MANILA, Philippines- Inaasahang tataas ang singil sa tubig simula ngayong Enero 2023 at magpapatuloy sa susunod na limang taon para mabayaran ang gastos sa pagsasaayos ng serbisyo.

Ayon sa ulat nitong Biyernes, magdaragdag ang Manila Water customers nf P8.04/m3 charge simula ngayong Enero, na patuloy na madaragdagan hanggang umabot ng P20.37 sa 2027.

Nangangahulugan na ang mga kumokonsumo ng 20 cubic meters ay magbabayad ng P425.

Samantala, para sa Maynilad customers, magkakaroon ng dagdag na P3.29/m3 charge simula ngayong Enero hanggang umabot sa P13.69 sa 2027.

Aabot sa P509.11 ang halaga ng 20 cubic meters.

“We need to ensure the reliability of service,” pahayag ni Metropolitan Waterworks and Sewerage System (MWSS) chief regulator Atty. Patrick Ty.

Makasisingil ng P181 bilyon ang Manila Water mula sa karagdagang charges, habang makakukuha ang Maynilad ng P163 bilyon.

Subalit, makatatanggap ng refund ang mga customer kapag hindi nagampanan ng water concessionaires ang serbisyo nito.

“Ino audit po natin sila at chine-check natin na only those that are prudent expenses can be recovered sa ating water tariff,” pahayag ni Ty. RNT/SA

MANILA, Philippines- Inihayag ng Manila Electric Company (Meralco) na posibleng makaapekto ang two-week maintenance shutdown ng Malampaya Deepwater Gas-to-Power facility sa gastos nito sa operasyon na magreresulta sa posibleng taas-singil sa consumer electricity bills.

Ayon sa ulat, kasadoa ng maintenance period mula Pebrero 4 hanggang 18.

“Hindi siya magpo-produce ng gas. ‘Yung Malampaya, nade-deplete na siya. So pababa po nang pababa yung napo-produce niya per day,” paliwanag ni DOE Undersectrary Rowena Cristina Guevara.

Dahil walang natural gas na magagamit para makapag-produce ng kuryente mula sa Malampaya, sinabi ng Meralco na mapipilitan silang kumuha ng fuel mula sa alternative sources.

Ang Malampaya natural gas sa Palawan ang nagpapatakbo sa power plants na nagsusuplay ng halos 2,000 megawatts sa Meralco.

“So around 40% yan of our energy requirements,” ani Meralco spokesperson Joe Zaldarriaga.

“Historically, everytime Malampaya goes on a maintenance shut down, nagkakaroon ito ng impact sa cost. … Maraming factors in play. This is just one of them but we have to wait for all the final billings from the suppliers when the time comes,” dagdag niya.

Sinabi ng Meralco official na posibleng maramdaman ang epekto sa March billing ng consumers.

Hinikayat naman ng Department of Energy ang iba pang power plants na umiwas sa pagsasagawa ng maintenance para sa patuloy na suplay ng enerhiya. RNT/SA

MANILA, Philippines- Nakipagpulong si Pangulong Ferdinand “Bongbong” Marcos Jr. sa mga pinuno ng Kamara at Senado nitong Biyernes upang talakayin ang legislative agenda ng administrasyon para sa taong ito.

Ipinost ng Presidential Communications Office (PCO) sa social media ang larawan ng pulong ni Marcos kina Senate President Juan Miguel Zubiri at Speaker Martin Romualdez.

Hindi naman nagbigay ng karagdagang impormasyon ang PCO ukol dito.

Balik-sesyon ang Senado at Kamara ngayong linggo.

Nitong Martes, sinabi ng Department of Budget and Management na target ng administrasyon ang Progressive Budgeting for Better and Modernized Governance Bill, Budget and Treasury Management System, National Government Rightsizing Program, at ang Maharlika Investment Fund.

Itinutulak din ni Marcos ang ratipikasyon ng Regional Comprehensive Economic Partnership, isang mega-trade deal sa mga miyembro ng Association of Southeast Asian Nations at partners nito sa Australia, China, Japan, South Korea, at New Zealand.

Base sa PCO, 10 sa 20 priority legislative measures na binanggit ng Pangulo sa unang State of the Nation Address noong Hulyo ang naipasa ng Kamara at naipadala na sa Senado hanggang nitong Enero 18. RNT/SA

MANILA, Philippines- Inilarawan ni Justice Secretary Jesus Crispin Remulla ang desisyon ng International Criminal Court’s (ICC) na i- authorize ang muling pagbubukas ng imbestigasyin sa drug war ng administrasyong Duterte bilang “unwelcome” at “irritant”.

“I think that the world knows that we are a functioning country with a functioning judicial system,” giit ni Remulla sa isang press briefing sa tanong kung makaaapekto ito sa aksyon ni Pangulong Ferdinand Marcos Jr. na makipag-ugnyan sa international community.

“This is an irritant that just came in. It’s what we call an irritant,” dagdag niya. “Definitely, I do not welcome this move of theirs. And I will not welcome them to the Philippines unless they make it clear that they will respect us in this regard.”

Sinabi pa ni Remulla na hindi niya papayagan na kuwestiyunin ang soberanya ng Pilipinas.

Ayon kay Remulla, bagama’t bukas ang pamahalaan sa pakikipag-dayalogo at pagbabahagi ng datos sa ICC, hindi umano ito dapat ipilit.

Sinabi niya na tatalakayin niya ang susunod na aksyon ng pamahalaan kay Solicitor General Menardo Guevarra, na nauna nang sinabi na aapela ang bansa sa ICC Appeals Chamber.

Samantala, ayon kay Remulla, hindi pa niya nakakausap si Marcos hinggil dito.

Nang tanungin kung handa ang mga awtoridad na makipagtulungan sakaling mag-isyu ng arrest warrants ang ICC, sinabi ni Remulla na walang awtoridad ang ICC.

“They will have no compulsory process in the country. They will not even be empowered to issue subpoenas in the country,” ani Remulla.

Ayon sa kanya, ang Pilipinas ay “country that is trying its best to cope with the demands of the times.”

Nanawagan din si Remulla sa ICC na ibahagi sa pamahalaan ang patterns na nais silipin ng mga imbestigador.

“But they cannot subsume upon, they cannot assume jurisdiction in this country without our allowing them to do that,” aniya,

Sa pahayag nitong Huwebes, sinabi ng ICC na ang pre-trial chamber nito “is not satisfied that the Philippines is undertaking relevant investigations that would warrant a deferral of the court’s investigations.”

Kumalas ang Pilipinas mula sa Rome Statute, na nagtatag sa ICC, noong March 2019 sa pamumuno ni Duterte.

Para naman kay Marcos, walang intensyon ang bansa na muling umanib sa ICC. RNT/SA

MANILA, Philippines- Ipinag-utos ni suspended Bureau of Corrections (BuCor) chief Gerald Bantag sa ilang preso na magbenta ng kontrabando sa loob ng New Bilibid Prison (NBP) at pinwersa ang iba pa na bilhin ang mga ito, ayon sa isang person deprived of liberty (PDL).

Sinabi ni NBP inmate Roland Villaver na siya ang nakatoka na magbenta para sa grupo ni Bantag dahil malapit umano siya sa suspended BuCor chief, batay sa ulat nitong Biyernes.

“Inilagay na nila akong kumander doon sa kwerna. Ako na yung ginamit nilang taga salo ng mga kung tawagin nila ay ‘special offer.’ Doon ko nakita yung sistema,” paglalahad ni Villaver.

“Yung buong isang truck na pinasok, 2,000 boxes yung nakalagay lang sa mga lata na in can. And then yung iba ibang alak pa. Sigarilyo, for the boys na lang yun,” dagdag ni Villaver.

“Ang per box, kung bultuhan ang bilihan, nasa aabot lang ng almost P1,000 [ang bilihan]. Sa loob, aabot yan ng P20,000 to P25,000 isang kahon,” patuloy pa niya.

Sinabi ni Villaver na halos milyon ang naibibigay niya sa grupo ni Bantag kada linggo.

“Tuwing deliver, weekly, P5 million, P5 million weekly ang binibigay namin sa kanya. Ako ang nagpapadeliver sa pera sa kanya,” aniya.

“Pag binagsak sa mga kumander yun, ibabagsak din ng mga kumander sa mayor. Ang mayor ang mamomroblema kung paano niya babayaran. Ilalatag sa mga tao, yung mga tao hindi alam kung paano nila babayaran,” dagdag niya.

Naunang inihayag ni Villaver na iniatas din ni Bantag ang pagpatay sa mga presong pinaniniwalaang nasa likod ng Facebook page na tumutugis sa pagpapatakbo niya sa NBP.

Sinabi ng BuCor at ng Department of Justice (DOJ) na gumugulong na ang imbestigasyon sa mga alegasyon ni Villaver.

“We’ve looked at it already, it’s a centralized system, from the gates of Muntinlupa opening up to the delivery of these contrabands,” ayon kay Justice Secretary Crispin Remulla.

“If they are able to do those things still, it means the system is not succeeding. We have to stop it. Dapat talaga awatin na ‘yan, itigil na yang kalokohan na ‘yan,” dagdag niya.

“Kusang sinuko nila eh, hindi naman ako nag-oplan oplan paglilinis, voluntary ‘yan binigay ng mga PDL. Tapos tinatanong ko, saan ba galing yan? Bakit ang daming ganyan? sir, binibigay sa amin yan, binebenta, and then P1,000 ang presyo,” sabi naman ni BuCor acting director general Gregorio Catapang Jr.

“Dapat nga mareform sila tapos sila pa ang inaabuso natin, so paano sila magrereform? Kung ang pagupo ko rito, mission failed ang BuCor, yung dapat pangalagaan yung mga PDL,” aniya pa.

Sa kasalukuyan ay wala pang komento si Bantag hinggil dito.

Nauna niyang iginiit na itinanim lamang ang kontrabando sa NBP matapos siyang maalis sa pwesto. RNT/SA