SI CARLSON AT SI PBBM

SI CARLSON AT SI PBBM

July 28, 2022 @ 5:36 PM 2 weeks ago


TIYAK ang matibay na pagkakaibigan ng Amerika at ng Pilipinas nang magpugay ang bagong ‘envoy’ o kinatawan ng una, kay Pangulong Ferdinand Marcos, Jr. noong Biyernes (July 22, 2022).

Nagkusa si Ambassador MaryKay Carlson na bumati kay Pangulong Bongbong upang igiit ang matagal ng pagkakaibigang minana pa nila pareho sa mga unang naging lider ng dalawang bansa.

Inulit pa ni Carlson ang mensaheng ni US President Joe Biden kay PBBM nang manalo ito sa halalan noong Mayo – na ang bansang Amerika ay patuloy na nakataya sa malalim at patuloy na pagkakaibigan ng dalawang bansa bilang kakampi at kaalyado ng Pilipinas.

Sa kanya ring pagbisita sa Malaca├▒ang, iprinisinta ng American ambassador ang kanyang credentials kay PBBM matapos mabakante ng halos dalawang taon ang posisyon sa paglisan ni dating US ambassador Sung Y. Kim noong September 2020.

Si Carlson ay ikalawa ring ambassador na babae ng United States na naitalaga sa ating bansa. Ang una ay si Kristie Kenney na naglingkod mula noon 2006 hanggang 2010.

Ang kanilang paghaharap ni PBBM ang unang inatupag ni Carlson matapos itong dumating sa Pilipinas mula Washington DC noong July 21, 2022.

Magandang senyales ito sapagkat ipinaaalam ng bansang Amerika ang kanilang suporta sa bagong halal na Pangulo ng Pilipinas at ipinangangako pang muli ang kanilang pakikipagtulungan sa atin sa larangan ng seguridad, kaunlaran at kalayaan, na siyang pangunahing agenda rin ni PBBM.

Nabanggit pa nga ni Carlson na sila ay nakahanda ring palakasin ang kalakalan, mga programang haharap sa climate change, clean energy at proteksiyon sa kalikasan.

Isa lang ang ibig sabihin nito, si PBBM at ang bansang Pilipinas ay may matikas na kasangga. Yan ay maliban pa sa isang matikas na din na kasangga – ang bansang Tsina, na agad pinagpugay kay PBBM ang kanilang State Councilor at Foreign Minister na si Wang Yi, ilang linggo bago nagpugay ang Amerika.

Assalamu Alaikum Warahmatullahi Wabarakatuh!