QCPD official, iba pa nahaharap sa reklamo ng cover-up

QCPD official, iba pa nahaharap sa reklamo ng cover-up

August 18, 2022 @ 1:25 PM 1 month ago


MANILA, Philippines – Nahaharap sa reklamo ang opisyal ng Criminal Investigation and Detection Unit ng Quezon City Police District at iba pang pulis.

Ito ay dahil umano sa cover-up ng isang hit and run incident na ikinasawi ng isang tricycle driver sangkot mismo ang naturang opisyal.

Ayon sa People’s Law Enforcement Board ng Quezon City, mahaharap sa reklamong grave misconduct, grave neglect of duty at conduct unbecoming of a police officer si QCPD-CIDU head P/Lt. Col. Mark Julio Abong.

Mismong ang mga kapatid ng biktima na sina Arlene Laroa Buenvenida, Annale Laroa Alba at Armida Laroa Carbonel ang naghain ng reklamo sa Quezon City Prosecutor’s Office noong Agosto 11 laban kay Abong.

Maliban dito, nagsampa rin ng reklamo ang mga kapatid ng biktima laban kina Station 3 Commander P/Col. Alexander Barredo at P/Cpl. Joan Vicente dahil sa hindi nito paghuli kay Abong kahit na naroon na mismo ang mga ito sa pinangyarihan ng insidente.

Dagdag pa nito, inireklamo rin ng pamilya ng biktima ang traffic investigator na si Jose Soriano dahil naman sa hindi pagtukoy kay Abong bilang driver ng nakabanggang Ford Ranger pick-up.

“Kung sana hindi pinabayaan ni Abong na mamatay ang aming kapatid, mapapatawad pa sana namin siya. Sana kaagarang dinala niya sa hospital. Pero hindi niya ginawa. Nakuha pa niyang pagtakpan ang kasalanan niya sa pamamagitan ng grand cover-up ng mga kapulisan,” ani Buenvenida.

“Nag-file kami ng kaso sa PLEB dahil sa tingin namin, dito na lang namin makakamit ang hustisya. Nag-usap usap ang mga pulis para pagtakpan ang insidenteng ito. Nakakapanlumo,” dagdag pa niya.

Ayon naman kay QCPD Director Nicolas Torre III, na-relieve na sa pwesto noong Martes, Agosto 16 si Abong at nangakong makikipagtulungan sa mga biktima. RNT