MANILA, Philippines – Nahagip ng pampasaherong jeep ang isang tauhan ng Manila Traffic and Parking Bureau (MTPB) habang nagmamando ng trapiko sa Recto, Maynila nitong Miyerkules ng umaga, Pebrero 1.

Sa inisyal na ulat, ang biktima mula sa sector 3 ng MTPB ay agad na naisugod sa pagamutan sanhi ng tinamong bali sa isang paa matapos maipit at magulong ng jeep.

Napag-alaman na hindi umano napansin ng tsuper ng jeep na may biyaheng Gastambide-Divisoria ang biktima.

Dinala na ang tsuper sa tanggapan ng Manila Traffic Enforcement Unit para sa imbestigasyon at posibleng pagsasampa ng reklamo laban sa kanya. Jocelyn Tabangcura-Domenden

MANILA, Philippines – Patay ang isang lalaki nang makaladkad ng tren ng Philippine National Railways o PNR, Miyerkules ng umaga, Pebrero 1 sa Batangas St., Tondo, Maynila.

Ayon sa mga residente sa lugar na sakop ng Baragay 221, hindi nila kilala ang biktima kaya nagpasiya maliban sa nakitang medical ID ng kanyang pagkakilanlan sa pangalang Deus Simbol, nasa hustong gulang na may address sa Llalana Street Tondo.

Alas-11 ng umaga nang maaksidenteng makaladkad ng tren na may body number na 1101 patungong Bicol ang biktima sa northbound lane ng riles ng tren.

Nasa tabi lamang umano ang biktima at sa hulihan ng tren na ito nahagip. Jocelyn Tabangcura-Domenden

MANILA, Philippines – Himas rehas ang dalawang kalalakihan nang arestuhin ng mga tauhan ng Special Mayor’s Reaction Team (SMaRT) sa magkakahiwalay na lugar makaraang masalisihan ang isang 28-anyos na doktor sa University of Santo Tomas (UST) Hospital sa Sampaloc, Maynila.

Batay sa ulat kay P/Maj. Edward Samonte, hepe ng SMaRT, nagtungo sa kanilang tanggapan ang biktimang si Paolo Larrazabal, binata, isang physician at residente sa Ermita, Maynila makaraang masalisihan ng mga suspek sa loob ng UST Hospital dakong alas 9:38 ng gabi nitong Lunes, Enero 30.

Dahil dito, agad nagsagawa ng “back tracking” ang mga awtoridad sa pamamagitan ng mga kuha sa CCTV camera kung saan namataan ang suspek.

Sa isinagawang imbestigasyon, bukod sa Apple iPhone 11 na kulay gray na nagkakahalagang P80,000, isang MacBook Pro 13 inches na kulay space gray na nagkakahalagang P90,000, nakuha din umano ng mga suspek ang Samsung AJ cellphone ng biktima na nagkakahalaga ng P10,000.

Agad nagsagawa ng operasyon ang mga awtoridad na nagresulta sa pagkakadakip sa suspek na si Andrian Sabido y Perez, alyas Ryan, 39, may-asawa, cellphone technician, ng Bicol Street, Payatas, Quezon City. Matapos nito ay nadakip din ang kanyang kasabwat sa isinagawang follow-up operation na kinilalang si Joemar Teodoro y Dialde, 31, cellphone technician, at residente ng Unit 516, Bldg 14, Permanent Housing Barangay 128 Balut, Tondo, Manila.

Nabatid sa imbestigasyon na nalimas din ang e-wallet (GCash) ng biktima na nagkakahalaga sa P46,000 cash.

Dahil dito, matapos mapag-aralan ng mga awtoridad, tinungo ang isang gasolinahan sa Quezon City at doon nakita ang plate number ng kotse, na ginamit ng isa sa mga suspek, matapos na maberipika sa LTO.

Ginamit umano ang GCash ng biktima ng isang alyas “Macmac” sa isang appliance center sa mall, bago naman nagpakarga ng gasolina ang isang suspek sa halagang P6,600.

Nasakote naman ang suspek na nagpakarga ng gasolina gamit ang GCash batay sa impormasyong nakalap at nabawi ang iPhone 11 ng biktima rito.

Ininguso naman nito ang kasabwat nito na nasa Payatas, QC habang patuloy na tinutugis ang dalawa pang suspek na may alyas Macmac at Umpong na sangkot umano sa paggamit ng GCash wallet ng doktor.

Ang dalawang nahuling suspek ay pawang mahaharap sa paglabag sa Article 308 ng Revised Penal Code (RPC) sa theft at RA (Republic Act 8484) o Access Devices Regulatory Act of 1998, at Anti-Fencing Law. JAY Reyes

Bulacan – Boluntaryong sumuko sa mga awtoridad ang isang magsasakang 19 anyos na umanoy dating miyembro ng New Peoples Army (NPA) sa bayan ng San Rafael.

Kinilala ni Bulacan Police director P/Col. Relly Arnedo ang sumukong si Alyas Ka Diego, residente Sitio Inuman, Brgy. San Lorenzo, Norzagaray.

Sa report ang pagsuko ay pinangasiwaan ng Bulacan 2nd Provincial Mobile Force Company (PMFC) kasama ang Provincial Intelligence Unit, Norzagaray police, 1st PMFC at 70th IB, PA bandang 1:30 ng hapon nitong Pebrero 1, sa Brgy. Sampaloc, San Rafael.

Sinasabing si Ka Diego na miyembro ng Guerrilla Front Narciso ng NPA ay kasamang kumikilos sa lalawigan ng Bulacan, Rizal, Aurora at Quezon.

Kasalukuyang nasa kostudiya ng 2nd PMFC ang sumukong si Ka Diego para sa investigation at custodial debriefing. Dick Mirasol III

MANILA, Philippines – Inilunsad ng lokal na pamahalaan ng Las Piñas ang kaalaman ng mga residente sa pagbibigay ng pansin sa adolescent issues ng kaisipan at reproductive health na may temang “Kalungkutan ay Agapan, Kabataan ay Protektahan”.

Sinabi ni Las Piñas City Mayor Imelda ‘Mel’ Aguilar na nilahukan ng mga estudyante mula sa high school at senior high school, out of school youth at ng Sangguniang Kabataan (SK) na naturang programa na umabot sa 400 indibidwal na ginanap sa Verdant Covered court sa Barangay Pamplona 3.

Dinaluhan din nina Vice-Mayor April Aguilar at Alelee Andanar ang kick-off ng mental health awareness project ng lokal na pamahalaan.

Ayon kay Aguilar, ang “Mental Health Awareness” program ay inorganisa ng City Health Office (CHO) sa ilalim ng pangangasiwa ng Dra. Julie Gonzales na ang layunin ay bumuo ng community resilience na tututok sa problema sa pag-iisip ng residente partikular ang mga estudyante at kabataan para maisailalim sa counseling at panggagamot.

Sa panig naman ni Dra. Gonzalez, plano ni Aguilar maglabas ng programa na makatutulong sa mga taong may problema sa pag-iisip dahil sa pandemya na idinulot ng COVID-19 na naranasan sa loob ng tatlong taon hindi lamang sa bansa kundi sa buong mundo.

Sinabi ni Gonzalez na nakibahagi ang Department of Education (DepEd) sa marangal na proyekto ni Aguilar na makatutulong sa mga estudyante na nakaranas ng mental issue mula nang ipatupad ang virtual learning noong panahon ng pandemya.

“Mayor Aguilar is very much supportive to the health of every resident especially among the youth which is part of her health advocacy,” ani Gonzalez.

Samantala, pinuri naman ni Metro Manila Center for Health Development- Department of Health (MMCHD-DOH) Regional Director Aleli Grace Sudiacal ang inisyatibo ng lokal na pamahalaan sa pagpapatupad ng proyekto na tumatalakay sa mental health awareness.

Dagdag pa ni Gonzales na kahit mahirap makamit ay umaasa pa rin si Aguilar na makapagtala ang lokal na pamahalaan ng zero sa bilang ng mental health issues sa lungsod. James I. Catapusan