‘Utang-tagging’ policy sinuspinde ng PRC

‘Utang-tagging’ policy sinuspinde ng PRC

September 11, 2022 @ 3:45 PM 3 weeks ago


MANILA, Philippines- Sinuspinde ng Professional Regulation Commission (PRC) ang patakaran nito na nakapaloob sa Memorandum Order No. 44 na nagtatakda sa mga propesyonal na may mga nakabinbing kasong administratibo at pinipigilan silang mag-renew ng kanilang mga lisensya sa PRC.

Inanunsyo nitong Linggo ni Labor Secretary Bienvenido E. Laguesma, at sinabing magkakabisa kaagad ang suspensiyon.

Ang PRC ay isang attached agency ng DOLE.

Ang Resolution No. 1558, na nilagdaan ni PRC acting chairman Jose Cueto Jr. at commissioner Erwin Enad, ay tugon sa isyu ng ‘utang-tagging,’ na inihain ni ACT Teachers Party-List Rep. France Castro sa congressional deliberation noong nakaraang linggo ng budget ng DOLE.

Sa ilalim ng patakarang ito, ang mga guro ay pinagbabawalan ng PRC na mag-renew ng kanilang mga lisensya para sa diumano’y may mga hindi pa nababayarang utang.

Nagpahayag ng pagkabahala si Laguesma sa patakarang ‘utang tagging’ dahil naglalagay ito ng hindi nararapat na pasanin sa mga propesyonal na may mga nakabinbing kasong administratibo.

“How can they pay what they borrow if they can’t work because the PRC won’t renew their licenses,” Sabi ng labor chief.

Sinabi ni Cueto na habang sinuspinde ang “utang tagging”, ang PRC ay magre-review at magsasagawa ng mga konsultasyon sa iba’t ibang professional boards nito na may layuning isulong ang kahusayan at pagiging patas sa mga proseso nito at mga pamamaraan sa pagdidisiplina.

Pinuri ni Laguesma ang PRC sa agarang pagtugon sa isyu, at binanggit na magbibigay ito hindi lamang ng mga guro kundi pati na rin ang iba pang mga propesyonal ng agarang tulong.

Habang binibigyang-diin na ang pagbabayad ng mga utang at propesyonal na disiplina ay nananatiling pinakamahalagang alalahanin, nilinaw din niya na sa pagrepaso sa patakaran at mga pamamaraan ng pagdidisiplina nito, dapat ituon ng PRC ang tungkuling pangregulasyon nito sa mga hindi kanais-nais na gawain na nagmumula sa paggamit ng mga propesyon.

Ang bawat regulasyon, idinagdag niya, ay dapat pumasa sa pagsubok ng pagiging makatwiran at hindi dapat gamitin upang parusahan ang mga propesyonal dahil lamang sa kanilang socio-economic circumstances. Jocelyn Tabangcura-Domenden