga produktong binibili nila.

Ang panukalang batas ay naglalayong palawigin ang awtoridad na ipasara ang mga establisyimento na mahuhuli sa aktong nagbebenta ng mga substandard at mapanganib na mga produkto.

Hangad din ng panukalang batas na palawakin ang regulasyon sa proteksyon ng mga mamimili laban sa anumang marketing promotions na nakakapinsala sa kalayaan ng karaniwang mamimili sa pagpili ng mga produkto at serbisyo.

“Ang panukalang batas na ito ay naglalayon na lalo pang palakasin ang karapatan ng konsyumer sa bansa at lalo na ang maayos na pamantayan ng kalakalan para sa buong ekonomiya,” Gatchalian said.

Ang naturang panukala ay nagpapatibay ng mga patakaran na magsasaalang-alang sa walong pangunahing karapatan ng mga mamimili tulad ng karapatan sa pangunahing pangangailangan, karapatang pumili, karapatan sa representasyon, karapatang tumubos, karapatan sa edukasyon ng mamimili, karapatan sa kaligtasan, karapatan sa isang malusog na kapaligiran, at karapatan sa impormasyon.

Nakasaad din sa panukalang batas ang mga responsibilidad ng mga mamimili kabilang dito ang aksyon nila na tiyakin na ang kanilang mga karapatan ay protektado at hindi napagsasamantalahan. Ernie Reyes