MANILA, Philippines – Tinutugis na ng Philippine National Police (PNP) ang iba pang Filipino suspects na sangkot umano sa pagdukot at pagpatay sa isang lalaki sa Quezon City.

Ayon sa ulat, bago pa rito ay naaresto na ng PNP ang tatlong Chinese at isang Vietnamese na may kaugnayan sa kidnap-for-ransom.

“May mga pangalan na po na hawak ang AKG (Anti-Kidnapping Group) at yan po yung tinutunton po nila,” sinabi ni PNP spokesperson Police Col. Jean Fajardo.

Tumanggi naman na magbigay pa ng mas maraming impormasyon si Fajardo dahil nagpapatuloy pa ang manhunt sa mga suspek.

Aniya, posibleng sindikato ang nasa likod ng krimen dahil hindi ito ang unang pagkakataon na naitala ang naturang modus.

“Maaaring tong grupo nato ay siya ring may kinalaman dun sa mga previous kidnapping case kung saan ay pinuputulan nila ng parte ng katawan kagaya ng daliri po at yun po yung pinapadala nga po sa pamilya,” pagbabahagi pa ni Fajardo.

Sa ulat, sinabi ng PNP-AKG na humingi ng P10 milyon na ransom sa pamilya ng biktima ang mga suspek matapos itong pwersahang isakay sa loob ng sasakyan sa Roosevelt Avenue noong Marso 18.

Sa kabila ng pagbabayad, natagpuan pa ring patay ang biktima sa Tanza, Cavite noong Marso 22 at nakabalot ng duct tape ang ulo nito habang nawawala naman ang isang binti niya.

Ani Fajardo, patuloy na makikipag-ugnayan ang PNP sa Filipino-Chinese community, sabay-sabing sila ay “on top of the situation” sa mga kidnapping case. RNT/JGC

MANILA, Philippines – Humiling ang kampo ni Negros Oriental Rep. Arnold “Arnie” Teves, Jr. na alisin na ang 60-day suspension na ipinataw ng Kamara laban sa mambabatas.

Ayon sa kampo ni Teves, walang physical proof na maibibigay upang patunayan na may banta nga sa kanyang buhay maging sa kanyang pamilya.

Sa sulat na ipinadala ng legal counsel ng kongresista na si Atty Ferdinand Topacio, sa House Committee on Ethics and Privileges, sinabi nito na ang banta sa buhay ni Teves ay sa ilalim ng “unavoidable circumstances which prevent his physical presence in the sessions of the House, hence, an exempting circumstance under Sec.71, Rule IX of its Rules.”

“A belief that one’s life is threatened does not always come with demonstrable proof. It could be [a threat] by inference from circumstances that are not susceptible to tangible proof, as in this case,” sinabi ni Topacio.

“Yet, everyone has a right to be cautious about the threats he perceives against his life,” dagdag pa niya.

Noong nakaraang linggo ay pinagbotohan ng Kamara na suspendihin si Teves ng 60 araw dahil sa hindi nito pagdalo sa mga sesyon, kasabay naman ng criminal complaints na inihain laban sa kanya sa serye ng mga pagpatay sa Negros Oriental noong 2019.

Iniuugnay din si Teves sa pagpatay kay Negros Oriental Rep. Roel Degamo.

“With these, and the expressed intention and standing commitment of Representative Teves to participate in the sessions, there is no refusal to discharge his duties nor disrespect the authority and dignity of the Honorable Congress,” giit ni Topacio.

“It is, thus, most respectfully prayed that the said suspension be lifted and Rep. Teves be allowed to participate in the sessions and discharge his duties as a member of Congress, virtually in the meantime,” pagtatapos nito. RNT/JGC

MANILA, Philippines – Mahigit 1,000 motorista ang nahuli sa unang araw ng full implementation ng exclusive motorcycle lane sa Commonwealth Avenue, Quezon City, ayon sa Metropolitan Manila Development Authority (MMDA) nitong Lunes, Marso 27.

Sa datos ng MMDA, hanggang tanghali ng Marso 27 ay umabot na sa 1,238 na mga sasakyan ang napara nila.

Sa nabanggit na bilang, 482 sa mga ito ang motorsiklo at 757 ang pribadong sasakyan.

“Nasa kabuuang 1,238 na mga motorista ang nahuli mula umaga hanggang ngayong tanghali ng unang araw ng full implementation ng exclusive motorcycle lane sa kahabaan ng Commonwealth Avenue sa bahagi ng Elliptical Road hanggang Doña Carmen at vice versa,” sinabi ng MMDA sa isang Facebook post.

Ayon sa MMDA, ang exclusive motorcycle lane ay matatagpuan sa ikatlong lane mula sa sidewalk ng Commonwealth Avenue.

Layon ng bagong polisiya na mabawasan ang motorcycle-related road crash at mapabilis ang daloy ng trapiko.

Bago nito ay nagkaroon muna ng 11-day pilot testing ang MMDA para sa exclusive motorcycle lane, mula Marso 9 hanggang Marso 26. RNT/JGC

MANILA, Philippines – Darating na sa bansa ngayong Martes, Marso 28, ang mga miyembro ng Korean Coast Guard (KCG) upang umasiste sa Pilipinas sa nagpapatuloy na oil spill cleanup sa Naujan, Oriental Mindoro.

Ang South Koreans ay tutulong sa Japanese at US Coast Guard na narito na sa bansa para tumulong sa Philippine Coast Guard (PCG).

Sa kasalukuyan ay mayroon nang 10 munisipalidad sa probinsya ang nasa ilalim ng state of calamity dahil sa epekto ng oil spill dulot ng lumubog na barko noong Marso 28, ang MT Princess Empress na may kargang 900,000 litro ng industrial fuel.

Hanggang noong Huwebes, Marso 23, mahigit 8,000 litro ng langis na ang nakolekta at sisimulan na rin na ubusin ng mga awtoridad ang laman ng tanke ng motor tanker gamit ang special bag mula Singapore.

“Ang pinakamabilis na paraan ay tinatawag na bagging. Meron kunyari na source ng spill na lumalabas so may bag na ipapatong sa kanya nang sa ganon ‘yung langis ay mahuhuli ng bag na ito. Nang sa ganoon ‘yung bag habang napupuno siya, unti-unti rin lumalabas ang tubig dagat,” ani PCG Deputy Commandant for Operations Vice Admiral Rolando Lizor Punzalan Jr.

Idinagdag pa ni Punzalan na paplanuhin na rin nila ang patching ng naturang barko, at pagsipsip sa natitirang mga langis sa tanke.

“Meantime, that the source is still there, there’s a possibility that the oil to a certain extent will be coming again but not that much…Decreasing naman na ang sightings ng oil spill unlike previous several days na maraming oil,” sinabi ni Punzalan Jr.

Sa huling ulat, mahigit 20,000 pamilya na o mahigit 100,000 residente ang apektado ng oil spill. RNT/JGC

MANILA, Philippines – Nasukol ng mga tauhan ng Manila Police District (MPD) bike patrol ang limang kawatan na ang modus ay ‘Laglag Barya’ makaraang dumayo pa at umatake sa Maynila nitong Lunes ng umaga, Marso 27.

Pawang mga taga-Laguna ang mga suspek na sina Harold Royola y Bueta, 37; Ireneo Gonzales, 48 , kapwa miyembro ng Sputnik Gang; Ian Manalang Gonzales, 28; Pepito Villanueva Jr, 50; at Renan Encarnacion y Lingon, 36.

Nangyari ang insidente sa kahabaan ng Taft Avenue malapit sa kanto ng Pablo Ocampo St., Malate, Maynila.

Naging biktima ng mga suspek ang isang seaman na si Ronbel Bajao at Marvin Rosales.

Sa imbestigasyon ng Malate Police Station 9, ang mga biktima ay sakay ng isang pampasaherong jeep na may biyaheng Quiapo-Baclaran kung saan sumakay sin ang mga suspek katabi ng mga biktima sa bahagi ng Taft Avenue, Pedro Gil.

Pagsapit malapit sa kanto ng P. Ocampo, ang suspek na noo’y hawak ang kanilang pamasahe ay iniabot sa isa sa biktima at sinadyang ilaglag ang barya.

Nang pulutin ng isa sa biktima ang barya, ang mga suspek ay pasimpleng kinuha ang cellphone at wallet ng mga biktima sa kanilang mga bulsa.

Kasunod nito, sinabi ng mga suspek sa mga biktima na kinuha ng isang pasahero na kabababa lamang ang kanilang cellphone at wallet.

Ngunit duda ang mga biktima kaya nagpasaklolo ang mga ito sa Bike Patrol Unit na tiyempo namang nagsasagawa ng bikepatrol at foot patrol sa nasabing lugar kaya naaresto ang limang kawatan.

Narekober sa mga suspek ang wallet na may iba’t ibang mahahalagang ID at humigit-kumulang isang libong piso saka cellphone na nagkakahalaga ng P20,000.

Mahaharap sa kasong Theft Pickpocket (Laglag Barya) ang mga suspek sa Manila City Prosecutors Office.

Samantala, pinuri Naman ni MPD Director P/Brig General Andre Dizon ang kanyang mga tauhan dahil sa maagap na pag-aresto sa mga suspek.

Paalala nito sa mga pasahero at pangkalahatang publiko na maging mapagmatyag sa mga ganitong modus, at ireport agad sa pulisya ang pangyayari upang agad na marespondehan. Jocelyn Tabangcura-Domenden