Tsina gusto ng mas maigting na relasyon sa PH Army

Tsina gusto ng mas maigting na relasyon sa PH Army

June 5, 2022 @ 8:45 AM 3 weeks ago


MANILA, Philippines – Nagsagawa ng introductory call si Senior Colonel Li Jianzhong, ang People’s Republic of China defense attaché, kay Lt. Gen. Romeo S. Brawner Jr., Philippine Army (PA) Commanding General, sa punong-tanggapan ng PA sa Fort Bonifacio, Metro Manila nitong Huwebes.

Sa isang pahayag noong Biyernes, Hunyo 3, sinabi ni Col. Xerxes Trinidad, tagapagsalita ng PA, na ang pagbisita ay naglalayong “palakasin ang ugnayan sa pagitan ng dalawang hukbo.”

Sinabi ni Trinidad na tinalakay nina Li at Brawner ang mga bagay na may kaugnayan sa bilateral na pagsasanay at edukasyon.

“Sr. Col. Li conveyed his intention to link up with PA personnel who studied in China to invite them for an activity in line with the 47th anniversary of the establishment of the Philippine-China diplomatic relations,” ani Trinidad.

Tinalakay din ng dalawang opisyal ang kahalagahan ng pagpapalakas ng relasyong diplomatiko sa pagitan ng Tsina at Pilipinas habang binibigyang-diin nila ang kahalagahan ng pagtataguyod ng kapayapaan at diplomasya bilang isang epektibong channel sa pagresolba ng tunggalian, idinagdag ng tagapagsalita ng Army.

Patuloy na pinagbuti ng Pilipinas at militar ng China ang kanilang relasyon at kooperasyon sa ilalim ng administrasyon ni Pangulong Duterte.

Noong Enero, nag-donate ang China ng P1 bilyong halaga ng kagamitang militar sa Pilipinas tulad ng mga rifle, bala, rescue at relief items, drone system, water purification vehicles, ambulansya at engineering equipment at iba pa.

Nag-donate din ang Beijing ng mga bakuna laban sa Covid-19 sa militar ng Pilipinas noong 2021 nang ang bansa ay hindi makakuha ng anumang bakuna dahil sa kakulangan sa pandaigdigang suplay.

Sa huling bahagi ng kanilang pagpupulong, sinabi ni Trinidad na inimbitahan ni Li si Brawner sa China para sa isang opisyal na pagbisita. RNT