SONA 2018, kakaiba nga

SONA 2018, kakaiba nga

July 29, 2018 @ 5:13 PM 5 years ago


 

Manila, Philippines – Hindi nga ako nagkamali, doon sa column ko last Sunday.

Sabi ko, kakaiba ang SONA ni Pangulong  Rodrigo Duterte ngayong 2018. Kakaiba, dahil ang da­ming  nangyari  na puro  first time.

Muntik pa nga siyang maagawan ng eksena o naagawan na nga siya ng dramang naganap bago ang SONA.

First time ang  biglaang  pagpapalit ng  leader­ship sa Kamara de Representante…..ito ang dramang tinutukoy ko.

Muntikanan na ring ‘di na ituloy ni Digong ang  speech niya  dahil sa pagkadismaya sa pangyayari dahil sa  nangyaring  drama o kakaibang eksena  sa loob ng Batasang Pambansa.

At sa unang  pagkakataon, ‘di nagmura ang Pa­ngulo (Praise the Lord).

Anyway, nairaos naman nang matiwasay ang SONA na umabot lamang ng 49 minutes.

Mas matagal pa ang pag-antay at pananabik ng mga naroroon sa Plenary Hall at ng mga naka-moni­tor sa kanilang mga television at mga radyo.

Ibinida ng Presidente ang mga accomplishment niya.

Inilatag  din niya ang kaniyang mga prayoridad, mga programa at mga  plano para sa tamang direk­s­yong patungo ang bansa.

Tinanong ako ng kasama ko sa programa (public service program sa radyo), kung anong grade raw ang maibibigay ko sa naging talumpati ng  Pangulo.

Sagot ko, sa 10  na  pinakamataas, 7 points ang ibinigay ko kay Tatay Digong.

Malinaw ang mga naging report niya sa bayan,  direct to the point, wala nang paligoy-ligoy pa at wa­lang mga adlib.

Naisakatuparan naman ni Bb. Joyce Bernal na siyang ng director ng SONA ang kanyang gustong mangyari sa napakahalagang okasyong ito.

 Akala ko nga kasama sa idinerek niya ang eksena ni Rep. Gloria Macapagal Aroyo at Rep. Panta­­-­leon Alvares.

Pero tulad ng inaasahan, kung pasado sa akin ang  laman ng SONA, bagsak naman  ito sa iba.

Hindi raw nasiyahan  ang mga militanteng  grupo  na nag-abang sa Commonwealth Ave.. sa mga si­nabi ng  Pangulo.

Nakulangan daw sila at ni-recycle lang daw ang ibang sinabi niya.

Tanong ko naman,  paano ba masisiyahan ang mga kritiko sa mga sasabihin ng Pangulo?

Kailan sila makukuntento sa lalamnin ng speech niya?

Ano ba ang  gusto n’yong marinig sa mga sa­sabihin ng Pangulo?

-ALIN ANG NAIBA NI ALIN FERRER