MANILA, Philippines- Isang 65-anyos na dating politiko ang kaagad na binawian ng buhay makaraang pagbabarilin ng hinihinalang tandem, sa Barangay San Nicolas, Gapan City, Nueva Ecija nitong Miyerkules, March 29.

Sa ulat na nakarating kay Nueva Ecija director, P/Col. Richard Caballero, kinilala ang biktima na si Zaldy Matias y Gonzaga, may asawa, residente ng #149 Libis Drive, Brgy. San Nicolas, nasabing lungsod.

Sa inisyal na imbestigayon, lumabas na dakong alas-7:30 kagabi nang mangyari ang pamamaril.

Diumano ay kasalukuyang nakaupo ang biktima sa harapan ng kanyang bahay nang bigla umanong pagbabarilin ng mga hindi kilalang suspek.

Ganap naman na alas-8:20 ng gabi nang makarating sa tanggapan ng Gapan City police ang impormasyon hinggil nangyaring krimen.

Kaagad rin na kumilos ang kapulisan upang i-verify ang nabatid na insidente ng pamamaril sa nabanggit na barangay.

Naisugod pa ang biktima sa ospital subalit kaagad ring binawian ng buhay.

Si Matias ay dating board member sa ika-apat na distrito, taong 2007-2010; at dati ring naging miyembro ng Sanguniang Bayan, taong 1998-2007.

Sa isinagawang imbestigasyon ng Scene of the Crime Operatives (SOCO), matapos umano ang pamamaril ay mabilis naman na nagsitakas ang mga suspek.

Patuloy naman na nagsasagawa ng mga interview mula sa mga umano’y nakasaksi sa pangyayari at pangangalap umano ng mga CCTV footages para sa posibleng pagkakakilanlan ng mga nakatakas na suspek. Elsa Navallo

MANILA, Philippines- Naghayag ng pagsuporta ang gobyerno ng Pilipinas para sa pag-endorso ng Estados Unidos ng Summit for Democracy Declaration.

Iyon nga lamang, kaagad na inihiwalay ng Pilipinas ang sarili nito mula sa anumang reference sa International Criminal Court (ICC).

Sa isang kalatas na may petsang Marso 29, ang Pilipinas, sa pamamagitan ng Department of Foreign Affairs, nakiisa sa Estados Unidos at iba pang bansa sa pagsuporta sa nasabing deklarasyon, sabay sabing ito’y isang “testament to our unwavering commitment to upholding our democratic values and principles and to strengthening our democratic institutions for the benefit of the Filipino people.”

Subalit, inihiwalay na kaagad ng Pilipinas ang sarili nito mula sa “Declaration’s reference to the International Criminal Court (ICC).”

“While the current language provides a qualifier that the ICC’s role may be acknowledged provided it abides by the principle of complementarity, the Philippines’ earlier decision to withdraw from the ICC was precisely because the Court failed the test of complementarity,” ayon sa Pilipinas.

Ayon naman sa report ng Reuter, inanunsyo ni US President Joe Biden ang bagong funding para palakasin ang demokrasya sa buong mundo at maging ang tulungan na labanan ang korapsyon, suportahan ang malaya at patas na eleksyon at isulong ang teknolohiya na sumusuporta sa democratic governments.

Ito’y unang inendorso ng 73 bansa.

Sinabi ng report na “Twelve of those dissociated themselves from parts of the text, including India, Israel and the Philippines, which all opted out of a part backing accountability for human rights abusers and acknowledging the importance of the International Criminal Court.”

Pinanindigan naman ng Pilipinas na hindi nito kinikilala ang kapangyarihan ng ICC.

Binigyang diin nito at iginiit ang hurisdiksyon ng pamahalaan na mag-imbestiga at mag-prosecute ng mga krimen kabilang na ang di umano’y committed sa gitna ng bloody campaign laban sa illegal drugs.

Matatandaang, kumalas ang Pilipinas mula sa Rome Statute, nagtatag ng ICC, noong Marso 2019, sa ilalim ng liderato ni dating Pangulong Rodrigo Roa Duterte, naglunsad ng giyera laban sa ilegal na droga.

“The (Philippines) maintains that the rule of law and accountability are fully functioning through its criminal justice system and efforts to improve mechanisms, such as the AO35 Mechanism,” ayon sa DFA.

“The (Philippines) upholds its commitment to fight impunity for atrocity crimes, notwithstanding the country’s withdrawal from the Rome Statute, especially since the Philippines has a national legislation punishing atrocity crimes,” dagdag na wika nito.

Samantala ang DOJ, sa ilalim ng liderato ni dating Secretary Menardo Guevarra, ngayon ay Solicitor General, ay nagpahayag na ang AO35 ay nakatuon sa “resolving cases of political violence such as extrajudicial killings, enforced disappearances, and torture, among other similar grave human rights violations.” Kris Jose

MANILA, Philippines- Napanatili ng Global Alliance of National Human Rights Institutions (GANHRI) ang Status “A” accreditation ng Commission on Human Rights (CHR) ng Pilipinas bilang “credible and authoritative voice” sa international human rights bodies.

Inihayag ng CHR  na katunayan ang akreditasyon nitong Status “A” na tumatalima ito sa Paris Principles – mga panuntunan na dapat sundin ng National Human Rights Institutions (NHRIs) upang kilalaning “credible”, partikular sa pagiging malaya sa batas, pakikibahagi, operasyon, polisiya at control of resources.

Ang mga NHRI na may Status “A” accreditations ay ginagawaran ng significant participation rights at independent access sa United Nations (UN) human rights mechanisms, gaya ng UN Human Rights Council, subsidiary bodies nito, maging sa ilang General Assembly bodies at mechanisms. Binibigyan din sila ng full membership sa GANHRI, kabilang ang abilidad na makaboto at mailuklok sa governance positions.

Tiniyak naman ng CHR sa pamahalaan at sa publiko na ipagpapatuloy nito ang “objective” na pagsasakatuparan ng mandato nito bilang watchdog laban sa human rights violations.

“At the same time, we continue to commit to pursue steps that will further strengthen our role as an independent NHRI, including advocating for the passage of the CHR Charter,” anang CHR.

“We continue to commit to be government’s partner in improving the way they fulfill their obligation as the main duty bearer for the human rights of all, while keeping our independence in calling out violations of human rights,” dagdag nito. RNT/SA

MANILA, Philippines- Sa pagpapatuloy ng search rescue and retrieval operation ng Philippine Coast Guard at iba pang ahensya, umakyat na sa 19 indibidwal ang namatay sa sunog sa M/V lady Mary Joy 3 sa Basilan.

Ito ay base sa pahayag ng Basilan Provincial Disaster Risk Reduction Management Office (PDRRMO).

Sa naunang ulat mula sa Philippine Ports Authority at Philippine Coast Guard (PCG), nasa 10 pasahero ang namatay simula kagabi ngunit may narekober pang karagdagang 9 na indibidwal ngayong umaga.

Ayon kay PDRRMO Chief Nixon Alonzo, 189 indibidwal ang nailigtas habang pito ang patuloy na pinaghahanap.

Nanatili naman sa Zamboanga Port ang ilan sa mga survivor habang 54 ang nasa Camp Navarro General Hospital sa Westmincom.

Anim na nakaligatas naman ang dinala sa Zamboanga City Medical Center habang 67 ang nasa bayan ng Basilan.

Ayon kay PCG District BARMM Commander Comodore Rejard Marpe, ang 10 bangkay ay nakita kaninang ala-1 ng hapon kung saan tatlo rito ay mga bata.

Hindi pa batid ang sanhi ng sunog sa barko dahil nagpapatuloy pa ang search rescue at retrieval operation ng mga awtoridad sa Baluk-Baluk Island kung saan naganap ang trahedya.

Ang barko ay galing sa Zamboanga port at patungong Jolo, Sulu. Jocelyn Tabangcura-Domenden

CANDELARIA, Quezon- Nasabat ng mga pulis ang hinihinalang shabu na nagkakahalaga ng P2.7 milyon sa buy-bust operations sa lugar na ito nitong Miyerkules.

Naaresto ng Candelaria Drug Enforcement Unit ang tatlong umano’y pusher na kinilalang sina Michael Malasma Dakila, Leovernie Montenegro Quitain, at Gerson Dinglasan Silva.

Sinabi ni Candelaria police chief Lt. Col. Dennis de Leon na natukoy si Dakila bilang high-value individual habang sina Quitain at Silva ay street-level individuals.

Nahuli sina Dakila at Quitain sa Purok 4, Barangay Masin Norte. Samantala, naaresto naman si Silva sa Purok 4, Barangay Malabanban Sur.

Kasalukuyan silang nasa kustodiya ng Suspects Candelaria Police Station. Nahaharap sila sa drug-related charges, base kay De Leon. RNT/SA