Pulitika ‘di napapanahon – solon

Pulitika ‘di napapanahon – solon

March 15, 2021 @ 5:27 PM 1 year ago


Manila, Philippines – Nanawagan si Assistant Majority Leader at Quezon City Rep. Precious Hipolito-Castelo sa mga kapwa opisyal ng pamahalaan na magpatupad muna ng moratorium sa pulitika.

Binigyang diin ni Castelo na kalimutan muna ang anumang usapin at isyu sa pulitika at sa halip ay harapin muna ang tumataas nanamang bilang ng kaso ng COVID-19.

Ito ay dahil sa ngayon aniya na may pandemya ay nakasisira ang pulitika sa anumang aksyon na susugpo sa COVID 19.

Kung magkakaroon aniya ng moratorium sa pulitika ay mas magkakaroon ng focus ang pamahalaan sa paggamit sa mga resources at efforts kung paano tutugunan ang problemang isang taon nang nagpapahirap sa bansa.

Ani Castelo,  ang paglaban sa COVID-19 ay hindi lamang trabaho ng health sector kundi ito ay responsibilidad din ng mga nakaupo sa pwesto.

Binigyang diin pa ng kongresista na mas dapat iprayoridad ngayon ng mga opisyal ang pagtugon sa biglang pagtaas nanaman ng mga kaso ng COVID-19 sa bansa at pagpapabilis sa rollout ng bakuna. (Meliza Maluntag)