IBAJAY, Aklan- SABOG ang bungo ng isang dating barangay chairman matapos tambangan at pagbabarilin ng hindi pa kilalang riding in tandem sa harap mismo ng kanyang asawa’t anak kagabi (Lunes) sa bayang ito.

Kinilala ang biktimang si Mhelvin Cabales, dating barangay chairman at residente ng Brgy. Bagacay, Ibajay Aklan.

Batay sa report ng Ibajay Municipal Police Station, dakong 6:48 PM naganap ang krimen sa may sementeryo sa Brgy. Poblacion, Ibajay.

Lumabas sa imbestigasyon ng pulisya, galing sa Brgy. Ondoy si Cabales kasama ang misis at 12-anyos nitong anak na lalaki matapos manood ng basketball kung saan isa sa mga anak nitong lalaki ang naglaro.

Pauwi na ang pamilya Cabales sakay ng motorsiklo na minamaneho ng biktima ng bigla na lamang silang tambangan ng mga suspek.

Paghinto ng motorsiklo ni Cabales dito na siya binaril sa ulo sa na naging sanhi ng agaran niyang kamatayan.

Matapos ang krimen mabilis na tumakas ang mga suspek sa hindi malamang direksyon.

Nagpapatuloy naman ang imbestigasyon ng pulisya sa nasabing krimen at hinihintay na lamang na makausap ng maayos ang misis ni Cabales dahil nakita niya mismo ang mukha ng mga suspek./Mary Anne Sapico

ORANI, BATAAN – Patay ang mag-ama sa sunog na umabo sa 15 kabahayan dito nitong Lunes ng umaga.

Iniulat ng Bureau of Fire Protection (BFP) na 10 bahay ang nawasak habang lima pa ang bahagyang nasira.

Ang sunog na nagsimula dakong alas-9:26 ng umaga ay idineklarang under control alas-10:05 ng umaga at fire-out alas-10:36 ng umaga.

Nagtulungan ang mga residente at mga bumbero sa pamamagitan ng pagbubuhos ng tubig sa apoy gamit ang mga balde at maliliit na hose.

Sinabi ni Barangay Pacar chair Pepito Dionisio na ang mga nasawi ay nakulong sa loob ng kanilang bahay at isinugod pa sa Orani District Hospital.

Kinilala ng pulisya ang mga biktima na sina Johnny Muyon, 56, at Janine Emerald Muyon, 20.

Sinabi ng Orani BFP na inaalam pa nila ang sanhi ng sunog at ang halaga ng pinsala sa mga ari-arian. RNT

ARITAO, NUEVA VIZCAYA-Hindi na umabot ng buhay sa pagamutan ang konductor ng Victory Liner Bus matapos itong bumangga sa nakaparadang trailer trak sa National Highway, Bone South, Aritao, Nueva Vizcaya.

Patungong timog na direksyon ang Victory Liner Bus na may body No 8134 at plate No NBD 1466 na minaneho ni Armanso Bautista, 58 anyos, residente ng Pangasinan.

Nang mangyari ang aksidente ay nasa gilid ng daan ang trailer trak na may head tractor No. 1380808883 at trailer bed No. AUA 8299 na nakarehistro sa pangalan ni Ariel Nolasco ng Bayombong Nueva Vizcaya at minaneho ni Amor Feliciano, 40 anyos at residente ng Salvacion, Bayombong Nueva Vizcaya.

Ayon sa isa sa mga pasahero na si Cristine Garcia, nagulat na lamang ito nang gumigilid na ang bus hanggang sa mabangga nito ang llikurang bahahi ng trak. Matapos ang banggaan, buhay pa umano ang konduktor na si Clifford Coronel Adaro at nakausap pa umano ng mga pasahero.

“Nakatayo yung konduktor sa harapang bahagi ng bus ng mabunggo kami hanggang di ko na namalayan kung ano ang nangyari, nakausap ko pa si mamang konduktor pagkatapos ng aksidente at inabot niya yung mga gamit ko ng bumaba na ko ng bus kaya nagulat ako nang sinabing patay na,” saad ni Garcia.

“Ang daming tao sa labas pero nakakasama lang ng loob dahil walang tumulong para makalabas kami, makikita mo na nagvivideo karamihan sa kanila, ako na lang gumawa ng paraan para basagin yung salamin,” dagdag ni Garcia na isa rin sa mga nasugatan sa insidente. Nataranta na umano ng mga pasahero matapos tumagas ang gasolina mula sa bus.

Nasugatan din ng pahinantenng trak na si Ever Legada na naisugod sa Rural Health Unit ng Aritao upang magamot kasama ang iba pang pasahero ng bus.

Inakala ng mga nakakita ng insidente na may pumutok na gulong ang bus subalit pinabulaanan ito ni Garcia.

“Maayos yung bus, walang problema, pero hindi ko alam kung bakit biglang gumewang pagilid yung bus,” sabi ni Garcia.

Sa ngayon ay nasa kritikal pa ang driver ng bus na nailipat sa R2TMC.

Hanggang sa ngayon ay patuloy pa rin ang isinasagawang imbestigasyon ng pulisya. Rey Velasco

COTABATO CITY- Nagkasa na ng malalimang imbestigasyon ang Cotabato City-PNP hinggil sa pamamaril sa sasakyan ni Atty. Ariff Lao, Maguindanao provincial director ng Bangsamoro Human Rights Commission (BHRC) noong Sabado sa lungsod na ito.

Ayon kay Colonel Querubin Manalang, city police director, dakong 7:00 PM ng Agosto 6, nakaparada ang sasakyan ni Lao sa kahabaan ng Sinsuat Avenue, ng nasabing lungsod.

Sa pagresponde ng mga tauhan ng mga pulis at Task Force Kutawato ng 6th Infantry Division, may dalawang tama ng 9mm na baril ang sasakyan ni Lao sa bandang upuan ng driver.

Batay sa imbestigasyon ng pulisya, dalawang lalaki na naka-motorsiklo ang dumaan sa nasabing lugar at pinagbabaril ang sasakyan ni Lao habang nakaparada.

Sinabi naman ni Lao, kasama niya ang kanyang buntis na misis at kababa lamang nila ng sasakyan para bumili ng hamburger sa isang restoran na nasa gilid ng kalsada.

Dito, bigla na lamang silang nakarinig ng magkasunod na putok ng baril.

“If he was indeed the target, he would have been shot as he alighted from his vehicle, too early to tell if indeed he was the target, we suspect it to be indiscriminate firing, our investigation is ongoing.” ani pa ni Manalang.

Samantala, kinondena naman ng BHRC ang posibleng pagtataka sa buhay ni Lao.
“This attempt on the life of human rights defender has no place in a just and civil Bangsamoro society,” it said, even as it urged authorities to probe the incident and “hold accountable the perpetrators”.

Sinabi pa ng BHRC na magsasagawa rin sila ng imbestigasyon para lumabas ang katotohanan hinggil sa nasabing insidente./Mary Anne Sapico

CAMARINES SUR- Arestado ang isang pulis na nasa listahan ng high-value target ng Philippine Drug Enforcement Agency (PDEA) sa isinagawang buy bust operation ng mga awtoridad nitong Linggo sa bayan ng Ocampo.

Kinilala ni PDEA Regional Office V Regional Director Gil Pabilonia ang nadakip na suspek na si Police Master Sgt. (PCMS) Romeo Penolio Jr, 43, ng Barangay Pinit, ng naturang bayan.

Dakong 7:30 PM naaresto ang suspek sa nasabing lugar ng pinagsamang pwersa ng PDEA Camarines Sur Provincial Office at Philippine National Police (PNP).

Ayon sa pulisya, inilatag ang operasyon laban sa suspek matapos makatanggap ng impormasyon hinggil sa iligal na aktibidad ni Penolio.

Nakuha sa suspek ang ilang pirasong plastic sachets na naglalaman ng 10 gramo ng shabu, buy-bust money, 2 cellphone, motorsiklo, 9mm Glock-17 pistol at iba’t ibang drug paraphernalia.

Nahaharap ngayon sa kasong paglabag sa Republic Act (RA) 9165 o kilala sa “The Comprehensive Dangerous Drugs Act of 200’’ si Penolio./Mary Anne Sapico