Super Health Center binuksan sa Atimonan: Bong Go, Robin umayuda sa mga estudyante

Super Health Center binuksan sa Atimonan: Bong Go, Robin umayuda sa mga estudyante

September 18, 2022 @ 3:41 PM 2 weeks ago


MANILA, Philippines – Nananatiling dedikado na pahusayin ang sektor ng kalusugan at tulungan ang mahihirap na estudyante, binisita ni Senator Christopher “Bong” Go, kasama si Sen. Robin Padilla, ang Atimonan, Quezon upang saksihan ang groundbreaking ng Super Health Center ng bayan at personal na magbigay ng suporta sa ilang mag-aaral sa kolehiyo.

Idinaos sa Barangay Zone 1, Poblacion, pinangunahan ng dalawang senador ang groundbreaking ceremony ng Atimonan Super Health Center.

Sa kanyang talumpati, binanggit ni Go, tagapangulo ng Senate committee on health and demography, na ang kanyang suporta sa pagtatatag ng Super Health Centers ay bahagi ng kanyang pangako na tiyakin na ang mga mahihinang sektor ay magkaroon ng maginhawang access sa dekalidad at abot-kayang serbisyo sa pangangalagang pangkalusugan, lalo sa mga rural na lugar.

“Itong mga Super Health Centers na ito, layunin po talaga na mas mailapit sa ating mga kababayan ang mga serbisyong medikal ng gobyerno, lalo na sa mga liblib na lugar, para hindi nyo na kailangang lumayo pa,” paliwanag ni Go.

“Sabi ko nga, ngayon na ang panahon para talagang mag-invest sa ating healthcare system. Umaasa ako na ito ang huling pandemya sa ating buhay pero ang totoo hindi natin alam kung kailan dadating ang susunod,” dagdag ng senador.

Naging instrumento ang senador sa pagtulak ng kinakailangang pondo sa 2022 Health Facilities Enhancement Program na gagamitin para sa pagtatayo ng 305 Super Health Centers sa buong bansa.

Ang mga center na ito ay mag-aalok ng iba’t ibang serbisyong pangkalusugan, tulad ng database management, out-patient, birthing, isolation, diagnostic (laboratory: x-ray at ultrasound), pharmacy at ambulatory surgical unit. Ang iba pang magagamit na serbisyo ay serbisyo sa mata, tainga, ilong, at lalamunan (EENT); mga sentro ng oncology; physical therapy at rehabilitation center; at telemedicine, kung saan gagawin ang malayuang pagsusuri at paggamot sa mga pasyente.

Bukod sa Super Health Center sa Atimonan, may itatayo rin sa Agdangan, Alabat, Catanauan, Dolores, Gumaca, Infanta, Lopez, Mauban at Perez. Nauna rito, dinaluhan din nina Go at Padilla ang groundbreaking ng isang Super Health Center sa Tagkawayan.

“Magkakaroon po kayo ng 11 na Super Health Centers (dito). Magkasama po kami ni Gov. Helen Tan sa Kongreso noong 18th Congress. Siya po ‘yung sa Lower House, Chairperson po ng Committee on Health, ako naman po ‘yung sa Senado. Nagtutulungan ho kami (kaya) hindi po maisakatuparan ito kung hindi po sa tulong ninyo,” ani Go.

Kasunod ng groundbreaking, personal na pinangunahan ng dalawang senador ang pamimigay ng ayuda sa 375 mahihirap na estudyante ng Atimonan. Namahagi rin sila ng mga bitamina, grocery pack, kamiseta, mask, pagkain, sapatos, cellular phone, at relo.

“Para sa mga kabataan, mag-aral po kayong mabuti. Huwag niyo pong sayangin ang nasimulan ni dating Pangulong Rodrigo Duterte na laban niya kontra kriminalidad. Mag-aral at lumayo sa masasamang bisyo. Mag-basketball na lang po kayo o kahit anong sports,” ang panghihikayat ng mambabatas.

Higit pa rito, ang Department of Social Welfare and Development ay nagpaabot ng tulong pang-edukasyon sa mga mag-aaral. RNT