TAPOS NA ANG ELEKSYON, TAMA NA ANG AWAY

TAPOS NA ANG ELEKSYON, TAMA NA ANG AWAY

May 11, 2022 @ 10:57 PM 2 months ago


Bilang bansang nananaig ang demokrasya at ang pagpili ng mga mamumuno ay nakasalalay sa boto ng tao, dapat nang i-respeto ng lahat ang naging resulta ng halalan ngayonkung saan boses ng publiko at samba­yang Pilipino ang siyang na­ngibabaw.

Itigil na sana ang pag-iisip pa ng mga bagay na hindi makabubuti sa bansa at igalang na lamang ang naging proseso ng halalan kung saan mga guro ang siyang nagsakripisyo, kasama na ang ating kapulisan, upang mairaos ito sa maayos at mapayapang paraan.

Hindi rin naman nakagu­gulat ang naging resulta ng eleksyon dahil ito rin naman ang makailang beses na ipinakita na resulta ng mga survey na isinagawa ng ilang tanyag na survey firms gamit ang mga datos na nakuha mula sa kapwa natin Pilipino.

Marahil ay marami pa ang hindi nakatatanggap ng kina­labasan ng halalan subalit ito na ang naging pasya ng sambayanang Pilipino.

Patunay na rin ito na talagang ayaw na ng mayorya na bumalik ang dating uri ng serbisyong hindi ramdam ng mga kababayan nating mahihirap.

Sa kabila naman ng resulta ng naganap na eleksyon ay marapat lamang na ang bawat isaý manatili sa pagtupad ng kani-kanilang mga tungkulin sa bayan dahil ang katapatan naman natiý nakasandig sa pagmamahal sa ating bayan at hindi sa politiko.

Mainam ring ipagpatuloy natin ang pagtulong para sa ikauunlad ng bansa. Tandaan nating dugong Pilipino pa rin ang nananalaytay sa atin at naaayon lamang na huwag nating subuking guluhin ang maayos na lagay ng ating lipunan.

Kahit ano pa man ang naging resulta ng halalan, ito maý ikinatuwa mo o hindi, nawaý huwag nating hilingin ang makasasama sa bansa upang patunayan lamang na nagkamali ang marami sa pagpili sa susunod na mamumuno sa atin.

Sapagkat anomang hindi magandang kaganapan ang mangyari, buhay ng bawat pamilyang Pilipino ang siyang maaapektuhan at makadaragdag pa ito sa hirap na idinulot sa atin ng COVID-19 pandemic.