SC, naglista na ng papalit kay Sereno

SC, naglista na ng papalit kay Sereno

July 24, 2018 @ 5:06 PM 5 years ago


Manila, Philippines – Nasa 14 na mahistrado ng Korte Suprema ang inirekomenda sa Judicial and Bar Council (JBC)  bilang kapalit nang napatalsik na si Supreme Court Chief Justice Maria Lourdes Sereno.

Ginawa ni  Retired Sandiganbayan Justice  Raoul Victorino  ang hakbang dahil wala aniyang application para sa  nabakanteng posisyon ni Sereno.

Dean ng Philippine Christian University College of Law si Victorino at kumakatawan din sa pribadong sector.

Naniniwala si Victorino  na dahil sa delicadeza kaya walang sinumang kasalukuyang mahistrado ng Kataas-taasang Hukuman  ang interesado sa posisyon kaya aniya hindi makabuo ng shortlist ang JBC.

Kumbinsido rin si Victorino na mas makabubuting inominado ang mga mahistrado ng Supreme Court dahil mas kuwalipikado sila at alam na nila ang trabaho sa korte kumpara sa isang outsider. (Jocelyn Tabangcura-Domenden)