MANILA, Philippines- Sinimulan ng isang misa bago sinundan ng panunumpa sa tungkulin si Pasay City Mayor Emi Calixto-Rubiano na ginanap sa Shrine of St. Therese of the Child Jesus na matatagpuan sa Newport Boulevard, Villamor Airbase nitong Martes (Hunyo 28).

Kasama ni Calixto-Rubiano sa panunumpa sa tungkulin ay ang kanyang nakatatandang kapatid na si Representative Antonino ‘Tony’ Calixto at Vice-Mayor Waldertudes “Ding” del Rosario kabilang ang buong “Team Calixto” matapos idaos nag misa ng pasasalamat na isinagawa ni Bishop Oscar Florencio ng Military Ordinate of the Philippines.

Si Calixto-Rubiano at ang kanyang “Team Calixto” ay sumumpa sa kanilang tungkulin kay Pasay City Regional Trial Court Branch 45 Judge Remiebel U. Mondia.

Nagwagi ng kanyang ikalawang termino bilang alkalde Si Calixto-Rubiano sa nakaraang eleksyon na ginanap nitong Mayo 9.

Pinasalamatan naman ni Calixto-Rubiano ang mga residente ng lungsod sa patuloy na pagsuporta sa “Team Calixto” at ipinangako na kanyang ipagpapatuloy ang pagbibigay ng maayos na serbisyo sa kanyang mga konstituwente.

Dagdag pa ni Calixto-Rubiano na mas lalo pang pag-iibayuhin ng kanyang administrasyon ang pagbibigay ng serbisyo sa programang HELP (H-ealth care and housing, E-ducation, economic growth and environment; L-ivelihood and lifestyle, P-eace and order, palengke, at pamilya.

Ang mga nahalal na Team Calixto Councilors ng District 1 ay sina Mark Calixto, Grace Santos, Antonia Cuneta, Marlon Pesebre, Ambet Alvina at Ding Santos habang ang mga konsehal na nagwagi sa nakaraang eleksyon sa lungsod sa District II ay sina Joey Isidro, Wowee Manguerra, Donna Vendivel, Jen Panaligan, and Allo Arceo. James I. Catapusan

Guiguinto, Bulacan- Mahigpit na ipinagbabawal ngayon sa mga residente ng Brgy.Malis ang pagpunta at pagligo sa ilog matapos mamataan ang isang pagala-galang buwaya sa ilog kamakalawa.

Ayon sa Facebook post ng l Am Malis, nakita at nakunan ang ulo ng buwaya na nakalawit sa mga tuyot na waterlily sa ilog.

Dahil dito, pinag-iingat ng mga opisyal ng barangay ang mga residente, partikular ang mga nakatira sa tabing-ilog para maiwasan ang kapahamakan.

Nanawagan sila sa mga residente na sakaling mamataan muli ang buwaya ay agad ipagbigay-alam sa kanila upang mahuli na ito.

Sinasabing matapos makipag-ugnayan ang barangay sa pamahalaang bayan, DENR, MENRO at MDRRMO ay agad itong rumesponde sa lugar upang maberipika at mahuli ang buwaya.

Sinusulat ang balitang ito,wala pang impormasyon kung muling lumutang o namataan ang sinasabing buwaya sa lugar. Dick Mirasol III

QUEZON- Bangkay na nang makarating sa pinakamalapit na hospital ang isang 11 taong gulang na batang babae makaraang aksidente itong mabangga ng Mitsubishi Montero na minamaneho ng isang guro sa Barangay Poblacion bayan ng General Nakar.

Ang biktima na dead on arrival sa sa Claro M. Recto Hospital sanhi ng tinamong mga sugat sa ulo ay kinilalang si Princess Avellaneda, 11, samantalang nahaharap sa kasong homecide ang nasabing guro na nakilalang si Myla Astrera 50, residente ng Barangay Pamploma General Nakar, Quezon .

Batay sa isinagawang imbestigasyon ng General Nakar Police Station ganap na alas-4:45 ng hapon nang bigla umanong tumawid ang biktima na kung saan hindi na ito naiwasan ng isang paparating na Mitsubishi Montero na may plakang VFE- 7461 na minamaneho ng naturang guro at aksidenteng nabangga nito ang biktima. Ellen Apostol

QUEZON, Dead on the spot sa pinangyarihan ng krimen ang isang barangay kagawad, samantalang isang barangay tanod ang sugatan nang pagbabarilin ng isa sa dalawang lulan ng motorsiklo habang nagsasagawa ng clean and green project sa Barangay Masalucot 3 bayan ng Candelaria.

Kinilala ang biktimang nasawi na nagtamo ng tama ng isang bala sa dibdib mula sa kalibre 45 pistol na si Mario Mendoza, nasa hustong gulang, barangay kagawad, samantalang kasalukuyan namang ginagamot ang barangay tanod sa pinakamalapit na hospital matapos na tamaan ng ligaw na bala sa paa na si Boy Evangelista, pawang naninirahan sa nabanggit na lugar.

Base sa inisyal na report ng Candelaria PNP ganap na alas-6 ng umaga habang abala sa paglilinis ng kanal ang nasawi (biktima) kasama ang tanod at volunteers sa kanilang lugar nang bigla umanong paputukan ang nasabing kagawad nang malapitan ng isa sa dalawang sakay ng motorsiklo kung saan ang pangalawang putok ay tumama sa tanod.

Sa isinagawang pagsisiyasat ng pulisya sa pinangyarihan ng krimen at CCTV napansin na tatlong beses nagpabalik-balik ang mga suspek kung saan nagsasagawa nang paglilinis ng kanal ang mga biktima na sinamantala ng mga suspek .

Napag-alaman na , walang alam na kaaway o nakagalit ang nasawi ,maliban umano sa pagsasabong nito, samantalang patuloy ang imbestigasyon ng Candelaria PNP para sa ikadarakip ng dalawang tumakas na salarin. Ellen Apostol

MANILA, Philippines- Inihayag ng Philippine Coast Guard (PCG) nitong Martes na batay sa inisyal na imbestigasyon, maaaring nagsimula ang sunog sa isang astcraft vessel sa Bohol mula sa engine room.

Sinabi ni PCG spokesperson Commodore Armand Balilo na patuloy pa rin ang imbestigasyon sa insidente.

“Sa initial inquiry ayon sa kapitan at crew, mukhang sa engine room na naman po nagsimula itong sunog na nangyari dito sa fastcraft,” aniya.

Matatandaang nagliyab ang fastcraft na MBCA Mama Mary Chloe sakay ang 157 pasahero at walong crew sa dagat sa pagitan ng Tugas at Tilmobo Islands sa Bohol.

Isa ang nasawi sa insidente, habang 164 ang nakaligtas. RNT/SA