MANILA, Philippines-  Walang kinalaman sa Philippine Offshore Gaming Operators (POGO) o sa anumang uri ng sugal ang pagdukot at pagpatay sa isang Filipino-Chinese kamakailan.

“Lilinawin natin na ang biktima po ay hindi po related sa POGO o gambling,” ayon kay Lt. Col. Ryan Manongdo, public information officer ng PNP Anti-Kidnapping Group.

Sa panayam, sinabi ni Manongdo na ang biktima ay 36 taon nang nagpapatakbo ng isang hardware store, at ang pamilya nito mismo ang nagkumpirma na wala itong kinalaman sa sugal.

Natagpuang patay ang biktima noong Marso 22, apat na araw matapos lumabas ang video kung saan makikitang sapilitan itong isinakay sa isang sasakyan sa Roosevelt Avenue sa Quezon City.

Inaresto ng pulisya ang tatlong Chinese at isang Vietnamese na napag-alamang sangkot sa naturang krimen, kung saan sila sinampahan ng kidnapping for ransom with murder noong nakaraang Sabado. RNT

USON, Masbate- Sugatan ang isang pulis sa pagsabog ng Improvised Explosive Device (IED) na hinihinalang itinanim ng mga teroristang New People’s Army (NPA), kagabi sa bayang ito.

Kinilala ang biktimang si Patrolman Ragan Tumbaga Victor, miyembro 4th Platoon, 2nd MPMFC (Masbate Police Mobile Force Company) Cataingan, Masbate.

Batay sa report ng Uson Municipal Police Station, dakong alas-9:40 ng gabi naganap ang pagsabog sa gilid ng National Road sa Marcella, Uson, Masbate.

Ayon kay Police Major Carlos Estonilo Jr. ng 2nd MPMFC, habang sila ay nagbibigay ng seguridad sa mga bagong talagang tauhan sa lugar ay biglang may sumabog sa gilid ng kalsada sa nasabing lugar.

Sa lakas ng pagsabog nagtamo ng sugat si Victor at kaagad na dinala sa Armenia Detachment sakop ng Barangay Armenia, Uson para malapatan ng paunang lunas.

Sa ngayon nagpapatuloy ang ginagawang imbestigasyon ng mga awtoridad para sa ikadarakip sa mga responsable sa naturang pagsabog. Mary Anne Sapico

MANILA, Philippines- Pinawi ni Department of Health ang mga alalahanin tungkol sa paglikha ng Philippine Center for Disease Control (CDC) na sinasabi ng ilan ay “medical martial law.”

Paliwanag ni Health OIC Maria Rosario Vergeire sa media forum ngayong Martes, itinutulak ng DOH ang CDC bill dahil sa buong COVID-19 pandemic, nakita nila ang kakulangan ng bansa sa healthcare system lalo na sa panahon ng krisis.

“Dito po natin pinupunan, through this CDC bill, itong mga kakulangan ng ating sistema,” sabi ni Vergeire.

Binigyan-diin ni Vergeire na ang CDC bill ay hindi medical martial law.

Aniya, ang CDC bill ay panukala para sa lahat na maging handa sa mga darating na pandemya o mga banta sa hinaharap sa kalusugan.

Dagdag pa niya na ang nasabing hakbang ay makatutulong sa pagbuo ng agham at ebidensya para sa mga kondisyong pangkalusugan, palakasin ang monitoring system sa bansa, at pagsasama-samahin ang mga laboratoryo upang magsagawa ng mabilis na matukoy kung aling mga teknolohiya ang kailangan upang matugunan ang ilang mga sakit, bukod sa iba pa.

Binigyang-diin din ni Vergeire na sa CDC, lahat ng mga sistema na mahalaga upang matiyak ang isang maagang pagtugon sa kalusugan sa mga normal at emergency na sitwasyon ay lalakas at ma-institutionalize.

Ang pagtatag ng Philippine CDC ay tinukoy na prayoridad ng administrasyong Marcos. Jocelyn Tabangcura-Domenden

MANILA, Philippines- Naantala ang pagdating ng COVID-19 bivalent vaccines na donasyon ng COVAX facility sa Pilipinas dahil sa ilang kondisyon na rekisitos ng vaccine manufacturers, sabi ni Department of Health officer-in-charge Maria Rosario Vergeire nitong Martes.

Dulot ito ng pagbabago ng kondisyon sa immunity mula sa liability at indemnification clauses na rekisitos ng manufacturers matapos kalusin ng Pilipinas ang state of calamity dahil sa COVID-19.

“We have tried exhausting all possible means so that this transaction will push through. We were in constant coordination with the Office of the President, with the Department of Justice, with the Office of Solicitor General just so we can identify available legal remedies so that we can go on and have these COVAX donations,” pahayag ni Vergeire.

“Ito ang pinag-aaralan mabuti para naman hindi natin nagi-give up ‘yung ating mga karapatan bilang bansa in terms of these agreements. So for now, naka-hold po tayo, but we are confident that we can still push through and get these COVAX donations,” dagdag niya.

Darating sana ang unang batch ng bivalent vaccines sa pagtatapos ng Marso. Binubuo ito ng 1,002,000 doses naa ipinangako ng COVAX sa Pilipinas.

Ang bivalent vaccines ay second-generation jabs na tuma-target ng Omicron variant.

Ipinaliwanag ni Vergeire na isa sa sinisilip nilang opsyon ang panukalang magtatatag sa Philippine Center for Disease Control (CDC) na sasaklaw sa vaccine agreements.

“Tayo po ay nag-include diyan ng isang probisyon kung saan mako-cover na itong mga iniiwasan natin o itong mga provisions na kailangan sa mga agreements natin with those that are going to donate vaccines for COVID-19 here in the country,” aniya. RNT/SA

MANILA, Philippines- Makikita sa satellite images na patungo na ang oil spill sa Oriental Mindoro sa norte, sa Verde Island passage, ayon sa Philippine Space Agency (PhilSA) nitong Martes.

Batay sa ulat, sinabi ni PhilSA Supervising Science Research Specialist Engineer Roel de la Cruz sa isang press briefing na umabot na ang bahagi ng oil slick sa Verde Island.

Habang pa-timog ang oil spill noong nakaraan, makikita sa March 23 satellite images na nagbago ng direksyon ang oil spill patungong norte sa Verde Island passage.

Subalit, nilinaw ni De La Cruz na kailangan pang bantayan ng ground observation ang totoong epekto ng oil spill.

Hanggang nitong Martes, 172,928 indibidwal o 36,658 pamilya na sa Mimaropa at Western Visayas ang apektado ng oil spill, base sa National Disaster Risk Reduction and Management Council.

Umabot naman sa 203 indibidwal ang nagkasakit dahil dito.

Idineklara ang state of calamity sa 10 apektadong lungsod at munisipalidad, base sa NDRRMC. RNT/SA