MANILA, Philippines- Binalaan ni Makati City Mayor Abby Binay ang mga fixers na naglipana at gumagala sa city hall na tumigil sa kanilang ilegal na gawain matapos madakip sa ikinasang entrapment ang tatlo sa mga suspects kung saan ang dalawa dito ay mismong empleyado ng lokal na pamahalaan.

Kinilala ni Binay ang mga inarestong suspects na sina Wilfreda De Leon, 59, regular na empleyado sa city hall bilang Administrative Assistant II; Merlin Balbuena, 46, casual employee na nakatalaga sa Health Department Sanitation Section; at Aisheen Mana-ay, 27, empleyado ng isang pribadong establisimiyento.

Sa pagkakaaresto kay De Leon ay hindi na niya matatangap ang benepisyo sa kanyang pinagtrabahuhan sa city hall.

“The city government will not tolerate fixers. We will continue to aggressively implement our anti-red tape initiatives to ensure that all transactions with the government are done in a transparent and fair manner,” ani Binay.

Base sa report na tinanggap ni Makati police chief P/Col. Edward Cutiyog, ang pagsasagawa ng operasyon ay bunsod sa kanilang natanggap na impormasyon sa talamak na nangyayaring ilegal na transaksyon ng mga empleyado ng city hall sa Makati Business Permits and Licensing Office (BPLO).

Agad na kumilos ang pulisya at ang unang nalambat sa inilatag na entrapment operation ay si Mana-ay na nadakip dakong alas-5:30 ng hapon matapos magpanggap ang isang babaeng pulis bilang kliyente ng suspect.

Humingi diumano si Mana-ay ng P500 kapalit ng mabilis na pagpoproseso ng dokumento at nang tanggapin ni Mana-ay ang nabanggit na halaga ay dinakma na ito ng mga operatiba.

Sa pagsasailalim ng interogasyon ni Mana-ay ay inginuso nito si De Leon na siyang nag-utos sa kanya na tumanggap ng pera.

Sa pagsasagawa ng follow-up operation ay nadakip naman si De Leon dakong alas-7 ng gabi sa Makati City Hall Building 2 kung saan narekober sa posesyon ng suspect ang P500 bill, 88 piraso ng tig-P1,000 na entrapment money, tatlong pirasong P500 boodle money at isang kulay itim na Cherry Mobile tablet.

Samantala, si Balbuena ay inaresto naman sa isinagawang entrapment operation dakong alas-7:40 ng gabi sa harap ng 7-Eleven na matatagpuan sa J.P. Rizal Avenue matapos makatanggap muli sila ng impormasyon ng mga naglipanang fixers sa labas ng Makati City Hall Building 2.

Nakuha naman sa posesyon ni Balbuena, na nanghihingi diumano ng P600 kapalit ng mabilis na paglabas ng dokumento, ng isang pirasong P1,000, 49 pirasong P1,000 boodle money at 41 accomplished health certificates.

Nahaharap ang mga suspects sa kasong paglabag sa RA 11032 o Ease of Doing Business and Efficient Government Service Delivery Act of 2018 sa Makati City Prosecutor’s Office. James I. Catapusan

ARITAO, NUEVA VIZCAYA- Pinaglalamayan na sa ngayon ng kanilang pamilya’t kamag-anak ang mag-asawa habang malubhang nasugatan ang isa pa habang sila’y bumibili sa isang tindahan matapos araruhin ng isang trailer truck sa gilid ng kalsada sa National Highway sa Brgy. Bone South, Aritao, Nueva Vizcaya.

Kinilala ang namatay na mag-asawa na sina Frederick Del Mundo, 44-anyos, magsasaka at si Gina Del Mundo, 55-anyos, kapwa residente ng Brgy. Bone South, Aritao, Nueva Vizcaya.

Malubha namang nasugatan si Reginald Macaslam, 38-anyos, laborer, may-asawa at residente rin sa nasabing lugar.

Nagtamo din ng sugat ang driver ng trailer truck na si Jojo Odones, 47-anyos, may-asawa at residente ng Caloocan, Cabatuan, Isabela.

Ayon kay PCapt. Roger Visitacion, officer-in -charge ng Aritao Police Station na habang binabagtas ng trailer truck ang highway ay bigla umanong nawalan ng kontrol ang driver ng sasakayan nang makarating sa pakurbang kalsada kung saan ay natumbok nito at araruhin ang tindahan at nakaparadang sasakyan.

Dahil dito, nag-overshoot ang sasakyan at natamaan nito ang isang kolong-kolong, Toyota Hilux na nakaparada sa gilid ng kalsada, at nasapul din nito ang isang tindahan at bahay bago tuluyang bumaliktad ang trailer truck.

Nadaganan ng kargang mga abono ng sasakyan ang mag-asawa na kasalukuyan noong bumibili sa isang tindahan na agad nilang ikinasawi habang nasugatan naman ang isa pang mamimili.

Inamin ng driver ng trailer truck na mayroon siyang hangover at nakita din sa sasakyan ang ilang bote ng alak.

Desididong magsampa ng kaso ang pamilya ng mga nasawi at nasugatan, maging ang may-ari ng bahay, sasakyan at tindahan laban sa driver.

Pansamantala nasa pangangalaga na ng Aritao Police Station ang driver, matapos lapatan ng lunas ang tinamo niyang mga sugat.

Samantala, handa umanong magbigay ng tulong ang may-ari ng trailer truck sa pamilya ng mga biktima.

Nahaharap sa kasong reckless imprudence resulting in double homicide, serious physical injury and damage to property si Odones. Rey Velasco

MANILA, Philippines- Todas ang isang foreman matapos pagsasaksakin ay ninakawan pa ng hindi kilalang suspek sa loob ng isang ginagawang bahay sa Navotas City, kamakalawa ng gabi.

Hindi na umabot ng buhay sa Tondo Medical Center sanhi ng tinamong mga saksak sa iba’t ibang parte ng katawan ang biktimang si Raffy Almero, 50, ng of Kasunduan Ext. Brgy Commonwealth, Quezon City.

Batay sa report ni PSSg Levi Salazar kay Navotas police chief P/Col. Dexter Ollaging, dakong alas-10:30 ng gabi nang maganap ang insidente sa Lot 149, Blk-25 , Ph-2,A-4, Brgy. NBBS Dagat-Dagatan, Navotas City.

Sa pahayag ng saksing si Raymond Villapa, 49 ng Blk 50, Brgy. 8, Caloocan City kay PSSg Salazar, titignan sana nila ng kanyang asawa ang pinapagawa nilang bahay sa nasabing lugar nang makita nila ang isang lalaki na nakasuot ng itim na damit at nasa 5’7 ang taas na nakatayo sa lugar.

Tinanong niya ang lalaki kung nasaan ang biktima at sumagot naman ang suspek, “Di ko po alam baka tulog na” kaya nagpasaya na lamang ang saksi na pumasok sa kanilang bahay.

Dito, nakita ng saksi ang biktima na duguan habang nakahiga sa sofa na naging dahilan upang agad nilang isinugod sa nasabing pagamutan subalit, hindi na rin ito umabot ng buhay.

Lumabas sa pagsisiyasat ng pulisya na nawawala ang mga personal na gamit ng biktima habang patuloy naman ang follow-up investigation para sa posibleng pagkakilanlan at pagkakaaresto sa suspek na tumakas sa hindi matukoy na lugar. Boysan Buenaventura

MANILA, Philippines- Nakumpiska ng mga awtoridad ang halos P69 milyong halaga ng hinihinalang shabu sa bayan sa Northern Samar.

Batay sa ulat nitong Miyerkules, nasabat ang droga sa isang checkpoint sa Barangay Jubasan sa bayan ng Allen.

Nakasilid umano ang mga pakete ng shabu sa mga tea bag na sakay ng isang kotse.

Base pa sa ulat, unang sinita ang sasakayan dahil hindi umano nakasuot ng seatbelt ang driver, at nang imbestigahan, inamin umano nito na may shabu sa loob ng sasakayan.

Hinuli naman ang driver na kinilalang si Mangayaw Mitumara. RNT/SA

MANILA, Philippines- Naghain ang Metro Manila Transit Line 3 (MRT-3) ng peisyon sa Rail Regulatory Unit ng Department of Transportation (DOTr) para sa isang fare rate increase mula P4 hanggang P6 dahil sa kakulangan ng kita, ayon sa ulat nitong Martes.

Kapag nakalusot ang petisyon, ang minimum charge para sa biyahe galing North Avenue station patungong GMA Kamuning ay magiging P17 mula sa kasalukuyang P13.

Ang maximum charge mula North Avenue station hanggang Taft Avenue ay magiging P34 mula sa P28.

Umabot ang gastos sa halos P8,969,179,830.02 hanggang nitong November 2022, habang ang kabuuang kita nito ay P1,107,523,425.23. Ang resulting deficit ay P7,861,656,404.79 o P88.34 government subsidy kada pasahero.

Sa petisyon, nahihirapan ang MRT-3 sa public finances dahil hindi umano sapat ang fare revenues sa pagsaklaw initial investment sa pagtatayo ng pasilidad, maintenance at operasyon ng linya.

“However, because it is an essential service, it is continuously maintained and subsidized, costing continuous deficits on the part of the government.”

Nananawagan naman ng DOTr para sa isang public consultation sa Feb. 17 para kunin ang opinyon ng publiko sa panukalang fare rate increase.

“Mahirap na yun kasi dadagdag na naman yan sa gastos,”anang isang commuter bilang reaskyon sa petisyon.

“Mas cheaper pa rin compared sa bus,” sabi naman ng isang biyahero.

Bukod sa MRT-3, tatalakayin din sa hearing public hearing ang karagdagang P2.50 pamasahe sa LRT Line 1 at Line 2.

“LRTA’s internally generated funds are not sufficient to sustain it’s total operating expenses requirements… the authority has an operational subsidy from the national government for the year 2023 in the total amount of P1,053,363,000,” pahayag ng LRTA.

“The proposed fare increase will certainly result to the reduction of subsidy being provided by the government,” dagdag nito.

Ayon kay LRTA administrator Atty. Hernando Cabrera, “Isa sa mga recommendation namin kailangan sabay-sabay yan. On the idea na inaprubahan mo ha. Across the industry ‘yan, ‘yung tattle, line 1, line 2, and MRT.” RNT/SA