MANILA, Philippines- Ipasasara ng lokal na pamahalaan ng Pasay ang ilang kalsada sa lungsod upang bigyang-daan ang pagsasagawa ng prusisyon ng Sto. Niño sa Linggo (Enero 29).

Ayon kay Pasay City Mayor Emi Calixto-Rubiano, pansamantalang hindi na muna papapasukin ang mga motorista sa F.B. Harrison St. mula Buendia hanggang EDSA at Arnaiz Avenue mula Roxas Bouevard mula alas-11 ng umaga hanggang sa takdang oras na matapos ang prusisyon ng Sto. Niño.

Magsisimula ang prusisyon ng Sto. Niño alas-3 ng hapon at aalis sa Pasay City Hall kung saan babaybayin ang F.B. Harrison patungong EDSA, babaybayin ang EDSA at kakanan ng Roxas Boulevard at kakaliwa ng Buendia papuntang Liwasang Ipil-ipil sa lungsod.

Sinabi ni Calixto-Rubiano na ang imahen ng Sto. Niño ay dinala sa Pasay City Hall noong Enero 15 at nanatili ito ng tatlong araw bago ito inilipat sa Pasay City Astrodome kung saan nagkaroon ng misa at novena na pinangunahan ni Bishop Leopoldo C. Jaucian ng Diocese of Bangued.

Dagdag pa ni Calixto-Rubiano na mahigit 100 imahen ng Sto. Niño ang naka-display sa Pasay City Astrodome na binuksan sa publiko nitong Enero 19 mula ala-1 ng hapon hanggang alas- 9 ng gabi. James I. Catapusan

MANILA, Philippines- Sinabi ng Department of Health (DOH) na napakahalaga ang pagpapalakas ng health literacy ng mga indibidwal sa pagbuo ng malusog na komunidad.

Ayon kay Dr. Miguel Mantaring, DOH health promotion bureau division chief, mahalagang malaman ng publiko ang mga bagay na makakaapekto sa kalusugan ng isang tao.

Nakalista ang health literacy bilang isa sa mga pangunahing estratehiya sa Health Promotion Framework Strategy 2023-2028, kasama ang malusog na pamamahala at mga setting.

Ipinunto rin aniy ang pangangailangan na pahusayin ang “baseline factors ” tulad ng mga socioeconomic factors, physical environment, health behaviour ay healthcare “upang matulungan ang mga tao na gawing mas madali ang isang malusog na mga desisyon.”

Binigyang-diin din ni Mantaring ang pangangailangan ng presensya sa lokal na komunidad at suportado ng ating mga local decision makers. Jocelyn Tabangcura-Domenden

ILOCOS SUR-Nagkakahalaga ng P4,840,000 na fully grown marijuana plants ang pinagbubunot at sinunog ng mga awtoridad sa isang taniman ng marijuana na nadiskubre nila sa Brgy. Licungan, Sugpon ng lalawigang ito kahapon ng umaga.

Nagsasagawa umano ng marijuana eradication operation ang mga pinagsanib na grupo ng Sugpon MPS, ISPIU/ISPDEU at PDEA-RO1 sa Brgy. Licungan nang madiskubre nila ang naturang taniman na natatamnan ng 24,500 na fully grown marijuana plants.

Nabatid na habang patungo sa target area ang mga otoridad, may namataan silang tatlong lalaki na nasa layong 30 metro mula sa kanila at nang tangkain nilang lapitan ang mga ito ay agad na nagsitakbuhan.

Hinihinalang ang mga tatlong lalaki na tumakas ay mga marijuana cultivators. Rolando S. Gamoso

MANILA, Philippines- Mahigit 70  “leadership, foundation, and human resource management (HRM) courses” ang inaalok ng Civil Service Commission (CSC), sa pamamagitan ng  Civil Service Institute (CSI), ngayong 2023.

Bahagi ito ng  programa ng CSC na naglalayong palakasin ang  public service sa pamamagitan ng tuloy-tuloy na learning interventions.

Sinabi ni CSC Chairperson Karlo Nograles na ang mga courses ay kinabibilangan ng iba’t ibang leadership at HR functions gaya ng  Leadership and Management Certification Program (CPro), Public Service Values Program (PSVP), CSI Leadership Series, Competency-based HR Program (CBHR), Learning and Development (L&D) Programs at Strategic HROD Series.

Sinabi ni Nograles na ang mga registered participants na matagumpay na nakompleto ang mga online courses, kabilang na ang mga  requirements,  ay makakakuha ng  certificate of completion na may  leadership at managerial training hours  na maaaring gamitin para ma-meet ang training requirement para sa  managerial and supervisory positions sa civil service.

“Ito ay bahagi ng regular na programa ng CSC na maghatid ng learning and development interventions para sa mga lider at kawani ng pamahalaan. Mahalaga para sa ating mga lingkod bayan na mayroon silang continuous learning, na patuloy na madagdagan ang kanilang kaalaman at mahasa ang kanilang competencies na kinakailangan para makapagbigay ng maayos na serbisyo publiko,” ang wika ni Nograles.

Idinagdag pa niya na ang lineup ng mga  courses  ngayong taon ay dinisenyo para tulungan ang mga civil servants, kabilang na ang “managers and human resource practitioners, navigate through the changes in the bureaucracy and the challenges of public service in the post-pandemic era.”

“Siniguro naming ang mga ito ay relevant o naaayon sa kasalukuyang panahon kung saan maraming nagaganap, at marami pang magaganap na mga pagbabago sa ating mga pamamaraan ng pagtatrabaho dulot ng pandemya. Makakaasa ang ating mga lingkod bayan na magiging sulit ang pagdalo nila sa mga trainings ng CSC ,” aniya pa rin.

Binigyang-diin pa ni Nograles na mas maraming “learning and development interventions” ang iaalok ng CSC Regional Offices (ROs).

“The CSC-CSI’s Learning and Development Plan Matrix, as well as the details about each course, can be accessed at csi.csc.gov.ph.,” ayon kay Nograles.

Samantala, para sa mga interesadong kumuha ng  training courses  na inaalok ng CSC ROs, mangyaring direktang magtanong sa CSC RO kung ano man ang mga concerns.

Ang directory ng  CSC offices ay available sa  CSC website na www.csc.gov.ph. Kris Jose

MANILA, Philippines- Nagbabala ang Philippine embassy sa Israel sa Overseas Filipino Workers (OFWs) na maging mapagbantay sa gitna ng lethal raid sa West Bank, Israel kung saan ilang Palestinians ang nasawi at nagtamo ng sugat.

Sa Facebook post nitong Huwebes, pinaalalahanan ang OFWs na umiwas sa ilang lugar hanggang Enero 28.

Kabilang dito ang West Bank, mga lugar sa Jerusalem, Golan Heights at borders ng Lebanon at Gala.

Batay sa Palestinian Ministry Head,naiulat na napatay ng Israeli forces ang 10 at nasugatan ang ilang Palestinians sa isang refugee camp sa West Bank ng Jenin nitong Huwebes.

Ayon sa Israeli security forces, isinagawa ang raid para mahuli ang “terror squad belonging to the Islamic Jihad terror organization,” na nagresulta sa pagkakapatay sa tatlong “terrorists.”

Inabisuhan ng Philippine Embassy sa Israel ang OFWs na umiwas sa Israeli security forces sa conflict areas at huwag magrecord ng kahit ano.

Nag-post din ito ng emergency hotlines sakalaing kailanganin ng tulong ng OFWs.

Samantala,  hinikayat ang OFWs na umiwas sa pagpunta sa matataong lugar at maging maingat sa pagsakay sa public transportation. Pinaalalahanan din sila na sumunod sa utos ng Israeli security forces at ng Home Front Command.

Sinabi ng Department of Foreign Affairs na hinihintay pa nito ang ulat upang matukoy kung may Pilipinong apektado sa raid sa Israel kamakailan. RNT/SA