Pulis QC, sinibak sa pamamaril

Pulis QC, sinibak sa pamamaril

July 5, 2022 @ 5:11 PM 1 month ago


MANILA, Philippines – Sinibak ng Quezon City People’s Law Enforcement Board (PLEB) ang isang pulis dahil umano sa pamamaril sa isang lalaki habang nakipag-agawan gamit ang kanyang service firearm habang ipinapatupad ang election gun ban sa Barangay Greater Lagro, Quezon City.

Nabatid sa 10-pahinang desisyon, hinatulang guilty ng PLEB si PSMS Chester Garchitorena ng Conduct Unbecoming of a Police Officer at Grave Misconduct, ayon kay Atty. Rafael Calinisan, Executive Officer ng PLEB.

Ayon kay Calinisan si Garchitorena, na nakatalaga sa Criminal Investigation and Detection Group (CIDG) sa Camp Crame, ay tumanggap ng parusa ng dismissal sa serbisyo na may forfeiture of benefits at disqualification para sa muling pagtatrabaho sa anumang serbisyo ng gobyerno ayon sa pagkakabanggit.

Nag-ugat ang reklamo laban kay Garchitorena sa isang insidente noong Pebrero 18, 2022 bandang 11:30 ng gabi nang masangkot siya sa away sa pagitan ng complainant na si Florose Buenafe at mga kaibigan ng pulis na pinamumunuan ni Michael Parayno.

Sa kanyang reklamo sa PLEB, sinabi ni Buenafe na nagsimula ang komprontasyon nang sumenyas si Parayno ng masamang finger sign kay Levee Reynoso, na payapang nakikipag-hang-out kasama si Buenafe at kanilang mga kaibigan.

Nabatid pa sa ulat na sa pagsisikap na mabawasan ang tensyon, nilapitan ni Buenafe si Parayno, at inihatid ang huli sa kanyang sasakyan.

Sa pag-uudyok ni Buenafe, umalis si Parayno sa lugar.

Ilang sandali pa, bumalik si Parayno kasama ang kanyang mga kaibigan, kasama si Garchitorena, at naganap ang suntukan. Sa isang CCTV video, nakita si Garchitorena na may bitbit na sling bag na naglalaman ng kanyang government-issued firearm.

Sa paglilinaw ng pagdinig, napag-alaman na binaril ni Garchitorena si Buenafe sa kanyang binti habang binugbog ng iba pang kaibigan si Reynoso, na nagtamo ng bali sa bungo.

Samantala kaugnay nito sinabi ni Mayor Joy Belmonte, na nakakakdismaya na malaman na minsan nakakalimutan ng ating mga pulis ang kanilang sinumpaang tungkulin, at hinahayaan silang masangkot sa mga ganitong sitwasyon. Si Garchitorena ay kumilos sa paraang hindi karaniwan para sa isang miyembro ng unipormadong serbisyo. Santi Celario